Esodro

25 Öni Iehova koi Mose ka hape: 2 “Qaja jë kowe la angetre Isaraela ka hape, tro angatr a xome qa ngöne la itre mo i angatr, la itre ahnahna koi ni. Tro epuni a kapa la ahnahna qaathene la nöjei atr ka hamën qa ngöne la hni ka ajan. 3 Hane hi la itre ahnahna nyine tro epuni a kapa qaathei angatr: gool, me sileva, me kopa, 4 me theny ka bulu, me drela ka madra, me theny ka madra palulu, me nyipi lino, me pene nani, 5 me ikupeine mamoe trahmany hna amadran, me kupeine fok*, me sinöe akasia, 6 me oel kowe la itre laame cil, me basama kowe la oel ne iën,* me kowe la nyine dreu ka pui lolo, 7 me itre wene etë soama,* me itre xa wene etë nyine acatren hune la iefoda,* me hune la nyine he imano. 8 Qa i angatr troa acili uma ne hmi koi ni, nge tro hë ni a lapa nyipi angatr. 9 Tro epuni a acil la uma maano,* memine la itre ewekë ka ce tro memin, thenge la tulu hnenge hna troa amamane koi eö.

10 “Qa i angatr troa cane la pua* hnei sinöe akasia. Troa lue kubit nge sin la eqean ej, nge ca kubit nge sin la eisaisan ej, nge ca kubit nge sin la edraiën ej.* 11 Tro eö a heetrën hnei nyipi gool, e koho hnin me e kuhu trön. Nge tro fe eö a nyi öline gool la pua. 12 Qa i eö troa dreuth ahmun me xupe la 4 lao otru gool thatraqan ej, me acatren ngöne la 4 lao wacan ej. Lue otru ngöne la ketre götran, nge lue otru ngöne la ketre götran. 13 Nge tro fe eö a kuca la lue tan hnei sinöe akasia, nge tro eö a pele goolën asë. 14 Tro eö a aline la lue tan ngöne la itre otru ka ej ngöne la lue götranene la Pua, matre xututh ej. 15 Nge tro kö a lapa la lue tan hnine la itre otru ne lai Pua, tha tro kö a uth. 16 Tro eö a qatreng hnine la Pua, la hnenge hna troa hamë eö, ene la Nyine Anyipicin.

17 “Nge tro eö a kuci thingene hnei nyipi gool, ka lue kubit nge sine la eqean ej, nge ca kubit nge sine la eisaisan ej. 18 Nge tro eö a kuca la lue kerubi gool hna tratraun hnei hama, ngöne la lue xötr ezine lai thingen. 19 Kuca ju la lue kerubi ngöne la lue xötr ezin, isa cas ngöne la lue xötr ezin ne lai thingen. 20 Tro la lue kerubi a seluthe draiëne la lue iape i nyidro, matre he la ithingen, nge tro nyidroti a iqëmekekeu. Nge tro la lue iqëmek ne la lue kerubi a goe kowe la ithingen. 21 Tro eö a amë la ithingen hune la Pua, nge tro eö a amë hnine lai Pua, la Nyine Anyipicin hnenge hna troa hamë eö. 22 Tro ni a mama koi eö hune la ithingen, nge e cili la hnenge hna troa ithanata me eö. Nge akawane la lue kerubi ka të hune la pua ne Anyipicin,* tro ni a amamane koi eö la nöjei wathebo nyine tro eö a ahnith kowe la angetre Isaraela.

23 “Nge tro fe eö a cane la laulau hnei sinöe akasia, troa lue kubit la eqean ej, nge ca kubit la eisaisan ej, nge ca kubit nge sine la edraiën ej. 24 Tro fe eö a heetrën asë hnei nyipi gool, me kuci öline* gool xötreithe la laulau. 25 Nge tro eö a kuca xötreith ej, la ketre ölin ka ca hnatrapaim* la edraiën. Nge tro eö a pele goolëne la itre xötr ezin. 26 Nge tro eö a kuca thatraqan ej la 4 lao otru gool, me acatrene ngöne la 4 lao kona ne la laulau, hmekune la hna acatrene la 4 lao iwacan. 27 Troa acatrene la itre otru ezine la ölin, nyine amë la itre tan, matre xututhe la laulau. 28 Tro eö a cane la itre tan hnei sinöe akasia, nge tro eö a pele goolën. Nge tro itre ej a nyine xututh lai laulau.

29 “Tro fe eö a hane kuca la itre trepene xen’ ej, me itre ver, me itre djök, me itre kap, nyine nei waina ne fii huuj. Tro eö a kuca hnei nyipi gool. 30 Nge tro pala hi eö a atë hune la laulau qëmekeng, la falawa nyine amaman.*

31 “Nge tro eö a kuci ita ne laam hnei nyipi gool hna tratraun hnei hama. Tro eö a kuca la trepen ej, me ngön ej, me itre wapicin ej, me itre neköi kap me itre iengen ka hum me ka thithë, hna acasin asë. 32 Nge kola tro la 6 lao wapicin qa ngöne la lue götrane ne la tane laam: könitre ngöne la ketre götran, nge könitre ngöne la ketre götran. 33 Ame ngöne la itre wapicin ngöne la ketre götran, troa atë la köni neköi kap kösë iengen ne amad, nge troa amë wengëne la itre iengen: e thupene ca iengen ka thithë, ke ca ka hum. Nge tro fe a kuca tun kowe la itre xa wapicin ngöne la ketre götrane la tane laam. Troa kuca tune lai kowe la 6 lao wapicin ka tro qa ngöne la ngön la ita ne laam. 34 Nge ame la ngön ne la ita ne laam, troa amë la 4 lao neköi kap kösë iengenin ne amad, nge troa amë wengëne la itre iengen: e thupene ca iengen ka thithë, ke ca ka hum. 35 Tro fe a hetre iengene ka hum, fene la lue pane wapicin ka tro qa ngöne la ngön la ita ne laam. Nge tro fe a hetrenyi la ca iengene ka hum fene la lue xa wapicin, me ca iengene ka hum fene lue wapicin tixenuë. Troa kuca tune lai kowe la 6 lao wapicin ka tro qa ngöne la ngön la ita ne laam. 36 Ame la itre iengene ka hum, me itre wapicin, memine la ita ne laam asë, troa ce xup asë itre ej hnei nyipi gool hna tratraun hnei hama. 37 Nge tro fe eö a kuca la 7 lao lamepa, nge e tro ha amelene la itre laam, tro itre ej a thinan e qëmeken. 38 Nge ame la itre akofene ej,* me itre trepene eë, troa kuca hnei nyipi gool. 39 Nge ame la ita ne laam, me itre jia ne huliwa ka ce tro memin, troa kuca hnene la ca talane* nyipi gool. 40 Kuca hnyawa jë thenge la tulu hna amamane koi eö hune la wetr.