Esodro

35 Thupene lai, Mose a hëne jë la nöje Isaraela asë, me hape: “Hane hi la hna amekötin hnei Iehova, 2 ‘Hna nue koi së troa huliwa koi 6 lao drai, ngo ame ngöne la hna 7 ne drai, tre drai ka hmitrötre koi epun, ketre sabath, drai ka pexej troa mano koi Iehova. Ame la atr huliwa la drai cili, ke tro ha humuthi angeic. 3 Ngöne la sabath, hmitrötre tro epuni a athi eë ngöne la itre hnalapa i epun.’”

4 Nge öni Mose kowe la nöje Isaraela asë: “Hane hi la hna amekötin hnei Iehova, 5 ‘Xome jë qa ngöne la itre ewekë i epun, la nyine hamën koi Iehova. Epi tro la nöjei atr ka pi hamën qa kuhu hni, a traqa fë ahnahna koi Iehova, gool, me sileva, me kopa, 6 me theny ka bulu, me drela ka madra, me theny ka madra palulu, me nyipi lino, me pene nani, 7 me kupeine mamoe trahmany hna amadran, me kupeine fok, me sinöe akasia, 8 me oel kowe la itre laame, me basama kowe la oel ne iën, me kowe la nyine dreu ka pui lolo, 9 me itre wene etë soama, me itre xa wene etë nyine acatren hune la iefoda, me hune la nyine he imano.

10 “Loi e tro la nöjei atr ka atreine* huliwa thei epun, a traqa me kuca asë la hna amekötin hnei Iehova, 11 göne la uma maano, memine la itat, memine la nyine sitrëne la uma maano, memine la itre nyine acatren, me itre inehe, me itre agö, me itre sine feni, me itre trepene hna kuj; 12 memine la pua me itre tan, memine la ithingen, memine la imaano ne thewe hnahag, 13 memine la laulau, me itre tan ej, me itre ewekë ka ce tro memin, memine la falawa nyine amaman, 14 memine la ita ne laam nyine thina, me itre ewekë ka ce tro memin, me itre laam me itre oel ka ce tro memin; 15 memine la ita ne dreu ka pui loi me itre tan ej, memine la oel ne iën, memine la nyine dreu ka pui loi, memine la irido thatraqane la hnë lö ne la uma maano; 16 memine la ita ne huuj thatraqane la itre huuj ne dreuth asë, memine la ikalailai kopa ka ce tro memin, memine la itre tan me itre ewekë ka ce tro memin, memine la trepene tim me trepen ej, 17 memine la itre imaano ne la götrane gaa pë ihakun, memine la itre sine feni, me itre trepene hna kuj ka ce tro memin, memine la irido ne la hnë lö kowe la götrane gaa pë ihakun, 18 memine la itre nyine saane la uma maano, memine la itre nyine saan ngöne la götrane gaa pë ihakun, me itre otren ej, 19 memine la itre iheetr hna cane hnyawan thatraqane la huliwa ne la uma ne hmi, me itre iheetr hna ahmitrötrën thatraqai Arona atre huuj, me itre iheetr hna troa heetrën hnene la itre nekö i angeic, ngöne la angatr a cilëne la hnëqa ne atre huuj.’”

20 Ame hnene la angetre Isaraela asë hna isa ije qëmeke i Mose. 21 Nge ame la nöjei atre ka ajane troa hamë ahnahna qa kuhu hni koi Iehova, angatr a isa traqa fë nyine kuca la itat ne icasikeu, me nöjei ewekë ka nyipiewekë thatraqane la huliwa, memine la itre iheetre ka hmitrötr. 22 Nge hnene la nöjei trahmanyi me föe, hna isa traqa fë la itre pine, me itre iane hnangenyë, me itre otru, me itre xa nyine thaip, me nöjei ewekë gool. Angatr a isa traqa fë koi Iehova la itre ahnahna gool.* 23 Nge hnene la nöjei atr ka hetre theny ka bulu, me drela ka madra, me theny ka madra palulu, me nyipi lino, me pene nani, me itre kupeine mamoe trahmany hna amadran, me itre kupeine fok,* hna isa traqa fë. 24 Nge ame la nöjei atr ka ajane troa hamë sileva me kopa, hnei angatr hna isa traqa fë koi Iehova nyine ahnahna. Nge ame la nöjei atre ka trene sinöe akasia, angatr a isa traqa fë pi kowe la nöjei pengöne huliwa.

25 Nge ame la nöjei föe ka maca troa sili drela, angatr a isa traqa fë jë la itre hnei angatre hna sil, ene la theny ka bulu, me lino ka madra, me theny ka madra palulu, me nyipi lino. 26 Nge ame la nöjei föe ka atrein nge ka ajan,* angatr a sile la itre pene nani.

27 Nge ame la itre tan, angatr a traqa fë la itre wene etë soama, me itre xa wene etë nyine acatren hune la iefoda, me hune la nyine he imano, 28 memine la basama, me oel kowe la itre laam nyine thina, me oel ne iën, me oel thatraqane la nyine dreu ka pui lolo. 29 Ame la itre trahmanyi me föe ne Isaraela ka ajane troa hamëne la ketre ewekë kowe la huliwa hnei Iehova hna ahnith jëne Mose, tre tro angatr a tro fë huuj koi Iehova, thenge la hna sipu axeciën.

30 Matre öni Mose kowe la angetre Isaraela ka hape: “Dreng, ase hë Iehova ië Bezaleli nekö i Uri, nekö i Huro, qa ngöne la tribu ne Iudra. 31 Ase hë nyidrë atiqanyi angeic hnene la ua i Akötresie, matre tro angeic a hetre inamacan, me atrein, me wangatrehmekun ngöne la nöjei pengöne huliwa asë, 32 me atreine eköthe la itre huliwa nyine amingömingön, me huliwane la gool, me sileva, me kopa, 33 me thupa la itre etë me iacatrenekeun, me kuca la nöjei pengöne ewekë sinöe nyine amingömingön. 34 Nge hnei nyidrëti hna hamëne koi angeic, me Aholiaba, nekö i Ahisamak ne la tribu ne Dana, la atreine troa hamë ini. 35 Hnei nyidrëti fe hna hamën la atrein* koi nyidro, matre troa kuca la nöjei pengöne huliwa, me atreine hu maano, me cane la itre theny ka bulu, me lino ka madra, me theny ka madra palulu, me nyipi lino, me nöjei huliwa hna kuca hnene la ka sili imaano. Tro la lue atre cili a kuca la nöjei pengöne huliwa, me eköthe hnyawane la nöjei pengöne huliwa.