Iosua

21 Ame hnene la itre tixe ne lapa ne Levi, hna cil qëmekei Eleazara atre huuj me Iosua nekö i Nuna, me itre tixe ne lapa ne la itre tribu ne Isaraela, 2 e Silo, ngöne la nöje Kanana. Öni angatr: “Hnei Iehova hna amekötin jëne Mose laka, troa hamë hun la itre traon matre tro huni a lapan, me itre hnepadro ezin thatraqane la itre öni hun.” 3 Matre tune lo hnei Iehova hna amekötin, hnene la angetre Isaraela hna xome qa ngöne la edrö i angatr, la itre traon me itre hnepadro ezin, matre hamën kowe la angetre Levi.

4 Hna uthidrönegötiën la ketre götran thatraqane la itre fami i Kohatha. Ame la angetre Levi ka xulu qaathei Arona atre huuj, ke hna uthidrönegötiën* koi angatr* la 13 lao traon, hna xom qa ngöne la itre tribu ne Iudra, me Simeona, me Beniamina.

5 Nge ame kowe la itre xaa fami i Kohatha, hna hamën* la 10 lao traon qa ngöne la itre götran ne la itre fami ne la itre tribu ne Eferaima, me Dana, memine la ketre sine la tribu i Manase.

6 Ame kowe la angetre Geresoma, hna hamën la 13 lao traon qa ngöne la itre götran ne la itre fami ne la itre tribu ne Isakara, me Asera, me Nafatali, memine la ketre sine la tribu i Manase, e Basana.

7 Ame kowe la angetre Merari, hna hamën la 12 lao traon qa ngöne la itre götran ne la itre fami ne la itre tribu ne Reubena, me Gada, me Zebulona; hna thawa pë hë thenge la itre fami i angatr.

8 Celë hi aqane kuca ne la angetre Isaraela matre troa uthidrönegöti,* me hamën la itre traon me itre hnepadro ezin kowe la angetre Levi, tune lo hnei Iehova hna amekötin jëne Mose.

9 Matre hna xome la itre traon qa ngöne la itre götran ne la tribu i Iudra, me Simeona; hna fejan e celë la ëjen la itre traone cili. 10 Hna hamëne itre ej kowe la angetre Levi, lo itre matra i Arona nge ka sine la itre fami i Kohatha. Eje hi, angatre hi lo ka kapa la pane götran hna uthidrönegötiën.* 11 Hna hamë angatr la traon ne Kiriath-Araba, ene Heberona, ngöne la itre wetr e Iudra, memine la itre hnepadro ezin (Araba lo keme i Anaka). 12 Ngo ame kö la itre hlapa me itre hunahmi ezin la traon, ke hna hamëne pë hë koi Kaleba nekö i Iefune, nyine zi i angeic.

13 Nge ame kowe la itre matra i Arona atre huuj, hna hamëne la traon ne Heberona, matre nyine traon ne kötre mel kowe la ka humu atr nge tha hna thë kö, nge hna hamëne fe la itre hnepadro ezin, me Libena me itre hnepadro ezin, 14 me Iatira me itre hnepadro ezin, me Esetemoa me itre hnepadro ezin, 15 me Holon me itre hnepadro ezin, me Debira me itre hnepadro ezin, 16 me Aina me itre hnepadro ezin, me Iuta me itre hnepadro ezin, me Bethe-Semes me itre hnepadro ezin: traqa koi 9 lao traon hna xom qa ngöne la itre götran ne la lue tribu cili.

17 Qa ngöne la götran ne la tribu i Beniamina, hna xomi Gibeona me itre hnepadro ezin, me Geba me itre hnepadro ezin, 18 me Anathoth me itre hnepadro ezin, me Alemon me itre hnepadro ezin: traqa koi 4 lao traon.

19 Matre ame asë hi la itre matra i Arona, ene lo itre atre huuj, ke hnei angatr hna kapa la 13 lao traon me itre hnepadro ezin.

20 Ame la itre xaa fami i Kohatha, ka sine la lapa i angetre Levi, hnei angatr hna kapa qa ngöne la götran ne la tribu i Eferaima, la itre traon hna uthidrönegötiën. 21 Hna hamë Sekema koi angatr, nyine traon ne kötre mel kowe la ka humu atr nge tha hna thë kö, me itre hnepadro ezin ngöne la itre wetr ne Eferaima, me Gezera me itre hnepadro ezin, 22 me Kibezam me itre hnepadro ezin, me Bethe-Horona me itre hnepadro ezin: traqa koi 4 lao traon.

23 Qa ngöne la götran ne la tribu i Dana, hna xomi Eletek me itre hnepadro ezin, me Gibethon me itre hnepadro ezin, 24 me Aialona me itre hnepadro ezin, me Gatha-Rimona me itre hnepadro ezin: traqa koi 4 lao traon.

25 Qa ngöne la götran ne la ketre sine la tribu i Manase, hna xomi Tanaka me itre hnepadro ezin, me Gatha-Rimona me itre hnepadro ezin: traqa koi lue traon.

26 Matre ame asë hi la itre xaa fami i Kohatha, hnei angatr hna kapa la 10 lao traon me itre hnepadro ezin.

27 Ame la angetre Geresoma ka sine la itre fami ne la angetre Levi, hnei angatr hna kapa qa ngöne la götran ne la sine la tribu i Manase, la traon ne Golana e Basana me itre hnepadro ezin, nyine traon ne kötre mel kowe la ka humu atr nge tha hna thë kö. Hna hamë angatre fe la traon ne Besetera, me itre hnepadro ezin: traqa koi lue traon.

28 Qa ngöne la itre götran ne la tribu i Isakara, hna xomi Kiseon me itre hnepadro ezin, me Daberath me itre hnepadro ezin, 29 me Iamuth me itre hnepadro ezin, me Eni-Ganim me itre hnepadro ezin: traqa koi 4 lao traon.

30 Qa ngöne la götran ne la tribu i Asera, hna xomi Miseal me itre hnepadro ezin, me Abedon me itre hnepadro ezin, 31 me Helekath me itre hnepadro ezin, me Rehoba me itre hnepadro ezin: traqa koi 4 lao traon.

32 Qa ngöne la götran ne la tribu i Nafatali, hna xomi Kadesi e Galilaia me itre hnepadro ezin, nyine traon ne kötre mel kowe la ka humu atr nge tha hna thë kö, me Hamathe-Doro me itre hnepadro ezin, me Katan me itre hnepadro ezin: traqa koi köni traon.

33 Matre ame asë hi la angetre Geresoma, hnei angatr hna kapa la 13 lao traon memine la itre hnepadro ezin; hna thawa pë hë thenge la itre fami i angatr.

34 Ame la itre fami i Merari, lo itre xaa atre Levi, hnei angatr hna kapa qa ngöne la götran ne la tribu i Zebulona, la traon ne Iokeneama me itre hnepadro ezin, me Kareta me itre hnepadro ezin, 35 me Dimena me itre hnepadro ezin, me Nahalol me itre hnepadro ezin: traqa koi 4 lao traon.

36 Qa ngöne la götran ne la tribu i Reubena, hna xomi Bezeri me itre hnepadro ezin, me Iahaza me itre hnepadro ezin, 37 me Kademotha me itre hnepadro ezin, me Mefath me itre hnepadro ezin: traqa koi 4 lao traon.

38 Qa ngöne la götran ne la tribu i Gada, hna xomi Ramoth e Gileada me itre hnepadro ezin, nyine traon ne kötre mel kowe la ka humu atr nge tha hna thë kö, me Mahanaima me itre hnepadro ezin, 39 me Hesebona me itre hnepadro ezin, me Iazera me itre hnepadro ezin: traqa koi 4 lao traon.

40 Matre ame asë hi la angetre Merari, lo itre xaa fami ka sine la angetre Levi, ke hnei angatr hna kapa la 12 lao traon; hna thawa pë hë thenge la itre fami i angatr.

41 Matre ame asë hi la angetre Levi, hnei angatr hna kapa la 48 lao traon memine la itre hnepadro ezin. Itre ej asë hi nyipine la itre götran ne la angetre Isaraela. 42 Ame asë hi la itre traone cili, ke hna kanoth hnene la itre hnepadro hnë axö öni; ceitune hi kowe la nöjei traon asë.

43 Celë hi aqane kuca i Iehova matre hamën kowe la angetre Isaraela, la nöj hnei nyidrëti hna sisinyi kowe la itre qaaqaa i angatr. Ame hnei angatr hna thapa la nöj, me lapan ej. 44 Ketre, hnei Iehova hna kuca matre tro angatr a tingeting qa ngöne la nöjei götran, tune lo hnei nyidrëti hna sisinyi kowe la itre qaaqaa i angatr. Pëkö ketre ithupëjia ka atreine cil koi angatr. Hnei Iehova hna aijijë angatr troa ngaan la nöjei ithupëjia me angatr. 45 Qa ngöne la nöjei ewekë ka mingöming hnei Iehova hna sisiny* kowe la angetre Isaraela, ke tha tria kö la ketre, ngo hna eatrën asë hi.