Itre Edromë
30 Maca ka nyipiewekë qaathei Agura nekö i Iake koi Ithiela me Ukula:
2 Pëkö ca hnenge hna atre hune la itre xan,
Nge pëkö inamacaneng tune la itre xaa atr.
3 Tha hnenge kö hna inine la inamacan,
Nge patre kö theng la atrehmekune qaathene la Atr Ka Nyipi Hmitrötr.
4 Drei la ka elë e koho hnengödrai me uti hmaca?
Drei la ka lapa xome la enyi ngöne la hnatrapaime i nyidrë?
Drei la ka hakuthe la itre tim ngöne la iheetre i nyidrë?
Drei la ka ami ifegone* la itre cane la fen?
Maine atre hi eö, ke drei la ëje i nyidrë nge drei fe la ëjene la nekö i nyidrë?
5 Ka wië* asë la itre trengewekë i Akötresie.
Ketre petr nyidrë kowe la itre ka kötre zae thei nyidrë.
6 The nyixane kö la itre trengewekë i nyidrë,
Wanga tro nyidrëti a ameköti ö,
Nge tro ha mama laka, eö a thoi.
7 Eni a sipo eö la lue ewekë.
The cipane kö lue ej koi ni qëmekene tro ni a mec.
8 Xatua ni jë matre tha tro kö ni a lue iqëmek me thoi.
The nue ni kö troa pë ewekë maine trenamo.
Nue ni pi pe troa xeni la ang,
9 Matre tha tro kö ni a mej, me xele nyipë me hape: “Drei lae Iehova?”
Nge the nue ni kö troa pë ewekë, matre tha tro kö ni a atrekënö me ahmahmane* la ëje ne la Akötresing.
10 The silitrengathoine kö la hlu qëmekene la maseta i angeic,
Wanga tro nyidrëti a eji ö me upezö eö.
11 Hetre xötre atr ka ejine la itre keme i angatr
Me tha amanathithine la itre thine i angatr.
12 Hetre xötre atr ka mekun laka, ka wië angatr
Ngo tha hna siëne trije kö la dro* qaathei angatr.
13 Hetre xötre atr ka pi tru catr
Nge ka wangacone la itre xan!
14 Hetre xötre atr ka hetre inyö ka tune la itre taua
Me itre inyö* ka tune la itre hele;*
Angatr a öni hatrëne la itre ka co ne la fen
Me itre ka pë ewekë thene la itre atr.
15 Hetre lue nekön ne la itre aluka* ka sue ka hape: “Awejë! Awejë!”
Hetrenyi la köni ewekë ka tha hane kö mej,
4 lao ewekë ka tha hane kö qaja ka hape: “Loi ju hë!”
16 Ene la Hua,* memine la föe ka tha hnaho,
Memine la dro ka qaqacil,
Memine la eë ka tha hane kö qaja ka hape: “Loi ju hë!”
17 Ame la alamek ka hnyima fë la kem, me xele ma drei thin
Ke tro la itre halo ne la hnathup* a thin atin,
Nge tro fe la itre nekön ne la aeto a öni.
18 Hetrenyi la köni ewekë ka tha mama kö koi ni,*
Nge 4 lao ewekë hnenge hna tha trotrohnin:
19 Ene la gojenyi ne la aeto e koho hnengödrai,
Memine la gojenyi ne la un hune la etë,
Memine la gojenyi ne la he e kuhu hnagejë,
Memine la gojenyi ne la trahmanyi kowe la nekö jajiny.
20 Hane hi la aqane ujë ne la föe ka nyixetë:
Angeic a xen me köle ineqë,
Me hape: “Pëkö ewekë ka ngazo hnenge hna kuca.”
21 Hetrenyi la köni ewekë ka enienijëne la ihnadro
Nge 4 lao ewekë hnen eje hna thatreine xomihnin:
22 Ene la hlu hna acili joxun,
Memine la hmo ka xeni mej,
23 Memine la kola faipoipo me ketre föe hna xele ma wang,*
Memine la ketre hlue föe ka xome* la göhnë ne la maseta* i angeic.
24 Hetrenyi la 4 lao ewekë ka coco catr e celë fen,
Ngo hna hnahon memine la inamacan:
26 Memine la itre shefani,* itre öni ka pë trengecatr,*
Ngo ka kuca pe la itre uma i angatr ngöne la itre git;
28 Memine la othing ka fedre kowe la nöjei ewekë jëne la itre waca ne ej,
Nge ka lö hnine la hnanyijoxu.
29 Hetrenyi la köni ewekë nyine haine la aqane tro,
4 lao ewekë hna xouene ngöne la angatr a tro:
30 Ene la liona, lo öni ka catre kö hune la itre xaa öni,
Pëkö hnei angeic hna xouen;
31 Memine la kuli ka draië,* me nani trahmany;
Memine la joxu me trongene isi i nyidrë.
32 Maine hnei ö hna huliwa menu troa selë eö
Maine mekune troa kuca lai,
Ke thinge ju la që i ö hnene la iwanakoime i ö.
33 Ke tune la kola lepe la melek matre nyi batra
Me huje la hnafij matre neni la madra,
Ketre tun, ame la kola akökötrene la elëhni, ke kola axulune la iwesitrë.