Numera

7 Nge ngöne la ijine kola ase acile la uma maano hnei Mose me fii oelen, hnei angeic hna ahmitrötrën ej me itre ewekën ej asë, memine la ita ne huuj me itre ewekën ej asë. Nge thupene la angeic a ase fii hnei oel me ahmitrötrëne la itre ewekë celë, 2 hnene la itre tane i angetre Isaraela, itre tixene la itre lapa hna tro fë huuj. Nge hnene la itre tixene la itre tribu, lo hna upe troa sija la itre ëj, 3 hna tro fë la huuje i angatr koi Iehova, 6 lao ikatr hna heetrën, nge 12 lao kau, ca ikatr thatraqane la lue tan nge isa ca kau; thupene lai, hnei angatr hna tro fë itre ej qëmekene la uma maano. 4 Nge öni Iehova koi Mose: 5 “Kapa ju la itre ewekë celë qaathei angatr thatraqane la huliwa ne la itat ne icasikeu, nge tro eö a hamën itre ej kowe la angetre Levi, thenge la isa hnëqa i angatr.”

6 Ame hnei Mose hna kapa la itre ikatr me itre kau, me hamën itre ej kowe la angetre Levi. 7 Hnei angeic hna hamëne la lue ikatr me 4 lao kau kowe la itre nekö i Geresoma, thenge la itre hnëqa i angatr; 8 Hnei angeic hna hamëne la 4 lao ikatr me 8 lao kau kowe la itre nekö i Merari, thenge la itre hnëqa i angatr hna musinën hnei Ithamara, nekö i Arona atre huuj. 9 Ngo tha hnei angeice kö hna hamëne kowe la itre nekö i Kohatha, ke hnëqa i angatr troa huliwa ngöne la gaa hmitrötr, me xututhe la itre ewekë ka hmitrötr hune la itre hnaiape i angatr.

10 Nge hnene la itre tan hna tro fë huuj ngöne la drai ne ahmitrötrën la ita ne huuj, me fii oelen. Nge ame la itre tan a tro fë la huuje i angatr qëmekene la ita ne huuj, 11 öni Iehova koi Mose ka hape: “Hnëqa ne la itre tan troa tro fë la huuje i angatr göne la ita ne huuj hna ahmitrötrën, ngöne la drai hna isa ahnithe koi angatr.”

12 Ame la ka tro fë la huuje i angeic ngöne la pane drai, ke Nasona nekö i Aminadaba, qa ngöne la tribu i Iudra. 13 Hane hi la huuje i angeic: ca pala sileva ka 130 sekel* la ehacen, me ca kap sileva ka 70 sekel, thenge la sekel hna tuluth ngöne la götrane gaa hmitrötr.* Nge ka tiqa lue ej hnei farin ka lolo hna ce lomën me oel nyine huuj ne wene feja*; 14 me ca verë* gool ka 10 sekel la ehacen, nge ka tiqa hnei itre ewekë nyine dreu ka pui loi; 15 me ca neköi kau, me ca mamoe trahmany, me ca neköi mamoe trahmanyi ka ca macatre a utipië nyine huuj ne dreuth asë; 16 me ca neköi nani trahmanyi nyine huuj ne ngazo; 17 nge ame kowe la huuj ne tingeting,* ke lue kau, me 5 lao mamoe trahmany, me 5 lao nani trahmany, nge 5 lao neköi mamoe trahmany ka ca macatre. Celë hi huuje i Nasona nekö i Aminadaba.

18 Ngöne la hnaaluene drai, hnei Nathaniela nekö i Zuara, tixe i Isakara, hna tro fë la huuje i angeic. 19 Ame la huuje i angeic, ke ca pala sileva ka 130 sekel la ehacen, me ca kap sileva ka 70 sekel, thenge la sekel ngöne la götrane gaa hmitrötr. Nge ka tiqa lue ej hnei farin ka lolo hna ce lomën me oel nyine huujëne la huuj ne wene feja; 20 me ca verë gool ka 10 sekel la ehacen, nge ka tiqa hnei itre ewekë nyine dreu ka pui loi; 21 me ca neköi kau, me ca mamoe trahmany, me ca neköi mamoe trahmany ka ca macatre a utipië nyine huuj ne dreuth asë; 22 me ca neköi nani trahmany nyine huuj ne ngazo; 23 nge ame kowe la huuj ne tingeting, ke lue kau, me 5 lao mamoe trahmany, me 5 lao nani trahmany, nge 5 lao neköi mamoe trahmany ka ca macatre. Celë hi huuje i Nathaniela nekö i Zuara.

24 Ngöne la hnaakönine drai, hnene la tixe ne la itre nekö i Zebulona, Eliaba nekö i Helona, 25 hna tro fë la huuje i angeic: ca pala sileva ka 130 sekel la ehacen, me ca kap sileva ka 70 sekel, thenge la sekel ngöne la götrane gaa hmitrötr. Nge ka tiqa lue ej hnei farin ka lolo hna ce lomën me oel nyine huujën la huuj ne wene feja; 26 me ca verë gool ka 10 sekel la ehacen, nge ka tiqa hnei itre ewekë nyine dreu ka pui loi; 27 me ca neköi kau, me ca mamoe trahmany, me ca neköi mamoe trahmany ka ca macatre a utipië nyine huuj ne dreuth asë; 28 me ca neköi nani trahmany nyine huuj ne ngazo; 29 nge ame kowe la huuj ne tingeting, ke lue kau, me 5 lao mamoe trahmany, me 5 lao nani trahmany, nge 5 lao neköi mamoe trahmany ka ca macatre. Celë hi huuje i Eliaba nekö i Helona.

30 Ngöne la hna 4 ne drai, hnene la tixe ne la itre nekö i Reubena, Elizura nekö i Sedeura, 31 hna tro fë la huuje i angeic: ca pala sileva ka 130 sekel la ehacen, me ca kap sileva ka 70 sekel, thenge la sekel ngöne la götrane gaa hmitrötr. Nge ka tiqa lue ej hnei farin ka lolo hna ce lomën me oel, nyine huujëne la huuj ne wene feja; 32 me ca verë gool ka 10 sekel la ehacen, nge ka tiqa hnei itre ewekë nyine dreu ka pui loi; 33 me ca neköi kau, me ca mamoe trahmany, me ca neköi mamoe trahmany ka ca macatre a utipië nyine huuj ne dreuth asë; 34 me ca neköi nani trahmany nyine huuj ne ngazo; 35 nge ame kowe la huuj ne tingeting, ke lue kau, me 5 lao mamoe trahmany, me 5 lao nani trahmany, nge 5 lao neköi mamoe trahmany ka ca macatre. Celë hi huuje i Elizura nekö i Sedeura.

36 Ngöne la hna 5 ne drai, hnene la tixe ne la itre nekö i Simeona, Selumiela nekö i Zurisadai, 37 hna tro fë la huuje i angeic: ca pala sileva ka 130 sekel la ehacen, me ca kap sileva ka 70 sekel, thenge la sekel ngöne la götrane gaa hmitrötr. Nge ka tiqa lue ej hnei farin ka lolo hna ce lomën me oel nyine huujëne la huuj ne wene feja; 38 me ca verë gool ka 10 sekel la ehacen, nge ka tiqa hnei itre ewekë nyine dreu ka pui loi; 39 me ca neköi kau, me ca mamoe trahmany, me ca neköi mamoe trahmany ka ca macatre a utipië nyine huuj ne dreuth asë; 40 me ca neköi nani trahmany nyine huuj ne ngazo; 41 nge ame kowe la huuj ne tingeting, ke lue kau, me 5 lao mamoe trahmany, me 5 lao nani trahmany, nge 5 lao neköi mamoe trahmany ka ca macatre. Celë hi huuje i Selumiela nekö i Zurisadai.

42 Ngöne la hna 6 ne drai, hnene la tixe ne la itre nekö i Gada, Eliasafa nekö i Deuela, 43 hna tro fë la huuje i angeic: ca pala sileva ka 130 sekel la ehacen, me ca kap sileva ka 70 sekel, thenge la sekel ngöne la götrane gaa hmitrötr. Nge ka tiqa lue ej hnei farin ka lolo hna ce lomën me oel nyine huujëne la huuj ne la itre wene feja; 44 me ca verë gool ka 10 sekel la ehacen, nge ka tiqa hnei itre ewekë nyine dreuth ka pui loi; 45 me ca neköi kau, me ca mamoe trahmany, me ca neköi mamoe trahmany ka ca macatre a utipië nyine huuj ne dreuth asë; 46 me ca neköi nani trahmany nyine huuj ne ngazo; 47 nge ame kowe la huuj ne tingeting, ke lue kau, me 5 lao mamoe trahmany, me 5 lao nani trahmany, nge 5 lao neköi mamoe trahmany ka ca macatre. Celë hi huuje i Eliasafa nekö i Deuela.

48 Ngöne la hna 7 ne drai, hnene la tixe ne la itre nekö i Eferaima, Elisama nekö i Amihuda, 49 hna tro fë la huuje i angeic: ca pala sileva ka 130 sekel la ehacen, me ca kap sileva ka 70 sekel, thenge la sekel hna tuluth ngöne la götrane gaa hmitrötr. Nge ka tiqa lue ej hnei farin ka lolo hna ce lomën me oel nyine huujën la huuj ne wene feja; 50 me ca verë gool ka 10 sekel la ehacen, nge ka tiqa hnei itre ewekë nyine dreu ka pui loi; 51 me ca neköi kau, me ca mamoe trahmany, me ca neköi mamoe trahmany ka ca macatre a utipië nyine huuj ne dreuth asë; 52 me ca neköi nani trahmany nyine huuj ne la ngazo; 53 nge ame kowe la huuj ne tingeting, ke lue kau, 5 lao mamoe trahmany, 5 lao nani trahmany, nge 5 lao neköi mamoe trahmany ka ca macatre. Celë hi huuje i Elisama nekö i Amihuda.

54 Ngöne la hna 8 ne drai, hnene la tixe ne la itre nekö i Manase, Gamaliela nekö i Pedazura, 55 hna tro fë la huuje i angeic: ca pala sileva ka 130 sekel la ehacen, me ca kap sileva ka 70 sekel, thenge la sekel ngöne la götrane gaa hmitrötr. Nge ka tiqa lue ej hnei farin ka lolo hna ce lomën me oel nyine huujën la huuj ne wene feja; 56 me ca verë gool ka 10 sekel la ehacen, nge ka tiqa hnei itre ewekë nyine dreu ka pui loi; 57 me ca neköi kau, me ca mamoe trahmany, me ca neköi mamoe trahmany ka ca macatre a utipië nyine huuj ne dreuth asë; 58 me ca neköi nani trahmany nyine huuj ne ngazo; 59 nge ame kowe la huuj ne tingeting, ke lue kau, me 5 lao mamoe trahmany, me 5 lao nani trahmany, nge 5 lao neköi mamoe trahmany ka ca macatre. Celë hi huuje i Gamaliela nekö i Pedazura.

60 Ngöne la hna 9 ne drai, hnene la tixe ne la itre nekö i Beniamina, Abidana nekö i Gideona, 61 hna tro fë la huuje i angeic: ca pala sileva ka 130 sekel la ehacen, me ca kap sileva ka 70 sekel, thenge la sekel ngöne la götrane gaa hmitrötr. Nge ka tiqa lue ej hnei farin ka lolo hna ce lomën me oel nyine huujën la huuj ne wene feja; 62 me ca verë gool ka 10 sekel la ehacen, nge ka tiqa hnei itre ewekë nyine dreu ka pui loi; 63 me ca neköi kau, me ca mamoe trahmany, me ca neköi mamoe trahmany ka ca macatre a utipië nyine huuj ne dreuth asë; 64 me ca neköi nani trahmany nyine huuj ne ngazo; 65 nge ame kowe la huuj ne tingeting, ke lue kau, me 5 lao mamoe trahmany, me 5 lao nani trahmany, nge 5 lao neköi mamoe trahmany ka ca macatre. Celë hi huuje i Abidana nekö i Gideona.

66 Ngöne la hna 10 ne drai, hnene la tixe ne la itre nekö i Dana, Ahiezera nekö i Amisadai, 67 hna tro fë la huuje i angeic: ca pala sileva ka 130 sekel la ehacen, me ca kap sileva ka 70 sekel, thenge la sekel ngöne la götrane gaa hmitrötr. Nge ka tiqa lue ej hnei farin ka lolo hna ce lomën me oel nyine huujën la huuj ne wene feja; 68 me ca verë gool ka 10 sekel la ehacen, nge ka tiqa hnei itre ewekë nyine dreu ka pui loi; 69 me ca neköi kau, me ca mamoe trahmany, me ca neköi mamoe trahmany ka ca macatre a utipië nyine huuj ne dreuth asë; 70 me ca neköi nani trahmany nyine huuj ne ngazo; 71 nge ame kowe la huuj ne tingeting, ke lue kau, me 5 lao mamoe trahmany, me 5 lao nani trahmany, nge 5 lao neköi mamoe trahmany ka ca macatre. Celë hi huuje i Ahiezera nekö i Amisadai.

72 Ngöne la hna 11 ne drai, hnene la tixe ne la itre nekö i Asera, Pagiela nekö i Okerana, 73 hna tro fë la huuje i angeic: ca pala sileva ka 130 sekel la ehacen, me ca kap sileva ka 70 sekel, thenge la sekel ngöne la götrane gaa hmitrötr. Nge ka tiqa lue ej hnei farin ka lolo hna ce lomën me oel nyine huujën la huuj ne wene feja; 74 me ca verë gool ka 10 sekel la ehacen, nge ka tiqa hnei itre ewekë nyine dreu ka pui loi; 75 me ca neköi kau, me ca mamoe trahmany, me ca neköi mamoe trahmany ka ca macatre a utipië nyine huuj ne dreuth asë; 76 me ca neköi nani trahmany nyine huuj ne ngazo; 77 nge ame kowe la huuj ne tingeting, ke lue kau, me 5 lao mamoe trahmany, me 5 lao nani trahmany, nge 5 lao neköi mamoe trahmany ka ca macatre. Celë hi huuje i Pagiela nekö i Okerana.

78 Nge ngöne la hna 12 ne drai, hnene la tixe ne la itre nekö i Nafatali, Akira nekö i Enan, 79 hna tro fë la huuje i angeic: ca pala sileva ka 130 sekel la ehacen, me ca kap sileva ka 70 sekel, thenge la sekel ngöne la götrane gaa hmitrötr. Nge ka tiqa lue ej hnei farin ka lolo hna ce lomën me oel nyine huujën la huuj ne wene feja; 80 me ca verë gool ka 10 sekel la ehacen, nge ka tiqa hnei itre ewekë nyine dreu ka pui loi; 81 me ca neköi kau, me ca mamoe trahmany, me ca neköi mamoe trahmany ka ca macatre a utipië nyine huuj ne dreuth asë; 82 me ca neköi nani trahmany nyine huuj ne ngazo; 83 nge ame kowe la huuj ne tingeting, ke lue kau, me 5 lao mamoe trahmany, me 5 lao nani trahmany, nge 5 lao neköi mamoe trahmany ka ca macatre. Celë hi huuje i Akira nekö i Enan.

84 Hane hi la huuj hna kuca hnene la itre tixe i angetre Isaraela ngöne la drai ne ahmitrötrën la ita ne huuj, me fii ej: 12 lao pala sileva, 12 lao kap sileva, 12 lao verë gool 85 (isa 130 sekel la ehacene la itre pala sileva, nge isa 70 sekel la itre kap, nge ame la itre sileva ne la itre trengen asë, ke traqa koi 2 400 sekel, thenge la tulu ne sekel ngöne la götrane gaa hmitrötr; 86 nge ame la 12 lao verë gool ka tiqa hnei itre ewekë nyine dreu ka pui loi, ke isa 10 lao sekel, thenge la tulu ne sekel ngöne la götrane gaa hmitrötr, nge ame la gool ne la itre ver asë, ke traqa koi 120 sekel la ehacene itre ej); 87 ame kowe la huuj ne dreuth asë, ke traqa koi 12 lao kau, me 12 lao mamoe trahmany, me 12 lao neköi mamoe trahmany ka ca macatre, memine fe la itre huuj ne wene feja i angatr, me 12 lao neköi nani trahmany nyine huuj ne ngazo; 88 nge ame kowe la huuj ne tingeting, ke traqa koi 24 lao kau, me 60 lao mamoe trahmany, me 60 lao nani trahmany, nge 60 lao neköi mamoe trahmany ka ca macatre. Celë hi itre huuj ngöne la drai ne ahmitrötrëne la ita ne huuj, thupene la kola ase fii ej.

89 Ame la Mose a lö hnine la itat ne icasikeu troa ithanata me Akötresie,* hnei angeic hna dreng la ketre nine ithanata koi angeic qa hune la thingene la Pua Ne Anyipicin, akawane la lue kerubi; nge hnei Akötresie hna ithanata koi angeic.