Ezekiela

10 Eni pala kö a goeën, nge mama pi hi hune la ewekë hna seluth e koho hune la he ne la itre kerubi, la ketre ewekë kösë etë safairo, nge ka ceitu me theron. 2 Matre öni nyidrëti jë hi kowe la atr ka heetrë lino: “Tro jë nyipine la itre wil fene la itre kerubi. Atiqane jë la lue ime i ö hnei wanalep ka ej nyipine la itre kerubi, nge hna pi kowe la traon.” Ame hnei angeic hna tro nge eni a goeë angeic.

3 Ame la angeic a tro, itre kerubi a cil ngöne la götrane maca ne la uma, nge kola lapan asë la kur e koho hnin hnene la iaw. 4 Nge hnene la elolo i Iehova hna mejë qa hune la itre kerubi, a tro kowe la qene qëhnelö ne la uma. Ame hna tiqa trootro la uma hnene la iaw, nge hna thinane la kur hnene la ehudrumene la elolo i Iehova. 5 Nge hna mexem qa ngöne la kur e kuhu trön, la mejene la itre iape ne la itre kerubi; kösë mejene la Akötresie Ka Tru Trenge Men la nyidrëti a ithanata.

6 Thupene lai, hnei nyidrë hna upe la atre heetrë lino, ka hape: “Xome jë la eë nyipine la itre wil me e nyipine la itre kerubi.” Matre hnei angeic hna tro me cil ezin la ketre wil. 7 Nge hnene la ketre kerubi hna li ime kowe la eë nyipine la itre kerubi, me xome la itre xaa wanalep matre amë ngöne la ime ne la atre heetrë lino. Ame hnei angeic hna xome me tro. 8 Fene la itre iape ne la itre kerubi, hetre ewekë ka ceitu me iwanakoime i atr.

9 Eni pala kö a goeën, nge öhne ju hi ni la 4 lao wil ezine la itre kerubi, ene la ca wil ezine la isa ca kerubi. Nge ka melemel la itre wil kösë etë berulo. 10 Ceitun asë hi la 4 lao wil; kösë hetre wil hnine la ketre wil. 11 Matre ame la itre wil a nyap, tha nyipiewekë kö troa jea, ke itre ej asë hi a nyiapën la nöjei götran. Itre ej a tro meköt kowe la götran hna ujë kow hnene la he. 12 Hna lapan asë hi la ngönetrei, me ju, me lue im, me itre iape ne la itre kerubi hnei alamek. Ketre tune fe la itre wil, lo itre wil ne la 4 lao kerubi. 13 Ame hnenge hna dreng la kola sue kowe la itre wil ka hape: “Itre wil!”

14 Isa 4 lao iqëmeke i angatr. Ame la hnapan, ke iqëmeke ne kerubi. Ame la hnaaluen, ke iqëmeke ne atr. Ame la hnaakönin, ke iqëmeke ne liona. Nge ame la hna 4, ke iqëmeke ne aeto.

15 Nge hnene la itre kerubi hna mejë draië (kolo itre angela* hnenge hna öhn ezine Kebara), 16 nge ame la itre kerubi a tro, ke kolo fe a nyape la itre wil ezi angatr; nge ame la itre kerubi a xejë la itre iape i angatr matre sesë draië hune la ihnadro, ke tha ujë kö la itre wil, nge goi tha ananyi angatre fe. 17 Ame la angatr a cil, ke itre wile fe a cil, nge ame la angatr a sesë, itre wile fe a hane sesë, ke casi hi la ua ka huliwa thene la itre angela me itre wil.

18 Thupene lai, hnene la elolo i Iehova hna tro qa ngöne la qene qëhnelö ne la uma, me cile tha enij hune la itre kerubi. 19 Eni pala kö a goeën, nge hnene la itre kerubi hna xejë la itre iape i angatr, me tro qa ngöne la ihnadro. Ame la angatr a tro, ke itre wile fe ezi angatr. Hnei angatr hna cil ngöne la qene qëhnelö e koië ne la uma i Iehova, nge eje hui angatr la elolo ne la Akötresi Isaraela.

20 Kolo hi lo itre angela* hnenge hna öhn fene la Akötresi Isaraela, ezine Kebara. Nge trotrohnine ju hi ni e cili laka, itre kerubi hi angatr. 21 Ame la 4 lao angela cili, ke isa 4 lao iqëmeke i angatr, me 4 lao iap, me itre ewekë ka ceitu me iwanakoime i atr fene la itre iape i angatr. 22 Nge casi hi la itre iqëmeke i angatr memine lo hnenge hna öhn ezine Kebara. Angatr a isa tro meköt qëmekei angatr.