Esodro
7 Ame hnei Iehova hna qaja koi Mose ka hape: “Pane dreng, ase hë ni acili eö nyine Akötresie koi Farao. Nge tro Arona trejine me eö a nyi perofeta i eö. 2 Tro eö a qaja asë la hnenge hna upi eö troa qaja, nge tro Arona trejine me eö a ithanata koi Farao, nge tro hë Farao a nue la angetre Isaraela troa tro qa ngöne la zi angeic. 3 Nge ame ni, tro ni a axetine la hni Farao. Nge tro ni a kuca la nyimu hatren, me nyimu iamamanyikeu e Aigupito. 4 Ngo tha tro kö Farao a drei epon. Nge tro hë ni a xejë la imeng hui Aigupito, me thepe Isaraela nöjeng ka ala nyimu* qa Aigupito, nge tro ni a kuca jëne la itre iameköti ka catr. 5 Nge eje hi, tro hë angetre Aigupito a atre laka, Iehova ni, la eni a troa xeji ime koi Aigupito, nge tro ni a thapa la nöjenge qa lai.” 6 Nge hnei Mose me Arona hna kuca la hnei Iehova hna amekötine koi nyidro. Nyidroti a kuca asë jë la hna upi nyidro. 7 Ame la nyidroti a ithanata koi Farao, ke 80 lao macatre i Mose, nge ame Arona, 83.
8 Nge öni Iehova koi Mose me Arona ka hape: 9 “Maine tro Farao a qaja koi epon ka hape, ‘kuca jë la ketre iamamanyikeu,’ tro hë eö Mose, a qaja koi Arona ka hape, ‘Xome jë la sine tö i eö, nge kuiëne pi qëmeke i Farao.’ Nge tro ej a nyi une ka tru.” 10 Matre Mose me Arona a lö jë koi Farao, me kuca asë la hna upi nyidro hnei Iehova. Arona a kuiëne pi la sine tö i angeic qëmeke i Farao me itre hlue i nyidrë, nge hnen ej hna nyi une ka tru. 11 Ame hnei Farao hna hëne la itre ka inamacan, me itre trene haze. Nge hnene la itre atre huuj ka trene haze e Aigupito hna hane kuca tun, jëne la itre haze i angatr. 12 Nge hnei angatr hna isa kuiëne la itre sine tö i angatr, ene pe, nyi une ka tru jë hi. Ngo hnene la sine tö i Arona hna ulume la itre sine tö i angatr. 13 Ngo xeti pala kö la hni Farao, nge tha drei nyidroti kö hnei nyidrë, tune lo hna qaja hnei Iehova.
14 Ame hnei Iehova hna qaja koi Mose ka hape: “Xeti hë la hni Farao, xele kö angeic ma nue la nöj. 15 Ame elanyi e hmakany, tro jë koi angeic, ke tro angeic a uti kowe la Nil, nge tro eö a cil ezine la hneopegejë, matre ixelë me angeic. Xometrongëne jë la sine tö, lo sine tö ka nyi un. 16 Nge tro hë eö a qaja koi angeice ka hape, ‘Hnei Iehova Akötresi angetre Heberu, hna upi ni troa qaja koi nyipë ka hape, “Nue pi la nöjeng matre tro angatr a nyihlueng ngöne la hnapapa.” Ngo uti pala hi enehila, tha hnei nyipëti kö hna dreng. 17 Matre öni Iehova, “Hane hi la aqane tro eö a atre laka, Iehova ni, tro ni a lepe la tim ne la Nil hnene la sine töng, nge tro ej a nyi madra. 18 Nge tro hë la itre ie ne la Nil a mec, nge tro la Nil a pi, matre thatreine hmaca kö angetre Aigupito troa ije la timi ne la Nil.”’”
19 E thupen, öni Iehova koi Mose: “Qaja jë koi Arona ka hape, ‘Xome jë la sine tö i eö, nge köjane asë jë la itre tim ne Aigupito, me itre timi ka neni, me itre jë i tim,* me itre an, me itre hnë ami tim i angatr, matre tro itre ej a nyi madra.’ Tro ha lapane la nöje Aigupito asë hnei madra, nge uti fe hë la itre trengene tim hna kuca hnei sinöe me etë.” 20 Ame hnei Mose me Arona hna canga kuca la hnei Iehova hna qaja. Arona a xejë jë la sine tö, nge angeic a lepe ju la Nil qëmeke i Farao me itre hlue i nyidrë. Ame hna madra asë pi la hneopegejë. 21 Nge ame la itre ie ne la hneopegejë, meci asë hë, nge pi hë la hneopegejë, matre tha ije hë la angetre Aigupito la timi ne la Nil. Nge si madra asë hë la nöje Aigupito.
22 Ngo hna kuca tune fe hnene la itre atre huuj ka trene haze, jëne la itre haze i angatr hna juetrën. Nge xeti pala kö la hni Farao, nge tha drei Mose kö me Arona, tune lo hna qaja hnei Iehova. 23 Nge hnei Farao hna bëeke hmaca kowe la hnalapa i nyidrë, nge tune pala hi, tha semesinene kö nyidrë la hnei nyidrëti hna öhn. 24 Nge hnene la angetre Aigupito asë hna sine la dro ezine la hneopegejë, matre thele tim ke thatreine kö angatr iji la timi ne la Nil. 25 Nge traqa koi 7 lao drai ka pexej ne lepe Iehova la Nil.