Angetre Amekötin
20 Ame hnene la itre trahmanyi ne Isaraela hna traqa qa ngöne la nöjei götran, qaan e kolopi e Dana, uti hë e kolojë e Beresabe, me qa ngöne la nöje Gileada. Hnei angatr asë* hna traqa itronyi e Mizepa qëmekei Iehova. 2 Nge hnene fe la itre hene nöj, ene la itre tane la itre tribu ne Isaraela, hna icasikeu* memine la nöje i Akötresie: traqa koi 400 000 lao soc ka trongë ihnadro, nge ka cile fë taua.
3 Drenge hë la angetre Beniamina laka, hnene la itre trahmanyi ne Isaraela hna ce elë a tro Mizepa.
Thupene lai, hnene la itre trahmanyi ne Isaraela hna qaja ka hape: “Pane qejepengöne jë koi hun la ewekë ka traqa.” 4 Önine jë hi la atre Levi, lo föen la föe hna humuth ka hape: “Hnei nyio hna traqa e Gibea e Beniamina troa pane meköl e cili. 5 Ngo hnene la itre atre* Gibea hna traqa e jidr troa cile xötreith la uma, ke angatr a pi humuthi ni. Ame pe, hnei angatre hna angazone la föeng, matre meci hë nyën. 6 Hnenge pë hë hna xome la föeng, me thupathupa la ngönetrei i nyën, me iupi fë la isa ca hnep kowe la itre tribu* ne Isaraela, ke hnene la itre atre cili hna kuca la ewekë ka sis nge nyine hmahman e Isaraela. 7 Haawe ame enehila, eni a sipo epun itre trahmanyi ne Isaraela, troa isa hamë mekun me axecië mekun e celë.”
8 Ame hnene la itre trahmanyi ne Isaraela hna ce mejë me hape: “Pëkö ala casi thei eahun ka troa bëeke kowe la itate i angeic me kowe la hnalapa i angeic. 9 Hane hi la nyine tro sa kuca: Tro sa pane uthidrönegöti, matre mama jë ka hape, drei la ka tro troa të kowe la traon ne Gibea. 10 Nge qa ngöne la nöjei tribu ne Isaraela, tro huni a iëne la 10 lao trahmanyi qaathene la ala 100, me 100 qaathene la ala 1 000, nge 1 000 qaathene la ala 10 000. Nge tro huni a upi angatr troa hnëkë kemej kowe la trongene isi, matre tro la itre soc a tro Gibea e Beniamina me nyithupene kowe la itre atren la nöj, pine angatr kuca la ewekë ka sis e Isaraela.” 11 Ame hnene la itre trahmanyi ne Isaraela asë hna icasikeu, matre troa ce uti kowe la traon.
12 Nge hnene la itre tribu ne Isaraela hna upe la itre atr kowe la nöjei trahmanyi ne la tribu ne Beniamina troa hnying ka hape: “Nemene la ewekë ka traqa thei epun? 13 Traqa fë pi koi hun la itre atr ka iangazo e Gibea, matre tro huni a humuthi angatr, me apatrene qa Isaraela la ewekë ka sis.” Ngo xele kö la angetre Beniamina ma drenge la itre trejin me angatr qa Isaraela.
14 Thupene lai, hnene la angetre Beniamina hna tro qa ngöne la itre traone i angatr, me ce ut troa isi memine la angetre Isaraela e Gibea. 15 Ngöne la drai cili, hnene la angetre Beniamina hna hëne qa ngöne la itre traone i angatr, la 26 000 lao trahmanyi ka cile fë taua, matre troa nyixane la 700 lao soc qa Gibea. 16 Ngöne la trongene isi i angatr, traqa koi 700 lao soc ka sine wami. Ame la angatr a tha trehle, goi pë fe ca ewekë hnei angatr hna trian, uti fe hë la neköi pene he.
17 Ame pena la itre trahmanyi qa ngöne la itre xaa tribu ne Isaraela, ngo tha Beniamina kö, hnei angatr hna hëne la 400 000 lao trahmanyi ka cile fë taua, itre soc ka maca troa isi. 18 Matre hnei angatr hna elë a tro Bethela, troa hnying koi Akötresie ka hape: “Drei la ka troa tro pa troa isi me angetre Beniamina?” Sa jë hi Iehova ka hape: “Iudra la ka troa tro pa.”
19 Thupene lai, hnene la angetre Isaraela hna tro e hmakany, me acil la lapa ne soc i angatr ezin e Gibea.
20 Nge hnene la angetre Isaraela hna hnëkë troa isi memine la angetre Beniamina. Hnei angatr hna cile xötrë troa isi ezin e Gibea. 21 Ame hna tro la angetre Beniamina qa Gibea, me humuth la 22 000 lao atre Isaraela ngöne la drai cili. 22 Ngo hnene la trongene isi ne la angetre Isaraela hna cile catr. Nge tune lo pane drai, hnene hmaca kö la itre soc hna cile xötrë troa isi ngöne la götrane cili. 23 Ame hnene la angetre Isaraela hna elë a tro Bethela me treije koi Iehova uti hë hej, me hape koi Iehova: “Tro hmaca kö huni a tro troa isi memine la itre trejin me eahun qa Beniamina?” Sa jë hi Iehova ka hape: “Tro jë troa isi me angatr.”
24 Matre ame ngöne la hnaaluene drai, hnene la angetre Isaraela hna tro kowe la angetre Beniamina. 25 Nge hnene la angetre Beniamina hna tro qa Gibea matre isi me angatr ngöne la drai cili. Nge hnene la angetre Beniamina hna humuth la 18 000 lao atre Isaraela ka cile fë taua. 26 Matre hnene la itre trahmanyi ne Isaraela asë hna elë hmaca a tro Bethela, nge ngöne la drai cili, hnei angatr hna treij me lapa qëmekei Iehova, me tha xeni* uti hë e hej, me tro fë koi Iehova la itre huuj ne dreuth asë, me itre huuj ne tingeting.* 27 Thupene lai, hnene la angetre Isaraela hna hnyingëne la mekuna i Iehova, ke e cili hi la Pua Ne Isisinyikeu ne la nyipi Akötresie ngöne la ijine cili. 28 Nge Fineasa nekö i Eleazara, nekö i Arona, la ka huliwa qëmekene la Pua. Matre hnene la angetre Isaraela hna hnyingën ka hape: “Tro hmaca kö huni a tro troa isi memine la itre trejin me eahun qa Beniamina, maine waea?” Nge sa jë hi Iehova ka hape: “Tro jë troa isi me angatr, ke ame elany, tro hë ni a nue angatr koi epun.” 29 Matre hnene la angetre Isaraela hna upe la itre xaa trahmany troa zae xötreithe la traon ne Gibea.
30 Nge ame hë ngöne la hnaakönine drai, hnene la angetre Isaraela hna tro troa isi memine la angetre Beniamina. Nge tune pala hi lo, hnei angatr hna cile xötrë troa isi ezin e Gibea. 31 Matre ame hë la angetre Beniamina a tro qa ngöne la traon troa isi, hnene la trongene isi ne la angetre Isaraela hna ananyi angatr qa ngöne la traon. Nge tune pala hi lo, hnene la angetre Beniamina hna nyiqaane humuth la itre xaa soc ngöne la itre gojenyi ka tru, lo ka elë a tro Bethela, memine lo ka elë a tro Gibea. Matre traqa koi 30 lao soc ne Isaraela hnei angatr hna humuth ngöne la itre hlapa. 32 Nge önine la angetre Beniamina: “Tro hmaca kö së a lepi angatr.” Ngo önine pe la angetre Isaraela ka hape: “Tro sa kötr matre tro sa xom ananyi angatr qa ngöne la traon kowe la itre gojenyi ka tru.” 33 Matre hnene la angetre Isaraela hna trotrij la itre göhne i angatr, me cile xötrë troa isi e Baala-Tamara. Nge ame fe lo itre ka zae e Gibea, hnei angatr hna utraxulu qa ngöne la itre hnë zae i angatr. 34 Ame hnene la 10 000 lao soc ka maca qa Isaraela, hna traqa qëmekene e Gibea, nge catrehnine pi hë la isi. Ngo thatre pe la angetre Beniamina laka, luzi hë angatr.
35 Ngöne la drai cili, hnei Iehova hna nue la angetre Beniamina kowe la angetre Isaraela: traqa koi 25 100 lao atre Beniamina ka cile fë taua hna humuth.
36 Ame la angetre Beniamina a öhn laka, kola kötre angatr hnene la angetre Isaraela, hnei angatr hna mekune menun ka hape, tro hë angatr a ngaan la angetre Isaraela. Ngo angetre Isaraela pe a mejiun kowe la itre soce i angatr ka zae ezin e Gibea. 37 Matre hnene la itre soc ka zae hna canga mejë a tro Gibea. Thupene lai, hnei angatr hna isa ije ngöne la traon, me humuth asë hnei taua la itre atren.
38 Hnene la angetre Isaraela memine la itre soc ka zae xötreithe la traon hna ce axeciën la ketre hatren, ene la troa so eë ngöne la traon.
39 Matre ame hë la angatr a isi, ke hnene la angetre Isaraela hna kötrene la angetre Beniamina. Nge hnene la angetre Beniamina hna huzu angatr me humuth la ala 30 thei angatr, me hape: “Tro hmaca kö së a lepi angatr tune lo ketre ijin.” 40 Ngo mama pi hi lo hatren; ene la so ne eë ka elë qa ngöne la traon. Matre ame hë la kola xei hnene la angetre Beniamina, ke öhne ju hi angatr la eë ka manithe la traon. 41 Ame hnene la angetre Isaraela hna ujë kowe la angetre Beniamina, matre xou ju hi la angetre Beniamina, ke trotrohnine hë angatr laka, luzi hë angatr. 42 Qa ngöne lai, hnene la angetre Beniamina hna kötrene la angetre Isaraela, me tro kowe la hnapapa. Ngo angatre pala hi a isi, ke kola tro la itre trahmany qa ngöne la itre traon troa isi me angatr. 43 Matre hnene la angetre Isaraela hna cile xötreith la angetre Beniamina me huzu angatr. Nge hnei angatr hna lep la angetre Beniamina qëmeken e Gibea, ngöne la götrane koië. 44 Haawe, traqa koi 18 000 lao soc ne Beniamina ka mec, itre soc ka maca troa isi.
45 Matre hnene la angetre Beniamina hna bëeke hmaca, me kötr kowe la hnapapa hmekune la git e Rimona. Nge hnene la angetre Isaraela hna humuth la 5 000 lao atre Beniamina ngöne la itre gojenyi ka tru, me huzu angatr uti hë e Gidom. Qa ngöne lai, hnei angatr hmaca kö hna humuth la 2 000 lao atr. 46 Matre ngöne la drai cili, hna humuth la 25 000 lao atre Beniamina ka cile fë taua, itre soc ka maca troa isi. 47 Ngo mele pe kö la 600 lao soc ka kötr kowe la hnapapa troa zae ngöne la git e Rimona. Hnei angatr hna lapa e cili koi 4 lao treu. 48 Nge hnene la angetre Isaraela hna bëeke hmaca troa lepe la angetre Beniamina. Matre ame ngöne la itre traon, hnei angatr hna humuth la itre atr, me itre öni, me nöjei ewekë ka mele pe. Ketre, hnei angatr hna manith asë la nöjei traon hnei angatr hna öhn e cahu gojeny.