Pane Tus Samuela
3 Ame ngöne la ijine cili, thöthi petre kö Samuela, nge nyën a huliwa koi Iehova. Nge Eli hi la ka elemekene la huliwa. Ngöne la itre drai cili, xalaithe hi la itre atr hnei Iehova hna ithanata kow, me iamamanyi kow.
2 Hane hi la ewekë ka traqa ngöne la ketre drai. Eli a meköle ngöne la göhne i nyidrë. Ngo tha öhne hnyawa ha nyidrë, ke hajihaji hë la luemeke i nyidrë. 3 Tha pi pala kö la laame cile i Akötresie, nge Samuela ha meköle hnine la uma ne hmi* i Iehova, hmekune lo hnë amë la Pua Ne Isisinyikeu. 4 Nge Iehova a hë Samuela jë, matre öni Samuela: “Eni hi la.” 5 Nyenyape pi hi nyën koi Eli me hape: “Nyipëti la ka hë ni? Eni hi la.” Öni Eli jë hi: “Waea! Tha eni kö la ka hë hmunë. Tro hmaca jë hmunë a meköl.” Nyën a tro hmaca ju troa meköl. 6 Iehova a hë nyën hmaca jë me hape: “Samuela!” Mejë jë hi Samuela a tro koi Eli me hape: “Nyipëti la ka hë ni? Eni hi la.” Ngo öni Eli: “Waea! Tha eni kö la ka hë hmunë neköng. Tro hmaca jë hmunë a meköl.” 7 (Thatre Iehova hnyawa kö hnei Samuela, nge Iehova a xötrei ithanata koi nyën.) 8 Matre, hnei Iehova hmaca hna hë Samuela, öni nyidrë: “Samuela!” Mejë jë hi Samuela a tro koi Eli me hape: “Nyipëti la ka hë ni? Eni hi la.”
Trotrohnine ju hi Eli ka hape, Iehova la ka hë Samuela. 9 Matre, öni Eli koi nyën: “Tro jë hmunë a meköl, nge e hë hmunë hmaca jë, tro hmunë a hape: ‘Iehova, ithanata jë, hlue i nyipëti a drei nyipë.’ Matre nyën a tro ju troa meköl.
10 Thupene lai, hnei Iehova hmaca hna hë Samuela, me hape: “Samuela, Samuela!” Sa jë hi nyëne ka hape: “Ithanata jë, hlue i nyipëti a drei nyipë.” 11 Öni Iehova jë hi: “Dreng! Tro ni a kuca la ketre ewekë e Isaraela, nge troa sesëkötr* hnei itre ka drei mejen. 12 Ngöne la drai cili, tro ni a eatrën asë la hnenge hna qaja göi Eli me fami angeic, qaane ju hi la qaan uti hë la pun. 13 Tro hmunë a qaja koi Eli ka hape, öning, tro hë ni a ejine paluane la fami angeic, pine la aqane ujë ne la lue nekö i angeic. Atre hnyawa hi angeic ka hape, nyidroti a ahmahmanyi Akötresie, ngo tha wesitrë nyidroti kö. 14 Ke ase hë ni qaja xeciën koi Eli me fami angeic laka, maine tro ju hë angatr a huujën la itre öni me itre xa huuj, ngo pëkö huuj ka ijij troa apatren la ngazo i angatr.”
15 Nge Samuela a meköle ju uti hë e hmakany. Thupene lai, nyën a fe pi la itre qëhnelö ne la uma i Iehova, ngo nyën a xou ma qaja koi Eli la hnei nyën hna meköle goeën. 16 Nge Eli a hë Samuela jë me hape: “Samuela neköng!” Öni Samuela: “Eni hi la.” 17 Öni Eli jë hi: “Nemene la maca i nyidrë koi hmunë? Eni a sipo hmunë, the juetrëne kö koi ni. Tro Akötresie a të koi hmunë, e traqa hmunë juetrën la ketre ewekë koi ni.” 18 Matre Samuela a qaja asë jë koi Eli. Nge öni Eli jë hi: “Iehova hi lai. Epi tro nyidrëti a kuca la ka loi koi nyidrë.”
19 Samuela pala hi a tru trootro, nge ce Iehova pala hi me nyën. Ketre, tha gufa kö la itre trengewekë* i Samuela. 20 Nge hna atre asë e Isaraela, qaane ju hi e Dana uti hë Bereseba laka, hna ië Samuela troa perofeta i Iehova. 21 Nge Iehova pala hi a iamamanyi e Silo. E cili hi la hnei Iehova hna mama koi Samuela, me ithanata koi nyën.