Levitiko
21 Öni Iehova hmaca jë hi koi Mose: “Hape jë kowe la itre atre huuj ene la itre nekö i Arona: ‘Tha tro kö la ketre e epun a pui ngazo pine la ketre atr ka mec ngöne la nöj. 2 Ngo ijiji angeice hi troa pui ngazo e tro la sipu sinee i angeic a mec: ene la thine i angeic, me keme i angeic, me nekö i angeic trahmanyi maine jajiny, me trejin me angeic; 3 ijiji angeice fe troa pui ngazo hnene la sipu xa i angeic hnei angeic hna epe kow, e tha ka ce meköl pala kö me trahmany, nge tha ka faipoipo pala kö. 4 Tha tro kö angeic a pui ngazo hnene la föe ne la ketre trahmany ngöne la nöje i angeic. 5 Tha tro kö la itre atre huuj a cin apan la he i angatr, me itre xötre ezine la itre ienaje i angatr, me thupathupa la ngönetrei i angatr. 6 Tro hë angatr a hmitrötr kowe la Akötresi angatr, nge tha tro kö angatr a pë metrötr kowe la ëjene la Akötresi angatr, ke angatr a huujëne la itre huuj ne eë thatraqai Iehova, ene la falawa* kowe la Akötresi angatr, nge tro angatr a hmitrötr. 7 Tha tro kö angatr a faipoipo memine la ketre föe ne gojeny, maine ketre föe hna apuingazon, maine ketre föe ka sei hna cil pena, ke qa ne la atre huuj troa hmitrötr kowe la Akötresi angeic. 8 Qa i ö troa ahmitrötrë angeic, ke angeic la ka tro fë falawa kowe la Akötresi ö, nge tro hë angeic a hmitrötr thatraqai ö, ke ame ni Iehova atre ahmitrötrë epun, ka hmitrötre ni.
9 “‘Maine tro la nekö ne la atre huuje jajiny a nyi föe ne gojeny, angeice hi lai a ahmahmanyi angeic memine la keme i angeic, nge tro ha dreuthetriji angeice hnei eë.
10 “‘Ame la atre huuj ka sisitria thene la itre trejine me angeic, lo hna siëne la he hnei oel nyine iën, nge hna acil ngöne la hnëqa i angeic, matre troa heetrën la itre iheetr ne atre huuj, tro angeic a nyidrawane la ipene he i angeic, nge tha tro kö a kuie zezen la itre iheetr. 11 Tha tro kö angeic a easenyine la ka mec, me apuingazonyi angeice kö ngacama keme i angeice ju hë, maine thine i angeic. 12 Tha tro kö angeic a tro qa ngöne la uma maano, me tha metrötrëne la uma maano ne la Akötresi angeic, ke thei angeic la hatren ka hmitrötr, memine la oel nyine iën ne la Akötresi angeic, Iehova ni.
13 “‘Tro angeic a xome la ketre jajinyi* nyine föi angeic. 14 Tha tro kö angeic a xome la ketre sine föe, maine ketre föe ka sei hna cil, maine ketre föe hna apuingazon, maine ketre föe ne gojenyi pena. Ngo tro pe angeic a xom qa ngöne la nöje i angeic, la ketre jajinyi* nyine föi angeic. 15 Tha tro kö angeic a adrone la itre matra i angeice nyipine la nöje i angeic, ke Iehova ni, atre ahmitrötrë angeic.’”
16 Öni Iehova hmaca jë hi koi Mose: 17 “Hape jë koi Arona: ‘Ame ngöne la nöjei matra i ö, tha tro kö la ketre trahmanyi ka hetre ethan, a tro fë xen kowe la Akötresi angeic. 18 Tha tro kö la ketre trahmanyi ka hetre ethane la ngönetrei, a easenyine la ita ne huuj: ene la ka timek, maine ka peje ca, maine ka eatre hnafij, maine ka qea ca maine ka qea im, 19 maine ka xecie ca, maine ka xecie im, 20 maine ka qali ju, maine ka hopatr,* maine ka hetre mec ngöne la luemek, maine ka xoxo itrei, maine ka ixelek, maine ketre trahmanyi ka eatre la ekön. 21 Tha tro kö la ketre matra i Arona ka hetre ethane la ngönetrei, a tro fë la itre huuje ne eë koi Iehova. Pine laka, ka hetre ethane la ngönetrei i angeic, tha tro kö angeic a tro fë falawa kowe la Akötresi angeic. 22 Ngo ijiji angeice hi troa xeni la falawa ne la Akötresi angeic, ene la itre ewekë ka nyipi hmitrötr, me itre ewekë ka hmitrötr. 23 Ame pe, tha tro kö angeic a easenyine la imaano ne thewe hnahag, memine la ita ne huuj, ke hetre ethane la ngönetrei i angeic; tha tro kö angeic a adrone la uma maanong, ke Iehova ni, atre ahmitrötrë angatr.
24 Ame hnei Mose hna ithanata koi Arona me itre nekö i angeic, memine la nöje Isaraela asë.