Salamo
Thatraqane la atre jumi traem; nyine nyima ngöne “Lili.” Nyine amekunën. Salamo i Asafa.
80 Atre thupë mamoe ne Isaraela fe, pane drenge ju,
Nyipëti lo atre eatrongë Iosefa tune la hnënge mamoe.
2 Qëmekei Eferaima, Beniamina, me Manase,
Amamane jë la mene i nyipë;
Trohemi troa amele hun.
3 Akötresieti fe, kepe huni hmaca jë;
Ahudrumene jë koi hun la qëmeke i nyipë, matre mele pi hun.
4 Iehova fe, Akötresie ne la itre trongene isi e hnengödrai, uti hë eu la tro nyipëti a xelene* la thithi ne la nöje i nyipë?
5 Nyipëti a thua i angatr hnei treij kösë falawa,
Nge nyipëti a thue imen atrunyi angatr hnei itre trenge timidra.
6 Nyipëti a nue la itre ka lapa easenyi hun troa iwesitrë pi hun;
E mekune mina la itre ithupëjia troa hnyimasai hun, ke angatr a kuca.
7 Akötresieti fe, Joxu ne la itre trongene isi e hnengödrai, kepe huni hmaca jë;
Ahudrumene jë koi hun la qëmeke i nyipë, matre mele pi hun.
8 Hnei nyipëti hna fej la ketre vin qa Aigupito.
Hnei nyipëti hna helëne la itre nöj matre troa traan ej.
9 Hnei nyipëti hna jë la ketre götran kow ej,
Nge hnen ej hna cia waan me xötr trootro ngöne la nöj asë.
10 Hna heetrëne la itre wetr hnene la ahnuen ej,
Memine la itre sinöe arasi i Akötresie hnene la itre wapicin ej.
11 Qea ha la itre wapicin ej uti hë la hnagejë,
Me itre zin ej uti hë la Hneopegejë.*
12 Hnauëne laka, hnei nyipëti hna thëtrije la itre tra etë ne la vin,
Ke hna huj la itre wenen ej hnene la nöjei atr ka tro ezin?
13 Itre puaka wael a susun ej,
Nge itre öni wael a xeni ej.
14 Akötresieti fe, Joxu ne la itre trongene isi e hnengödrai, epi bëeke jë koi hun.
Goeëne jë qa koho hnengödrai, nge wange ju!
Nyidrawane jë la vine celë,
15 Ene lo vin* hna traane hnene la ime maca i nyipë,
Nge goeëne ju la nekön* hnei nyipëti hna aegöcatren thatraqai nyipë.
16 Hna dreuthetriji ej, nge hna satrije ej.
Ame la nyipëti a wesitrëne la vin, ke patre pi hi la nöj.
17 Epi tro la ime i nyipëti a sajuëne la atr ngöne la götrane maca i nyipë,
Ene lo nekö i atr hnei nyipëti hna aegöcatren thatraqai nyipë.
18 Tha tro hmaca kö huni a trotriji nyipë.
Thupëne ju la mele hun, matre tro huni a hëne la ëje i nyipë.
19 Iehova Akötresieti fe, Joxu ne la itre trongene isi e hnengödrai, kepe huni hmaca jë;
Ahudrumene jë koi hun la qëmeke i nyipë, matre mele pi hun.