Numera

28 Thupene lai, öni Iehova jë hi koi Mose: 2 “Qaja jë kowe la angetre Isaraela ka hape: ‘Qa i epuni troa thupën, matre tro pala hi a tro fë la huuje koi ni, memine la falawang, me itre huuj ne eë ka pui loi koi ni. Nge tro ha huujëne itre ej, ngöne la itre ijine hna sa.’

3 “Qaja jë fe koi angatre ka hape: ‘Hane hi la huuje ne eë nyine tro epuni a tro fë koi Iehova. Ame e nöjei drai, tro epuni a tro fë la lue neköi mamoe ka ca macatre, nge ka pë ethan, nyine huuj ne dreuth asë. 4 Tro eö a huujëne la ketre neköi mamoe e hmakany, me huujëne la ketre, ngöne la kola lö la jö,* 5 memine la huuj ne wene feja,* ene la ca omera ne farin ka lolo hna ce lomën me ca sine* hin ne oelë oliv hna tranetran. 6 Celë hi huuje ne dreuth asë nyine kuca lapaan hune la Wetre Sinai, ketre huuj ne eë lai ka pui lolo koi Iehova. 7 Nge troa ce huujëne memine la waina nyine fii huuj, ene la ca sine* hin ne waina thatraqane la isa ca neköi mamoe. Tro ha nenge la waina ngöne la götrane gaa hmitrötr, nyine waina nyine fii huuj thatraqai Iehova. 8 Nge ame hë la kola lö la jö,* troa huujëne la ketre neköi mamoe. Nge tune e hmakany, troa ce huujën memine la huuj ne wene feja, memine la waina nyine fii huuj. Tro ha huujën itre ej, nyine huuj ne eë ka pui lolo koi Iehova.

9 “‘Ngo ame la drai Sabath, troa huujëne la lue neköi mamoe ka ca macatre nge ka pë ethan, memine la huuj ne wene feja, ene la lue omera ne farin ka lolo hna ce lomën me oel, memine la waina nyine fii huuj ka ce tro memin. 10 Celë hi huuj ne dreuth asë ne Sabath, ka nyixane lo huuj ne dreuth asë nyine tro fë lapaan, memine lo waina nyine fii huuj ka ce tro memin.

11 “‘Nge e nöjei mekene treu, tro epuni a tro fë nyine huuj ne dreuth asë koi Iehova, la lue neköi kau, me ca mamoe trahmany, me 7 lao neköi mamoe ka pë ethan nge ka ca macatre. 12 Nge ame lo lue neköi kau, ke troa ce huujën memine la huuj ne wene feja, ene la köni omera ne farin ka lolo hna ce lomëne me oel. Nge ame kowe lo mamoe trahmany, ke troa ce huujën memine la huuje ne wene feja, ene la lue omera ne farin ka lolo, hna ce lomëne me oel. 13 Nge ame la itre neköi mamoe, ke troa ce huujën memine la ca omera ne farin ka lolo hna ce lomëne me oel. Celë hi huuje ne dreuth asë ka pui loi, ene la huuje ne eë koi Iehova. 14 Ame la itre waina nyine fii huuj, ke troa huujëne la ca sine* hin thatraqane la kau, me ca sine* hin thatraqane la mamoe trahmany, me ca sine* hin thatraqane la itre neköi mamoe. Celë hi huuje ne dreuth asë nyine tro fë e nöjei treu ne la macatre. 15 Tro fe a nyixane la huuj ne dreuth asë hna tro fë lapaan memine la waina nyine fii huuj, hnene la ca neköi nani hna huujëne koi Iehova, nyine huuj ne ngazo.

16 “‘Ngöne la hna 14 ne drai ne la pane treu, ke Paseka koi Iehova. 17 Nge ngöne la drai 15 ne la treu cili, ke tro ha hetre feet. Troa xeni la itre falawa ka pë levenen koi 7 lao drai. 18 Ngöne la pane drai, troa hetre ihë ka hmitrötr, nge tha tro kö epuni a kuca la ketre huliwa ka hace. 19 Qa i epuni pe troa tro fë la huuje ne eë koi Iehova, lo huuje ne dreuth asë, ene la lue neköi kau, me ca mamoe trahmany, me 7 lao neköi mamoe ka ca macatren. Tro epuni a huujëne la itre öni ka pë ethan. 20 Nge tro epuni a huujën itre ej cememine la itre huuje ne wene feja, ene la farin ka lolo hna ce lomën me oel: köni omera thatraqane la isa ca kau, nge lue omera thatraqane la mamoe trahmany. 21 Nge ca omera thatraqane la 7 lao neköi mamoe. 22 Nge tro fe a huujëne la ketre nani trahmanyi nyine huuj ne ngazo, matre troa nue la ngazo i epun. 23 Tro epuni a huujëne itre ej, nyine nyixane la huuje ne dreuth asë hna kuca e hmakany, ene la huuje ne dreuth asë hna kuca lapaan. 24 Ame ngöne la 7 lao drai, casi hi la aqane tro epuni a kuca, ene la tro epuni a huujën itre ej e nöjei drai, nyine xen.* Nge tro ej a huuje ne eë ka pui loi koi Iehova. Nge troa ce huujën itre ej, memine la huuje ne dreuth asë hna kuca lapaan, memine la waina nyine fii huuj ka ce tro memin. 25 Nge ame ngöne la hna 7 ne drai, troa hetre ihë ka hmitrötr, nge tha tro kö epuni a kuca la ketre huliwa ka hace.

26 “‘Ngöne la pane drai ne tro epuni a menuëne la itre pane wen, ngöne la ijine tro epuni a tro fë la itre huuj ne wene feja ka hnyipixe thatraqai Iehova, ngöne la feet ne la itre wiik, ke tro ha hetre ihë ka hmitrötr. Nge tha tro kö epuni a kuca la ketre huliwa ka hace. 27 Haawe tro epuni a tro fë nyine huuj ne dreuthe asë ka pui loi koi Iehova, la lue neköi kau, me ca mamoe trahmany, me 7 lao neköi mamoe ka ca macatren. 28 Nge ame kowe la itre huuj ne wene feja, ene la farin ka lolo hna ce lomën me oel, ke troa köni omera thatraqane la kau, me lue omera thatraqane la mamoe trahmany, 29 nge ca omera thatraqane la 7 lao neköi mamoe. 30 Nge tro fe a huujëne la ca neköi nani trahmany, nyine nue la ngazo i epun. 31 Qa i epun troa huujëne itre ej, nyine nyixane la itre huuje ne dreuth asë hna kuca lapaan, memine la huuj ne wene feja ka ce tro memin. Troa huujën la itre öni ka pë ethan, memine la waina nyine fii huuj ka ce tro memin.