Levitiko

9 Nge ame ngöne la hna 8 ne drai, hnei Mose hna hë Arona me itre nekö i angeic, memine la itre qatr ne Isaraela. 2 Öni Mose koi Arona: “Xome jë la ca neköi kau ka pë ethan nyine huuj ne ngazo, me ca mamoe trahmanyi ka pë engazon nyine huuj ne dreuth asë, nge huujëne jë qëmekei Iehova. 3 Nge tro pë hë eö a qaja kowe la angetre Isaraela ka hape: ‘Xome jë la ca nani trahmany nyine huuj ne ngazo, me ca neköi kau, me ca neköi mamoe trahmany, lue ka ca macatre me pë engazon, nyine huuj ne dreuth asë, 4 memine la ca kau, me ca mamoe trahmanyi thatraqane la itre huuj ne tingeting, matre huujën qëmekei Iehova, memine la huuj ne wene feja hna nyi oelën, ke ame enehila, tro Iehova a mama koi epun.’”

5 Ame hnei angatr hna traqa fë qëmekene la itat ne icasikeu, la itre ewekë hnei Mose hna upi angatr troa xom. Nge hnene la nöj asë hna easeny, me icileny qëmekei Iehova. 6 Matre öni Mose jë hi: “Hane hi la hnei Iehova hna amekötin koi epun, matre mama pi la lolo i Iehova koi epun.” 7 Nge öni Mose jë hi koi Arona: “Tro jë kowe la ita ne huuj, nge tro fë jë la huuj ne ngazo i ö, memine la huuj ne dreuth asë i ö, nge kuca jë lo hna majemin, ene la huuj ne ialoinekeun thatraqai ö, me thatraqane la fami i ö. Nge tro fë jë la huuj ne la nöj, nge kuca jë lo hna majemin, ene la huuj ne ialoinekeun thatraqane la nöj, tune lo hnei Iehova hna ahnith.”

8 Ame hnei Arona hna canga tro kowe la ita ne huuj, me humuthe la neköi kau nyine huuj ne ngazo thatraqai angeic. 9 Nge hnene la itre nekö i angeic hna tro fë la madra, nge hnei Arona hna hnea la hene wanakoime i angeic ngöne la madra, matre köle hune la itre jian ne la ita ne huuj, me nenge pë hë la munëne madra fene la ita ne huuj. 10 Nge hnei angeic hna huhajin la igiris hune la ita ne huuj, me itre wene thulumat, memine la igiris ka heetrëne la idre nyine huuj ne ngazo, tune lo hnei Iehova hna ahnith koi Mose. 11 Nge hnei angeic pë hë hna dreuthetrij la ijön, memine la ikupeine öni tröne la lapa.

12 Ame hnei Arona hna humuthe la öni nyine huuj ne dreuth asë, nge hnene la itre nekö i Arona hna hamë angeice la madra, matre hnei angeic hna thathan* ngöne la nöjei götrane la ita ne huuj. 13 Thupene lai, hnei angatr hna hamë angeic la itre hnepe igötranene la huuj ne dreuth asë, memine la hen ej, matre hnei angeic hna huhajin itre ej hune la ita ne huuj. 14 Nge hnei angeic hna wasin hnei tim la itre ixelen ej, me itre wacan ej, nge hnei angeic hna huhajin itre ej ngöne la ita ne huuj, hune la itre huuj ne dreuth asë.

15 Ame hnei angeic hna tro fë la huuj ne la nöj, nge hnei angeic hna xom la nani trahmanyi nyine huuj ne ngazo ne la nöj, me humuth ej, me huujën ej thatraqane la ngazo, tune lo hna kuca kowe lo pane öni. 16 Nge hnei angeic hna tro fë la huuj ne dreuth asë, me kuca thenge la hna amekötin.

17 Thupene lai, hnei angeic hna tro fë la huuj ne wene feja: hnei angeic hna jeköthe* hnene la wanakoime i angeic la sine la huuj, me ce huhajin ej hune la ita ne huuj, memine la huuj ne dreuth asë hna kuca ha lo hmakany.

18 Ase jë hi lai, hnei Arona hna humuthe la kau, memine la mamoe trahmanyi ne la huuj ne tingeting thatraqane la nöj. Nge hnene la itre nekö i Arona hna hamë angeic la madra, ame hnei angeic hna thathan ngöne la nöjei götrane la ita ne huuj. 19 Nge ame la itre giris ne la kau, memine la igiris qa ngöne la pun ne la mamoe trahmany, memine la igiris ka heetrëne la trenge xel, memine la itre wene thulumat, memine la igiris ka heetrëne la idre, 20 hnei angatr hna amë asë la igiris hune la itre imano ne la itre öni. Thupene lai, hnei angeic hna huhajine itre ej hune la ita ne huuj. 21 Ngo ame pë hë la itre imano memine la inaean maca, ke hnei Arona hna jumejum nyine huuj ne jumejum qëmekei Iehova, tune lo hna ahnith hnei Mose.

22 Ame hnei Arona hna adraiëne la lue ime i angeic kowe la nöj, me amanathithi angatr. Nge thupene la angeic a ase huujëne la huuj ne ngazo, memine la huuj ne dreuth asë, me itre huuj ne tingeting, angeic a uti pi. 23 Nge hnei Mose me Arona hna ce tro kowe la itat ne icasikeu, me lö hmaca pi. Ame hnei nyidroti hna amanathithine la nöj.

Ame hna mama pi la lolo i Iehova kowe la nöj asë, 24 nge hna trotro la eë qaathei Iehova troa dreuthe la huuj ne dreuth asë, memine la itre igiris hune la ita ne huuj. Matre ame hë la kola öhne lai hnene la nöj, angatr a isuenyi jë, me sa iwatingöneca me thil.