Iosua

4 Ame ju hi la kola ase sasaithe la hneopegejë Ioridrano hnene la nöj, öni Iehova jë hi koi Iosua ka hape: 2 “Iëne jë qa ngöne la nöj la 12 lao trahmany, cas qa ngöne la ca tribu, 3 nge ahnithe jë koi angatr ka hape: ‘Xome jë la 12 lao etë nyipine la hneopegejë Ioridrano ngöne lo hna cil hnene la itre atre huuj, nge tro fë jë kowe la götran hnei epuni hna troa meköl e jidr.’”

4 Ame hnei Iosua hna hën lo 12 lao trahmanyi hna iën qa ngöne la itre tribu ne Isaraela, 5 nge öni angeic jë hi: “Tro jë qëmekene la Pua i Iehova Akötresi epun, e kuhu nyipine la hneopegejë Ioridrano, nge hleme jë e cili la isa ca etë, nge atë jë hune la itre iape i epun, matre troa ihmeku la etrune la itre etë memine la etrune la itre tribu ne Isaraela. 6 Tro la itre etë cili a ketre hatrene koi epun, matre e tro la itre nekö* i epun elany a hnying ka hape: ‘Hnauëne la epuni a amë la itre etë e celë?’ 7 Tro hë epuni a sa ka hape: ‘Kolo ke hna pane cile la hneopegejë Ioridrano qëmekene la pua ne isisinyikeu i Iehova. Ame lo kola sasaithe la hneopegejë hnene la pua, tha neni ju hi la tim, matre ame la itre etë celë, ke nyine amekunëne la drai cili kowe la angetre Isaraela.’”

8 Ame hnene la angetre Isaraela hna drengethenge la hna amekötin hnei Iosua: hnei angatr hna xome la 12 lao etë nyipine la hneopegejë Ioridrano, tune lo hnei Iehova hna amekötin koi Iosua, matre troa ihmeku memine la etrune la itre tribu ne Isaraela. Nge hnei angatre hna xome la itre etë me amë ngöne la götrane hnei angatre hna troa meköl.

9 Hnei Iosua mina fe hna iatëkeune la 12 lao etë nyipine la hneopegejë Ioridrano, ngöne la götrane hna cil hnene lo itre atre huuj ka xututhe* la pua ne isisinyikeu. Ame enehila, itre eje pala hi a cil e cili.

10 Ame la itre atre huuj ka xututhe* la Pua, ke angatre pala hi a cil nyipine la hneopegejë Ioridrano, uti hë la angetre Isaraela a ase kuca asë la hnei Iehova hna upi angatr jëne Iosua. Nge ngöne la ijine cili, kola nyimenyime tro sasaithe la hneopegejë hnene la nöj. 11 Ame hë la angatr asë a ase sasaithe la hneopegejë, ke hnene fe la itre atre huuj hna sasaith ej memine la Pua i Iehova qëmekene la nöj asë. 12 Nge ame pena la angetre Reubena me angetre Gada, memine la sine la tribu i Manase, ke hnei angatr hna tro pa qëmekene la angetre Isaraela, tune la ketre trongene isi, thenge lo hnei Mose hna amekötin koi angatr. 13 Matre hnene la 40 000 lao soc ka hnëkë troa isi, hna tro qëmekei Iehova ngöne la itre hnapapa xötreithi Ieriko.

14 Ngöne la drai cili, hnei Iehova hna atrunyi Iosua qëmekene la nöje Isaraela asë, matre hnene la angetre Isaraela hna metrötrë* Iosua ngöne la ijine mel angeic, tune lo aqane metrötrë Mose hnei angatr.

15 Ame hnei Iehova hna qaja koi Iosua ka hape: 16 “Upe jë la itre atre huuj ka xututhe* la pua ne Anyipicin* troa elë qa ngöne la hneopegejë Ioridrano.” 17 Matre öni Iosua jë hi koi angatr ka hape: “Elë jë hë qa ngöne la hneopegejë Ioridrano.” 18 Nge ame hë la kola elë hnene la itre atre huuj ka xututhe* la pua ne isisinyikeu i Iehova qa ngöne la hneopegejë Ioridrano, me waja la gaa weliwel hnene la lue ca i angatr, ke neni hmaca pi hi la tim uti hë la kola elë kowe la itre ölin ej tun ekö.

19 Hnene la nöj hna sasaithe la hneopegejë Ioridrano, ngöne la drai 10 ne la pane treu, nge hnei angatr hna lapa e Gilegala, ngöne la götrane koië ne Ieriko.

20 Ngo ame kö lo 12 lao etë hna xom qa ngöne la hneopegejë Ioridrano, ke hnei Iosua hna acili e Gilegala. 21 Thupene lai, öni angeic kowe la angetre Isaraela: “E tro la itre nekö i epun elany a hnyingëne kowe la itre keme i angatr ka hape: ‘Nyine ue la itre etë celë?’ 22 Ke tro hë epuni a qejepengöne koi angatr ka hape: ‘Hnene la nöje Isaraela hna trongë iwaca uti hë la kola sasaithe la hneopegejë Ioridrano, 23 ngöne lo Iehova Akötresi epun a aqaqacilëne la hneopegejë qëmekei angatr, uti hë la angatr a ase sasaith ej. Ceitune hi la hnei Iehova Akötresi epun hna kuca kowe la hneopegejë Ioridrano, memine lo nyidrëti a aqaqacilën la Hnagejë Ka Palulu qëmeke hun, matre tro huni a sasaith ej. 24 Hnei nyidrëti hna kuca la iamamanyikeu cili, matre tro la nöjei nöj e celë fen a atre laka, ka men la ime i Iehova, nge matre tro pala hi epuni a xoue Iehova Akötresi epun.’”