Pane Tusi Itre Joxu
5 Ame hë la Hirama joxu ne Turo a drenge ka hape, hna ië Solomona troa joxu me nyihnai keme i nyidrë, angeic a upe pi la itre hlue i angeic koi Solomona. Eje hi, lue treme sineen* Dravita me Hirama. 2 Matre hnei Solomona hna iupi fë maca koi Hirama, öni nyidrë: 3 “Atre hi nyipë laka, tha hnei Dravita kö, lo kemeng, hna xupi uma kowe la ëje i Iehova Akötresi nyidrë. Hna traqa tun, ke hnei nyidrëti hna isi memine la itre ithupëjia xötreithi nyidrë, uti hë la Iehova a aijijë kaka troa hun. 4 Ngo ame ni, hnei Iehova Akötresing hna hamë tingeting xötreithi ni, matre pëkö ka icilekeu me eni, nge pëkö ngazo ka troa lepi hun. 5 Qa ngöne lai, eni a ajane troa xupe la uma kowe la ëje i Iehova Akötresing. Ke eje hi, hnei Iehova lo hna sisinyi koi Dravita kemeng ka hape, ‘Ame la nekö i ö hnenge hna troa alapan hune la therone i ö, angeice hi la ka troa xupe la uma kowe la ëjeng.’ 6 Matre, pane upe pi la itre ka sa sinöe thei nyipë, troa sa la itre arasi ne Lebanona koi ni. Tro fe la itre ka huliwa koi ni a hane huliwa me itre hlue i nyipë. Nge tro ni a nyithupene la itre hlue i nyipë, thenge la etrun hnei nyipëti hna sa. Ke atre hi nyipë laka, pëkö ala casi the huni ka maca troa sa sinöe, tune la angetre Sidona.”
7 Madrine catre Hirama kowe la itre trengewekë i Solomona, matre öni angeic: “Epi troa atrunyi Iehova, ke hnei nyidrëti hna hamëne koi Dravita la nekö trahmanyi ka inamacan, matre troa joxu hune la nöj atraqatre* celë!” 8 Ame hnei Hirama hna iupi fë maca koi Solomona me hape: “Drenge hë ni la maca i eö. Tro ni a hamë eö la nöjei sinöe arasi, me göti hnei eö hna ajan. 9 Tro la itre hlueng a uti fë sinöe qa hune la itre wetr ne Lebanona kowe la hnagejë. Nge tro ni a iothekeune la itre sinöe, me iupi fë koi eö hnagejë thenge, uti hë la götran hnei eö hna troa qaja koi ni. Nge e cili, tro ni a senge la itre sinöe, nge qanyi eö pë hë xom. Nge ame eö, qa i eö troa hamë xen kowe la itre ka lapa hnine la umang.”
10 Ame hnei Hirama hna iupi fë la itre sinöe arasi, me göti hnei Solomona hna sipon. 11 Nge ame pena Solomona, nyidrëti a iupi fë koi Hirama e nöjei macatre, la 20 000 kori* ne qitr, matre ithuane la itre ka lapa hnine la uma i angeic, me 20 kori ne oel oliv ka nyipi lolo. 12 Hnei Iehova hna hamë inamacane koi Solomona, tune lo aqane sisinyi i nyidrë koi angeic. Nge celë hi matre kola tingeting hnei Hirama me Solomona, nge hnei nyidroti hna isisinyikeu.
13 Ame hnei Solomona joxu hna eköthe la itre huliwa nyine kuca, me musinën e Isaraela asë, la 30 000 lao trahmany. 14 Nge hnei nyidrëti hna iupi fë a tro Lebanona la 10 000 lao trahmany. Nge tro angatr a huliwa e cili koi ca treu, me isa bëek me lapa hnalapan koi lue treu. Adonirama la atrekë hnëqane la itre huliwa hna musinën. 15 Ala 70 000 lao atr ka huliwa* koi Solomona, nge 80 000 lao atre ka thupi etë ngöne itre wetr. 16 Nge ala 3 300 lao tane huliwa ka ixatua thei Solomona. Angatr a iujine la huliwa ne la itre ekip. 17 Nge thenge la hna amekötin hnei joxu, qa i angatr troa hule la itre ietë atraqatr, itre ietë ka tru thupen, me thupathupa. Itre ej la ka troa nyitrepene la uma ne hmi. 18 Itre ka huliwa koi Solomona, me itre ka huliwa koi Hirama, me angetre Gebali, la ka hnëkëne la itre ietë. Qa i angatr troa hnëkëne la itre sinöe me itre ietë, thatraqane la huliwa ne xupe la uma ne hmi.