Esodro

37 Nge hnei Bezaleli hna kuca la Pua hnei sinöe akasia. Nge lue kubit* nge sin la eqean ej, nge ca kubit nge sin la eisaisan ej, nge ca kubit nge sin la edraiën ej. 2 Nge hnei angeic hna heetrën hnei nyipi gool la götrane ka he hnin, me tröne lai Pua. Nge hnei angeic hna kuci öline goole xötreithe la pua. 3 Thupene lai, angeic a dreuth ahmune pi kowe la Pua la 4 lao otru gool, nyine amë e koho hune la 4 lao wacan: lue otru ngöne la ketre götran, nge lue xan ngöne la ketre götran. 4 Nge angeic a kuca jë fe la itre tan hnei sinöe akasia, me pele goolën. 5 Thupene lai, hnei angeic hna alöne la lue tan hnine la itre otru ngöne la lue götranene la Pua, nyine xututhe la Pua.

6 Angeic a kuca jë fe la ithingen hnei nyipi gool, nge lue kubit nge sin la eqean ej, nge ca kubit nge sin la eisaisan ej. 7 Nge ame ngöne la lue xötr ezin ne la ithingen, angeic a kuca jë la lue kerubi gool hna tratraun hnei hama. 8 Ca kerubi ngöne la ketre götran, nge ketre ngöne la ketre götran. Nge angeic a kuca jë la lue kerubi ngöne la lue xötr ezine lai ithingen. 9 Nge ame la lue kerubi, lue ej a seluthe draiëne la lue iape i nyidro, matre he la ithingen. Nge lue ej a iqëmekekeu, me goe kowe la ithingen.

10 Nge angeic a kuca jë la laulau hnei sinöe akasia, nge lue kubit la eqean ej, nge ca kubit la eisaisan ej, nge ca kubit nge sin la edraiën ej. 11 Nge angeic a heetrëne jë hnei nyipi gool, me nyi öline gool xötreith. 12 Nge xötreithe la laulau angeic a kuca ju la xötre ezin ka ca hnatrapaime* la edraiën, me pele goolëne la itre ölin xötreith. 13 Ketre, angeic a dreuth ahmune ju fe la gool nyine kuca la 4 lao otru, me acatren itre ej ngöne la 4 lao kona, hmekune la hna acatrene la 4 lao wacan. 14 Nge hna easenyine la itre otru kowe la xötr ezin, matre alöne la itre tan nyine xutuhe la lalau. 15 Thupene lai, angeic a kuca ju la itre tan nyine xututhe la laulau. Angeic a kuca ju hnei sinöe akasia, me pele goolën. 16 Nge hnei angeic hna kuca hnei nyipi gool, la nöjei ewekë nyine atë hune la laulau: Itre trepene xen, me itre ver, me itre kap, me itre djök nyine nenge la itre waina ne fii huuj.

17 Thupene lai, angeic a kuca ju la ita ne laam hnei nyipi gool hna tratraun hnei hama. Nge ame la trepen ej, me ngöne ej, me itre kap, me itre iengen ka hum me ka thithë, hna acasin itre ej asë. 18 Nge kola tro la 6 lao wapicin qa ngöne la ita ne laam: könitre ngöne la ketre götran, nge könitre ngöne la ketre götran. 19 Hune la ketre xötre wapicin, hetrenyi la köni neköi kap kösë iengen ne amad, nge hna amë wengëne la itre iengen, e thupene la ca iengen ka thithë, ke ca ka hum. Nge ngöne la ketre xötre wapicin, hetrenyi la köni neköi kap kösë iengeni ne amad, nge hna amë wengëne la itre iengen, ase jë ca ka thithë, matre ca ka hum. Hna kuca tune lai kowe la 6 lao wapicin ka tro qa ngöne la ngön la ita ne laam. 20 Nge ame ngöne la ngön la ita ne laam, hetrenyi la 4 lao neköi kap kösë iengeni ne amad, nge hna amë wengëne la itre iengen, e thupene la ca iengeni ka thithë, ke ca ka hum. 21 Hetre iengene ka hum, fene la lue pane wapicin ka tro qa ngöne la ngön la ita ne laam. Nge hetrenyi la ca iengene ka hum fene la lue xa wapicin, me ca iengene ka hum fene la lue wapicin tixenuë. Hna kuca tune lai kowe la 6 lao wapicin ka tro qa ngöne la ngön la ita ne laam. 22 Ame la itre iengen ka hum, me itre wapicin, memine la ita ne laam asë, hna ce xup asë itre ej hnei nyipi gool hna tratraun hnei hama. 23 Thupene lai, hnei angeic hna kuca hnei nyipi gool la 7 lao laam, me itre akofen ej, me itre trepene eë. 24 Nge angeic a kuca ju la ita ne laam, me itre jia ne huliwa ka ce tro memin. Hna kuca itre eje lai memine la ca talane* nyipi gool.

25 Angeic a kuca ju la ita ne dreu ka pui loi hnei sinöe akasia, nge ka cas la eqeane la 4 lao götran: ca kubit la eqean, nge ca kubit la eisaisan, nge lue kubit la edraiën. Nge hna acasine la ita ne dreu ka pui loi memine la itre jian. 26 Nge hnei angeic hna heetrën hnei nyipi gool la götran ka he hun, me itre götran xötreith, me itre jian. Nge hnei angeic hna nyi öline goole xötreithe la ita ne dreu ka pui loi. 27 Nge fene la ölin, ngöne la lue götran ka iqëmekekeu, hnei angeic hna acatrene la lue otru gool ngöne la lue götran, matre alöne la itre tan göi troa kapa trongën. 28 Thupene lai, angeic a kuca ju la lue tan hnei sinöe akasia, me pele goolën. 29 Nge angeic a kuca ju fe la oel ka hmitrötr nyine iën, memine la nyine dreu ka pui loi ka pë engazon. Nge ame la lue ewekë cili, hna lone hnyawane* lue ej.