Numera

2 Ame hnei Iehova hna ithanata koi Mose me Arona, me hape: 2 “Tro la angetre Isaraela a acili itat kowe la götrane hna amekötine kowe la köni tribu i angatr hna icasinekeun. Tro la itre trahmanyi a acili itat ezine la ketre ewekë* ka nyihatrene la lapa i angatr. Tro angatr a acili itat xötreithe la itat ne icasikeu, me qëmeke kow ej.

3 “Ame la itre ka troa lapa e koië, hmekune la hna fetra hnei jö, ke kolo itre atrene la köni tribu ne Iudra, thenge la itre lapa* i angatr; ame la tixe ne la itre nekö i Iudra, ke Nasona, nekö i Aminadaba. 4 Ala 74 600 thei angatre la itre hna siji ëjene troa soc. 5 Ezine la tribu ne Iudra, tro la tribu ne Isakara a acili itat; ame la tixe ne la itre nekö i Isakara, ke Nathaniela nekö i Zuara. 6 Ala 54 400 thei angatre la itre hna siji ëjene troa soc. 7 Ngöne la ketre götran, ke zi ne la tribu i Zebulona; ame la tixe ne la itre nekö i Zebulona, ke Eliaba nekö i Helona. 8 Ala 57 400 thei angatre la itre hna siji ëjene troa soc.

9 “Matre ame ngöne la lapa i Iudra, ke ala 186 400 la itre hna siji ëjene troa soc. Nge angatre hi la itre ka troa pane sa trengetreng me tro.

10 “Tro la köni tribu hna icasikeun ne Reubena a acili itat e kolojë; ame la tixe ne la itre nekö i Reubena, ke Elizura nekö i Sedeura. 11 Ala 46 500 thei angatre la itre hna siji ëjene troa soc. 12 Ezine la tribu ne Reubena, tro la tribu ne Simeona a acili itat; ame la tixe ne la itre nekö i Simeona, ke Selumiela nekö i Zurisadai. 13 Ala 59 300 thei angatre la itre hna siji ëjene troa soc. 14 Ngöne la ketre götrane, ke zi ne la tribu i Gada; ame la tixe ne la itre nekö i Gada, ke Eliasafa nekö i Reuela. 15 Ala 45 650 thei angatre la itre hna siji ëjene troa soc.

16 “Matre ame ngöne la lapa i Reubena, ala 151 450 la itre hna siji ëjene troa soc. Angatre hi la hnaaluene lapa ka troa sa trengetreng me tro.

17 “Maine troa mejë fë la itat ne icasikeu, tro la lapa ne la angetre Levi a ej e cahu nyipine la itre xaa lapa.

“Tro angatr a tro, thenge la hna amekötin göne la aqane troa acile la itre itate i angatr, ngöne la isa göhnë i angatr, me thenge la köni tribu i angatr hna icasinekeun.

18 “Tro la köni tribu hna icasikeun ne Eferaima a acili itat e kuë; ame la tixe ne la itre nekö i Eferaima, ke Elisama nekö i Amihuda. 19 Ala 40 500 thei angatre la itre hna siji ëjene troa soc. 20 Ngöne la ketre götran, ke zi ne la tribu i Manase; ame la tixe ne la itre nekö i Manase, ke Gamaliela nekö i Pedazura. 21 Ala 32 200 thei angatre la itre hna siji ëjene troa soc. 22 Ngöne la ketre götrane la tribu i Eferaima, ke zi ne la tribu i Beniamina; ame la tixe ne la itre nekö i Beniamina, ke Abidana nekö i Gideona. 23 Ala 35 400 thei angatre la itre hna siji ëjene troa soc.

24 “Matre ame ngöne la lapa i Eferaima, ala 108 100 la itre hna siji ëjene troa soc. Angatre hi la hnaakönine lapa ka troa sa trengetreng me tro.

25 “Tro la köni tribu hna icasinekeun* ne Dana a acil la itre itat i angatr e kolopi; ame la tixe ne la itre nekö i Dana, ke Ahiezera nekö i Amisadai. 26 Ala 62 700 thei angatre la itre hna siji ëjene troa soc. 27 Ezine la tribu i Dana, ke tro la tribu i Asera a acili itat; ame la tixe ne la itre nekö i Asera, ke Pagiela nekö i Okerana. 28 Ala 41 500 thei angatre la itre hna siji ëjene troa soc. 29 Ngöne la ketre götrane la tribu i Dana, ke zi ne la tribu i Nafatali; ame la tixe ne la itre nekö i Nafatali, ke Ahira nekö i Enan. 30 Ala 53 400 thei angatre la itre hna siji ëjene troa soc.

31 “Matre ame ngöne la lapa i Dana, ala 157 600 la itre hna siji ëjene troa soc. Angatre hi la itre ka thingi tro, thenge la köni tribu i angatr hna icasinekeun.”*

32 Hane hi la angetre Isaraela hna siji ëjen thenge la itre lapa i angatr; matre ame la etrune la itre trahmanyi hna siji ëjene troa soc, ke ala 603 550. 33 Ngo tune lo hnei Iehova hna amekötin koi Mose, tha hna ce e kö la angetre Levi memine la itre xaa atre Isaraela. 34 Hnene la angetre Isaraela hna kuca asë, thenge la hnei Iehova hna amekötin koi Mose. Matre ame la angatr a acili itat, angatr a kuca thenge la köni tribu i angatr hna icasinekeun. Nge ame la angatr a sa trengetreng me tro, angatre hi lai a mejë thenge la itre fami i angatr, me itre lapa i angatr.