Pane Tus Samuela
6 Hnene la Pua i Iehova hna pane lapa koi 7 lao treu ngöne la zi i angetre Filisiti. 2 Matre hnene pë hë la angetre Filisiti hna hëne la itre atre huuj, me itre ka qajaqaja la drai elany. Nge angatr a hnyinge jë ka hape: “Tro huni a uëne la Pua i Iehova? Pane qaja jë koi huni la aqane troa bëeke fë kowe la sipu göhnen.” 3 Öni angatre jë hi: “Maine epun a mekune troa bëeke fë la Pua ne Isisinyikeu i Iehova, Akötresi Isaraela, the bëeke fë kö e pëkö huuje i epun. Nyipiewekë tro epun a bëeke fë memine la ketre huuj, matre nue pi la ngazo i epun. Nge tro hi epun a egöcatr e tro epun a kuca lai, nge tro fe hë epun a atre la kepin matre nyidrëti a ujë tun koi epun.” 4 Matre öni angetre Filisiti: “Tro huni a huujë nemen matre nue pi nyidrëti la ngazo hun?” Sa jë hi angatre ka hape: “Casi hi la ngazo ka lepi epun, epun me itre joxu i epun. Matre thenge la etrune la itre joxu ne Filisiti, tro fë jë la 5 lao fini kakötre* gool, me 5 lao neköi aji gool. 5 Kuca jë la itre fini kakötr me neköi aji, ke lue ewekë lai ka lepe la nöje i epun. Nge atrune jë la Akötresi Isaraela, matre maine jë, tha tro hmaca kö nyidrë a akötrë epun, memine la haze i epun, me nöje i epun. 6 Epun a axetine fë nemene la itre hni epun, tune lo aqane kuca i Aigupito me Farao? Hnei Akötresieti lo hna lep angazo angatr, matre hnei angatre hna nue pi la angetre Isaraela. 7 Enehila, hnëkëne jë la ketre ikatr ka hnyipixe, me lue ithinen ne kau, nge tha hna ati nyine isilikeun petre kö. Hnöthi nyidroti jë kowe la ikatr, nge bëeke fë jë pe la itre neköi kau kowe la uma i öni. 8 Thupene lai, xome jë la Pua i Iehova, nge atë jë hune ikatr. Atë jë ezin la ketre neköi pua, nge nyialiene jë hnene la itre ewekë gool, hnei epun hna tro fë nyine qeje menu. Ase jë hi, iupi fë pi la Pua, 9 nge goeëne ju la ka traqa. E tro ej a elë kowe la zin ej, me tro kowe la gojenyi ne Bethe-Semes, haawe, atre hë epun laka, Akötresi angatr la ka lepi së. Ngo e tha celë kö la ka traqa kolo lai a hape, tha nyidrëti kö la ka lepi së, nge ka xulu xane lai hulö.”
10 Angetre Filisiti a trongëne jë la hna qaja. Angatr a xome pi la lue ithinen ne kau, me hnöthe kowe la ikatr. Nge angatr a umëne jë pe la itre neköi kau hnine la uma i öni. 11 Thupene lai, angatr a atë jë la Pua i Iehova hune la ikatr, memine la neköi kes ka qatrenge la itre neköi aji gool, me itre fini kakötre gool. 12 Ame hnene la lue kau föe hna tro meköt kowe la gojenyi ne tro Bethe-Semes, nge tha jea pi kö nyidro. Tha jea kö nyidro kowe la götrane maca, me götrane mi, nge nyidroti a ho trootro. Nge ame la itre joxu ne Filisiti, angatr a ixötrethenge uti hë la ifego ne Bethe-Semes. 13 Nge e cili, itre atr a menuë qitr ngöne la itre hlapa.* Matre ame hë la angatr a mejë me öhne la Pua, angatr a madrin. 14 Nge hnene la Pua hna lö hnine la hlapa i Iosua qa Bethe-Semes, nge ej a cile ju e cili, ezine la ketre etë atraqatr. Nge hnene la itre atr hna thë la ikatr troa athi eë, me huujëne la lue kau föe koi Iehova.
15 Ame hnene la itre atre Levi hna autine la Pua i Iehova, memine la neköi pua ka qatrenge la itre ewekë gool. Angatr a atë asë jë hune la ietë atraqatr. Nge ngöne la drai cili, hnene la itre trahmany ne Bethe-Semes hna tro fë la itre huuj ne dreuth asë, me itre xa huuj koi Iehova.
16 Nge ame ju hi la kola öhne lai hnei itre joxu i angetre Filisiti, bëeke hmaca ju kö angatr ngöne la drai cili a tro Ekerona. 17 Nge ame lo itre kakötre gool ne qeje menu, lo hna iupi fë hnei angetre Filisiti koi Iehova, itre ej a nyihatrene la itre traon: Casi koi Asedoda, nge casi koi Gaza, nge casi koi Asekelona, nge casi koi Gatha, nge casi koi Ekerona. 18 Nge ame la etrune la itre neköi aji gool, tre etrune la itre traon ne Filisiti hna musi kow hnene la faifi lao joxu. Kola qaja la itre traon hna eköhagen, me itre neköi tribu e trön.
Nge ame lo ietë hnine la hlapa i Iosua ne Bethe-Semes, lo hna atë la Pua i Iehova, eje pala hi a amekunëne la ijine cili. 19 Ngo hnei Akötresie hna humuthe la itre trahmanyi ne Bethe-Semes, ke hnei angatr hna goeëne la Pua i Iehova. Ala 50 070* la itre trahmanyi hna humuth, matre hnene la nöj hna hnëmec, ke ala nyimu la itre hna humuth hnei Iehova. 20 Matre önine jë hi la itre trahmanyi ne Bethe-Semes: “Drei la ka atreine cil qëmeke i Iehova, Akötresie ka hmitrötr? Ka loi e tro nyidrëti a mejë qa la, me tro pena koi itre xan!” 21 Matre angatr a iupi fë maca kowe la itre atr ne Kiriatha-Iarim, me hape: “Hnei angetre Filisiti hna bëeke fë la Pua i Iehova. Uti pi, nge xome jë epun.”