Angetre Amekötin

18 Pë pala kö joxu e Isaraela ngöne la ijine cili, nge hnene la tribu i Dana hna thele hnë* lapa i angatr, ke tha ase pala kö thue götrane i angatr nyipine la itre tribu ne Isaraela.

2 Matre hnene la angetre Dana hna upe la 5 lao trahmanyi qa ngöne la tribu i angatr, troa tro juetrë me waipengöne la nöj; ame la itre atre cili, ke angatr a lapa e Zorea me Esetaol, nge itre ka atreine huliwa angatr. Hnene la angetre Dana hna upi angatr me hape: “Tro jë troa waipengön la nöj.” Matre ame hë la angatr a traqa ngöne la itre wetr e Eferaima, hnei angatr hna pane cil thei Mika, me meköl e cili. 3 Nge ame hë la angatr a easenyine la hnalapa i Mika, wangatrehmekune ju hi angatr la nin* ne la atre Levi. Matre hnei angatr hna tro troa wai angeic, me hnyingë angeic ka hape: “Drei la ka upi ö a tro ce? Eö a ue e celë? Nge nemen la ka alapa eö?” 4 Ame hnei angeic hna qejepengöne koi angatr la hnei Mika hna kuca koi angeic, me nyixane hmaca ka hape: “Hnei Mika hna nyithupei eni troa atre huuj koi nyidrë.” 5 Matre öni angatre jë hi: “Pane hnyingë Akötresieti jë ka hape, tro kö a tro loi la tronge hun.” 6 Nge sa jë hi la atre huuj ka hape: “Ce tro jë memine la tingeting, ke ce Iehova me epun.”

7 Ame hnei angatr hna xome hmaca la gojenyi angatr, me traqa e Laisi. E cili, hnei angatr hna öhne laka, pëkö ka mus kowe la itre atr tun e Zidona. Itre atr a mele tingeting, nge tha xou i angatre kö, ke pëkö atr ka iangazo nge ka thel troa thapa la nöje i angatr. Ketre, nanyi catr angatr qaathene la angetre Zidona, nge tha iatre kö angatr memine la itre xaa nöj.

8 Ame hë la kola bëek hnene lo 5 lao trahmany e Zorea me Esetaol, hnene la itre trejine me angatr hna hnying ka hape: “Nemene la hnei epuni hna öhn e cili?” 9 Öni angatre jë hi: “Cile jë matre tro sa lepi angatr, ke hne huni hna öhn laka, lolo catr la nöj. Ngo hnauëne la epuni a luelu? Canga tro jë troa thapa lai nöj. 10 E traqa ha epuni e cili, tro hë epuni a öhne laka, tha ka xoue atre kö angatr, nge ketre nöje ka tru, nge gaa hetrenyi asë. Ase hë Akötresieti nue la nöje cili kowe la ime i epun.”

11 Ame hnene la 600 lao trahmanyi ne Dana, hna isa ajö jia ne isi, me tro qa Zorea me Esetaol. 12 Hnei angatr hna elë me acil la lapa i angatr e Kiriatha-Iarim, ngöne la itre götran ne la tribu i Iudra. Celë hi matre hna hëne pala hi la götrane cili, Mahane-Dana.* Eje ngöne la götrane kuë ne Kiriatha-Iarim. 13 Thupene lai, hnei angatr hna tro kowe la itre wetr e Eferaima, me traqa kowe la hnalapa i Mika.

14 Matre hnene lo 5 lao trahmanyi ka waipengöne la nöje Laisi, hna qaja kowe la itre trejin me angatr ka hape: “Atre hi epun laka, hetre iefoda ngöne la uma celë, me itre neköi idrola ne hnalapa,* ca idrola hna tratraun, me ca idrola hna ahmun? Haawe, nga atre hë epun la nyine troa kuca.” 15 Ame hnei angatr hna pane cil e cili; nge hnene la 5 lao trahmanyi hna lö kowe la uma ne la atre Levi, lo hna acil ezine la hnalapa i Mika, troa hnyingë pengöi angeic. 16 Ngöne la ijine cili, kola itreqe ngöne la qene qëhnelö hnene la 600 lao trahmanyi ne Dana ka cile fë jia ne isi. 17 Nge hnene lo ala 5 hna lö hnine la uma, me xome la idrola hna tratraun, me iefoda, me itre neköi idrola ne hnalapa, memine la idrola hna ahmun. (Kola cil la atre huuj ngöne la qene qëhnelö memine la 600 lao trahmanyi ka cile fë jia ne isi.) 18 Hnei angatr hna lö hnine la uma i Mika me xome la idrola hna tratraun, me iefoda, me itre idrola ne hnalapa, memine la idrola hna ahmun. Matre önine la atre huuj ka hape: “Epuni a u?” 19 Nge sa jë hi angatr ka hape: “The ilu kö ngo trohemi pe, matre tro eö a nyi keme* hun, me atre huuj. Ke nemene la aja i ö, troa atre huuj kowe la ca atr me fami i angeic? Maine tro pena a atre huuj kowe la ketre tribu ne Isaraela, me itre fami ka nyimutre?” 20 Ame hnene la atre huuj hna kapa madrin la sipo i angatr. Matre hnei angeic hna ce tro me angatr, me xome trongëne la iefoda, me itre neköi idrola ne hnalapa, memine la idrola hna tratraun.

21 Ame hnei angatr hna tro hmaca pi, me upe la itre nekönatr troa tro pa, me itre öni, me itre ewekë ka tru thupen. 22 Nanyi hë angatr qa ngöne la hnalapa i Mika, nge kola ha itronyi hnene la itre trahmanyi ka lapa ezi Mika matre wej la angetre Dana. Ame hnei angatr hna easenyine la angetre Dana, 23 me sue. Nge hnene la angetre Dana hna xei, me hnyingë Mika ka hape: “Kola ue la? Hnauëne laka, epuni asë a ce uti koi hun?” 24 Matre sa jë hi Mika ka hape: “Hnei epun hna xome la itre haze hnenge hna kuca, memine lo atre huuj. Pë hnyawa ha ca ewekëng, nge epuni pena a hnyingë ni ka hape: ‘Kola ue la?’” 25 Ame hnene la angetre Dana hna sa koi angeic ka hape: “The ithanata kö tune lai, wanga elëhni jë la itre trahmany, nge tro angatr a humuthi epun me itre fami i epun.” 26 Matre hnene la angetre Dana hna xome hmaca la gojeny, ke trotrohnine hë Mika laka, ka catre kö angatr hui angeic. Ame hnei angeic hna bëeke hmaca kowe la hnalapa i angeic.

27 Thupene jë hi la angatr a xome la itre ewekë i Mika, memine lo atre huuj, hnene la angetre Dana hna tro e Laisi, lo nöj ka mele tingeting, nge ka tha xoue atr. Ame hnei angatr hna humuth la itre atr hnei taua, me dreuthetrije la traon. 28 Pëkö ka atreine xatuane la itre atrene la traon, ke nanyi catr angatr qaathene la angetre Zidona, nge tha ka iatre kö angatr memine la itre xaa nöj. Nge ame la traon, eje ngöne la hnathup i Bethe-Rehob,* matre hnene la angetre Dana hna xupe hmaca la traon me lapan ej. 29 Ketre, hnei angatr hna ati ëjene la traon, Dana, tune lo keme i angatr, lo nekö i Isaraela. Ngo ame pe, Laisi la pane ëjen lai traon ekö. 30 Thupene lai, hnene la angetre Dana hna acil thatraqai angatr lo idrola hna tratraun. Nge hnei Ionathana me itre matra i angeic, itre matra i Geresoma nekö i Mose, hna atre huuj kowe la tribu ne Dana. Hnei angatr hna xome la hnëqa cili, uti hë la kola kötre fë la itre atren la nöj. 31 Hnei angatr hna acil lo idrola hnei Mika hna iup troa tratraun, nge hnen ej hna lapa e cili ngöne la ijine kola cil la uma* ne la nyipi Akötresie e Silo.