Rutha

3 Ngöne la ketre drai, öni Naomi kowe la tresi eahlo ka hape: “Neköng, ijine hë tro ni a thele uma* i eö, matre madrine jë eö. 2 Ketre sinee së lae Boaza. Nge hnei eö lo a ce huliwa memine la itre jajiny ka huliwa koi nyidrë. Nge enehila hej, nyidrëti a nyihnyawane la itre wene bali ngöne la hnë lepe qitr. 3 Haawe, pane sie jë, nge köle oele jë ka pui lolo, nge heetre* hnyawa jë. Thupene lai, uti pi kowe la hna lepe qitr. Nge the iamamanyi kö uti hë ase jë nyidrëti xeni me ij. 4 Nge e meköle hë nyidrë, wange hnyawa ju la göhnë, nge tro jë troa adraiën la isitr hmekune la lue ca i nyidrë, nge meköle ju ezin. Nge tro hë nyidrëti a qaja koi eö la nyine kuca.”

5 Öni Rutha jë hi: “Tro hë ni a kuca asë la hnei eapo hna qaja.” 6 Haawe, angeic a uti pi kowe la hna lepe qitr, me kuca asë la hna qaja hnene la treetre i angeic. 7 Ngöne la ijine cili, Boaza a xeni me ij, nge madrine catre nyidrë. Nyidrëti a tro ju troa meköl ezine la ketre ita bali. Matre Rutha a canga tro juetrë ju koi Boaza, me hule la iheetr ngöne la lue ca i nyidrë. Nge angeic a meköle ju fene la lue ca i Boaza. 8 Nge e minui, hnei Boaza hna nyiqaane xuxuhnötr. Matre nyidrëti a thili ju, nge öhne ju hi nyidrë la ketre föe ka meköl fene la lue ca i nyidrë. 9 Öni Boaza jë hi: “Drei la?” Sa jë hi angeic ka hape: “Eni Rutha, lo hlue i nyipë. Thupëne* ju la hlue i nyipë, ke atre itö hnane* nyipë.” 10 Öni Boaza jë hi: “Epi tro Iehova a amanathithi eö neköng. Mama hnyawa ha enehila la ihnimi nyipici eö hune lo xötrei, ke tha hnei eö kö hna thele la itre nekö trahmany, ka pë ewekë maine ka trene mani. 11 Ngo enehila neköng, the xou kö, ke tro ni a kuca asë la hnei eö hna qaja. Atre hi la traon* asë ka hape, föe ka nyipi lolo eö. 12 Ngo maine nyipici laka, atre itö hnane ni, ngo hetre ketre trahmanyi kö ka ijije troa itö hnan, ke angeic la sipu fami ne la föi eö. 13 Lapa ju e celë la hej, nge elanyi e hmakany, e tro ketre a itö eö, ka loi! Nue angeice pi troa itö eö. Ngo e xele kö angeic ma itö eö, qëmeke i Iehova eni a sisiny, tro kö ni a itö eö. Ngo pane meköle ju kö eö e celë uti hë e hmakany.”

14 Ame hnei Rutha hna meköl fene la lue ca i nyidrë, uti hë e hmakany sine jidr. Ngo hnei angeic hna canga ihlë wanga öhnyi angeice jë. Nge öni Boaza koi angeic: “Tha tro kö a atre ka hape, hetre föe ka qa la ngöne la hnë lepe qitr.” 15 Öni Boaza hmaca: “Xome jë la iheetre ka qea i eö, nge seluthe pi.” Angeic a seluthe pi, nge Boaza a nenge pi kowe la iheetre la 6 lao tulu* ne bali. Thupene lai, Boaza a hleme jë la iheetr me atë hui Rutha. Nge nyidrëti a bëeke jë kowe la traon.

16 Rutha a tro ju kowe la treetre i angeic. Nge öni Naomi: “Tune kaa eö neköng?”* Angeic a qaja asë jë la hna kuca hnei Boaza koi angeic. 17 Öni Rutha hmaca ka hape: “Hnei nyidrëti hna hamë ni la 6 lao tulu bali, nge öni nyidrë: ‘The bëeke kö koi treetre i eö nge pëkö hna xom.’” 18 Öni Naomi jë hi: “Lapa ju kö e celë neköng, uti hë la tro eö a atre la ka troa traqa. Ke ngöne ju kö la drai celë, tro la trahmany cili a isine troa axecië mekun.”