Ezera
10 Ame la Ezera a thith me qaja amamane la itre ngazo ne la nöje i angeic, me treij me thil qëmekene la uma ne hmi ne la nyipi Akötresie, hnene la ka ala nyimu, itre trahmany me föe, me itre nekönatr ne Isaraela hna itrony xötreithi angeic, me itreijeny. 2 Matre hnei Sekania nekö* i Iehiela, nekö i Elama, hna qaja koi Ezera ka hape: “Hne huni hna tha mele nyipici kowe la Akötresi hun, pine la hne huni hna xome* la itre föe trenyiwa. Ngo hetre mejiune pala kö koi Isaraela. 3 Haawe enehila, tro sa isisinyikeu memine la Akötresi së, me sisinyi troa upe hmaca la itre föe cili, me itre nekö i angatr, thenge la hna amekötin hnei Iehova me itre ka metrötrëne* hnyawa la hna amekötin hnene la Akötresi së. Tro hë sa tro thenge la Wathebo. 4 Cile jë, ke qa i ö troa amekötine la jole cili, nge ce eahuni me eö. Catre pi nge huliwa jë!”
5 Ame hnei Ezera hna cil, me upe la itre tane la itre atre huuj, me angetre Levi, me Isaraela asë troa sisinyi troa trongëne la hna qaja. Matre angatr a sisinyi jë. 6 Nge hnei Ezera hna mejë qëmekene la uma ne hmi ne la nyipi Akötresie, me lö hnine la hnahag* hna hnëkën koi Iohanana nekö i Eliasiba. Ngacama angeice hë ngöne la hnahage cili, ngo tha xeni kö Ezera la ketre ewekë, maine iji tim, ke angeic a treij pine la aqane tha mele nyipici ne la itre ka bëeke qa ngöne la nöje trenyiwa.
7 Ame hna qaja trongën ngöne la nöje Iudra asë me e Ierusalema la ketre maca laka, tro la nöjei atre ka bëeke qa ngöne la nöje trenyiwa a icasikeu e Ierusalema. 8 Nge thenge lo hna amekötin hnei itre he ne nöj me itre qatr, ame la atre ka tha traqa kö thupene la köni drai, tro ha thapa* la itre ewekë i angeic, nge tro ha helë angeic qa ngöne la icasikeu ne la itre ka bëek. 9 Matre hnene la nöjei trahmanyi ne Iudra me Beniamina, hna traqa e Ierusalema qëmeken la köni drai, kolo hmekune la hna 20 ne drai ne la hna 9 ne treu. Nge kola ilapanyi la nöj ngöne la ketre götrane gaa pë ihakun ne la uma ne hmi ne la nyipi Akötresie. Kola isa ngongo la ngönetrei angatr pine la jol, me pine la aqane trotro mani.
10 Nge hnei Ezera atre huuj hna mejë me hape: “Hnei epuni hna tha mele nyipici koi Akötresie, la epuni a faipoipo me itre föe trenyiwa. Nge hnei epuni hna nyixane la ngazo i Isaraela. 11 Haawe enehila, qaja amamane jë la itre ngazo i epun koi Iehova Akötresi ne la itre qaaqaa i epun, nge kuca jë la aja i nyidrë. Trotrije pi la itre xa nöj, me itre föe trenyiwa.” 12 Ame hnene la icasikeu asë hna qaja catrëne ka hape: “Hnëqa huni troa trongëne asë la hnei ö hna qaja. 13 Ame pe, ala nyimu catre hun, nge ijine mani pena, matre tha ijiji huni kö troa lapa e kuhu trön. Nge ame la jole celë, ke tha tro kö a seng ngöne la ca drai, maine luetre, ke ala nyimu the huni la ka icilekeu me kei kowe la jole cili. 14 Haawe, loi e tro la itre he ne nöj a nyi qeneqaja ne la icasikeu asë, nge tro la nöjei trahmany ngöne la itre traone huni ka xomi föe trenyiwa, a traqa ngöne la drai hna sa. Tro angatr a ce traqa me itre qatr, me itre atre iameköti ne la itre traon i angatr, uti hë la tro huni a ajeane la elëhni atraqatr ne la Akötresi hun, lo elëhni hna jel hnene la jole cili.
15 Ngo hnei Ionathana nekö i Asael me Iahazia nekö i Tikeva, hna icilekeu memine la hna amekötine celë. Nge hnene la lue atre Levi, Mesulama me Sabethai, hna ce xöle me nyidro. 16 Ngo hnene la itre xa ka bëeke qa ngöne la nöje trenyiwa, hna eatrëne la hnei angatr hna sisiny. Matre hnei Ezera atre huuj, me itre tixe ne lapa ne la itre gurup ne fami, lo hna isa qeje ëjen, hna icasikeu cas ngöne la pane drai ne la hna 10 ne treu, matre ce ithanatane la jol. 17 Ngöne la pane drai ne la pane treu, ase hë angatr waipengöne asë la nöjei trahmanyi ka xomi föe trenyiwa. 18 Qa ngöne lai, mama pi hi laka, hnene fe la itre neköne la itre atre huuj hna xomi föe trenyiwa. Thene la itre nekö i Iesua nekö i Iozadaka, me itre trejine me angeic: Maseia, me Eliezera, me Iarib, me Gedalia. 19 Ngo hnei angatr hna sisinyi* troa upe hmaca la itre föi angatr. Nge pine laka, hetre ngazo i angatr, hnei angatre fe hna sisinyi troa huujëne la ketre nani trahmany qa ngöne la itre öni, nyine huuj thatraqane ngazo.*
20 Nge thene la itre nekö i Imer: Hanani me Zebadia. 21 Thene la itre nekö i Harim: Maseia, me Elia, me Semaia, me Iehiela, me Uzia. 22 Thene la itre nekö i Pasur: Elioenai, me Maseia, me Isamaela, me Nethaniela, me Iozabada, me Elasa. 23 Thene la angetre Levi: Iozabada, me Simei, me Kelaia, (ene Kelita,) me Pethaia, me Iudra, me Eliezera. 24 Thene la itre ka nyima: Eliasiba. Nge thene la itre ka thupë qëhnelö: Saluma, me Telem, me Uri.
25 Nge ame kowe la itre xa atre Isaraela, thene la itre nekö i Paros: Ramaia, me Iezia, me Malekia, me Miamin, me Eleazara, me Malekia, me Benaia. 26 Thene la itre nekö i Elama: Matania, me Zakaria, me Iehiela, me Abedi, me Ieremoth, me Elia. 27 Thene la itre nekö i Zatu: Elioenai, me Eliasiba, me Matania, me Ieremoth, me Zabad, me Aziza. 28 Thene la itre nekö i Bebai: Iohanana, me Hanania, me Zabai, me Athelai. 29 Thene la itre nekö i Bani: Mesulama, me Maluka, me Adaia, me Iasuba, me Seal, me Ramoth. 30 Thene la itre nekö i Pahatha-moaba: Adena, me Kelal, me Benaia, me Maseia, me Matania, me Bezaleli, me Binui, me Manase. 31 Thene la itre nekö i Harim: Eliezera, me Isia, me Malekia, me Semaia, me Simeona, 32 me Beniamina, me Maluka, me Semaria. 33 Thene la itre nekö i Hasum: Matenai, me Matathia, me Zabad, me Elifelet, me Ieremai, me Manase, me Simei. 34 Thene la itre nekö i Bani: Maadai, me Amerama, me Uel, 35 me Benaia, me Bedeia, me Kelu, 36 me Vania, me Meremoth, me Eliasiba, 37 me Matania, me Matenai, me Iasau. 38 Nge thene la itre nekö i Binui: Simei, 39 me Selemia, me Nathana, me Adaia, 40 me Makenadebai, me Sasai, me Sarai, 41 me Azareela, me Selemia, me Semaria, 42 me Saluma, me Amaria, me Iosefa. 43 Thene la itre nekö i Nebo: Ieiela, me Matathia, me Zabad, me Zebina, me Iadau, me Ioela, me Benaia. 44 Hnei angatr asë hi hna xomi föe trenyiwa, matre angatr a upe hmaca pi la itre föi angatr, me itre neköne la itre föe cili.