Levitiko

2 “‘Maine tro la ketre atr a huujëne koi Iehova la itre wene feja, loi e tro angeic a huujëne la farin ka lolo; tro angeic a fii hnei oel, me atë la libanu* hun ej. 2 Thupene lai, tro angeic a tro fë kowe la itre atre huuj, ene la itre nekö i Arona. Nge tro la atre huuj a jeköth* hnei ca hnatrapaime la farin ka lolo me oel, memin asë la libanu. Nge tro angeic a huhajin ej hune la ita ne huuj, matre troa nyihatrene la huuj. Celë hi huuj ne eë ka pui loi* koi Iehova. 3 Thatraqai Arona me itre nekö i angeic pë hë la munëne huuj ne wene feja; celë hi ewekë ka nyipi hmitrötr, ke hna xom qa ngöne la itre huuj ne eë hna kuca koi Iehova.

4 “‘Maine tro eö a traqa fë la huuj ne wene feja hna san, loi e troa kuca hnei farin ka lolo. Troa kuca la falawa ka pë levenen hna nyi oelen, nge tro ej a tune la korona. Maine pena, troa kuca la areto ka pë levenen hna fii hnei oel.

5 “‘Maine tro eö a traqa fë la huuj ne wene feja hna atron ngöne la falaipen, loi e troa kuca hnei farin ka lolo ka pë levenen, nge hna nyi oelen. 6 Tro ha thupathupa la huuj, nge qa i ö troa fii hnei oel. Celë hi huuj ne wene feja.

7 “‘Maine tro eö a traqa fë la huuj ne wene feja hna atron ngöne iöl ka co, loi e troa kuca hnei farin ka lolo hna nyi oelen. 8 Nge tro eö a tro fë koi Iehova la huuj ne wene feja hna kuca hnene la itre ewekë cili, me hamën kowe la atre huuj, nge tro angeic a tro fë kowe la ita ne huuj. 9 Nge tro la atre huuj a xome la sine la huuj me huhajin hune la ita ne huuj, matre nyine nyihatrene la huuj asë. Celë hi huuj ne eë ka pui loi koi Iehova. 10 Nge thatraqai Arona me itre nekö i angeic pë hë la munëne huuj ne wene feja; celë hi ewekë ka nyipi hmitrötr, ke hna xome qa ngöne la itre huuj ne eë hna kuca koi I ehova.

11 “‘Tha tro pi kö a nyi levenen la itre huuje ne wene feja hnei epuni hna tro fë koi Iehova, ke tha tro kö epuni a huhajine* la falawa hna nyi levenen, maine miel pena, nyine huuj ne eë koi Iehova.

12 “‘Ijiji epuni hi troa huujëne koi Iehova la itre pane wen hnei epuni hna menuën, ngo tha tro kö a tro fë kowe la ita ne huuj nyine huuj ka pui loi.

13 “‘Ame la huuj ne wene feja hnei ö hna troa kuca, ke troa sotrën asë; loi e tro eö a thupën matre, tha tro kö a patre qa ngöne la huuj ne wene feja i ö, la sotr ne isisinyikeu ne la Akötresi ö. Nge troa huujën asë la itre huuje i ö, ce memine la sotr.

14 “‘Maine tro eö a tro fë koi Iehova la huuj ne wene feja, ene la itre pane wen hnei ö hna menuën,* loi e tro eö a tro fë la itre wene feja hna nyipi huj* nge hna dreudreuth, me itre wene feja hna nyipi huj nge hna amudromudron.* Celë hi huuj ne wene feja, ene la itre pane wen hnei ö hna menuën. 15 Nge tro eö a fii hnei oel, me atë la libanu hun ej. Celë hi huuj ne wene feja. 16 Nge tro la atre huuj a huhajin la sine la itre wene feja hna amudromudron, memine la oel, memin asë la libanu, matre nyine nyihatrene la huuj asë. Celë hi huuj ne eë koi Iehova.