Hnaaluene Tus i Samuela
21 Ngöne la ijine Dravita a joxu, hna traqa la ketre jiin kowe la nöj, matre köni macatre ne jiinë xen. Dravita a hnyinge jë koi Iehova, matre öni Iehova: “Ke zö i Saulo me fami i angeic. Hnei Saulo hna humuthi angetre Gibeona.” 2 Ame hnei joxu hna hë angetre Gibeona troa ithanata me angatr. (Tha angetre Isaraela kö la angetre Gibeona, ngo angetre Amona ka mele pe. Hnei angetre Isaraela hna sisinyi ekö ka hape, tha tro kö a humuthi angatr. Ngo hnei Saulo hna thele troa apatrenyi angatr, ke sasaithi tulu pala ha la aqane isigölin angeic la angetre Isaraela, me Iudra.) 3 Matre öni Dravita koi angetre Gibeona: “Tro ni a kuci nemen koi epun matre patre pi la ngazo celë, nge matre sipone jë epuni tro Iehova a amanathithine hmaca la nöje i nyidrë?” 4 Öni angetre Gibeona jë hi: “Tha eahuni kö a sipo sileva me gool, matre nyihnane la hnei Saulo me fami i angeic hna kuca koi hun. Nge thatreine kö huni troa humuthe la ketre atr e Isaraela.” Matre öni Dravita: “Tro ni a kuca asë la hnei epuni hna sipon.” 5 Ame hnei angatre hna sa ka hape: “Ame lo atre ka thele troa humuthi hun, me apatrenyi hun qa Isaraela, 6 ke traqa fë pi koi huni la 7 lao matra i angeic. Nge tro huni a athipe* la itre ngönetrei angatr ka mec, hune la itre sine feni qëmeke i Iehova. Tro huni a kuca lai e Gibea, lo traon i Saulo, lo atr hna iën hnei Iehova.” Nge öni joxu jë hi: “Tro ni a traqa sai angatr koi epun.”
7 Ngo joxu a utipi Mefiboseth, lo nekö i Ionathana me api i Saulo, ke hnei Ionathana lo me Dravita, lue treme sineen, hna isisinyikeu qëmeke i Iehova. 8 Ame hnei joxu hna xomi Aremoni me Mefiboseth, lo lue nekö i Rizepa, lo nekö i Aia jajiny. Hnei eahlo hna ce hnaho me Saulo. Nge joxu a xome ju fe la faifi lao nekö i Mikala,* lo nekö i Saulo jajiny, lo hnei angeic hna hamëne koi Aderiela, nekö i Bazilai, atre Mehola. 9 Dravita a nue angatre pi koi angetre Gibeona, nge angetre Gibeona a athipe ju la itre ngönetrei angatr ka mec, hune la itre sine feni hna acil ngöne la wetr qëmeke i Iehova. Hna ce humuthe la ala 7, nge hna humuthi angatr ngöne la pane drai ne menu, hmekune lo kola menuë bali. 10 Nge Rizepa nekö i Aia a xome ju la itre ibëek ka tru thenyin, me saath hune la ietë atraqatr, qaane lo kola nyiqaane menu, uti hë la kola maniëne la itre ngönetrei. Eahlo pala hi a sengöne la itre waco, matre tha tro kö a të hune la itre ngönetrei e lai, me sawa la itre öni wael troa easenyin e jidr.
11 Nge drenge ju hi Dravita la hna kuca hnei Rizepa, nekö i Aia, ketre föi Saulo. 12 Ame hnei Dravita hna tro Iabesi-Gileada, troa sipone la trapa june i Saulo, me Ionathana nekö i nyidrë. Ke ame lo angetre Filisiti a humuthi Saulo e Gileboa, hnene la itre joxu* cili hna kötre fë la ngönetrei i Saulo me Ionathana, ngöne la hnamaketr e Bethe-San, lo hna athipi nyidro hnei angetre Filisiti. 13 Dravita a xome ju la trapa june i Saulo, me Ionathana nekö i nyidrë. Me xome fe la itrapa jun ne lo ala 7 hna humuth.* 14 Thupene lai, hna keleme la itre june i Saulo me Ionathana nekö i nyidrë, ngöne la zi angetre Beniamina e Zela, hnine la hua i Kiso keme i Saulo. Hna kuca asë la hnei Dravita joxu hna amekötin, nge thupene lai, Akötresieti a drenge ju la itre thith thatraqane la nöj.
15 Ame hna isi hmaca hnei angetre Isaraela me angetre Filisiti. Matre Dravita me itre soce i nyidrë a tro ju troa isi me angetre Filisiti, ngo kucakuca ju hi Dravita. 16 Nge hnene la ketre atre Filisiti hna thele troa humuthi Dravita, ene Isebi-Benobe, ketre matra i angetre Refai. Ame la ehacene la jo kopa i angeic, ke 300 sekel,* nge hetre taua i angeice fe ka hnyipixe. 17 Eloine pe, hnei Abisai nekö i Zeruia hna canga traqa troa xatua Dravita, me humuthe lai atre Filisiti. Qa ngöne lai, hnene la itre atre i Dravita hna catre fë koi nyidrë ka hape: “Tha tro hmaca kö nyipë a ce isi me eahun! Tha tro kö nyipëti a apine la laame cil e Isaraela!”
18 E thupen, hna isi hmaca me angetre Filisiti e Gob. E cili hi lo hnei Sebekai, atre Husa hna humuthi Saf, ketre matra i angetre Refai.
19 Ngöne la itre xa isi me angetre Filisiti e Gob, hnei Eleanana, nekö i Iaare-Oregim, hna humuthi Goliatha atre Gatha. Ame la eisaisane la tane jo ne la atre Filisiti celë, ke ka tune la inehe ne sili maano.
20 Nge hna isi hmaca e Gatha, lo traon ne la ketre matran atr, 6 lao hene wanakoim ngöne la lue ime i angeic, nge 6 lao he ne wanakoca ngöne la lue ca i angeic, matre 24 la etrun. Angeice hi la ketre matra i angetre Refai. 21 Angeice pala hi a thele isi me angetre Isaraela, matre hnei Ionathana, nekö i Simei, mama i Dravita, hna humuthi angeic.
22 Ame la 4 lao atre cili, ke angatre la itre matra i angetre Refai ka mel e Gatha. Nge hna humuthi angatr hnei Dravita, me itre soce i nyidrë.