Deuteronomi

13 “Maine troa mejë qaathei epun la ketre perofeta, maine ketre atr ka qejepengön la itre ewekë ka troa traqa elany jëne la itre pu, nge maine tro angeic a hamën koi epun la ketre hatren, maine ketre ewekë nyine hain, 2 nge kola eatr la hatrene cili memine la ewekë nyine hain, ngo angeice pe a qaja koi ö ka hape: ‘Jë fe matre tro sa xötrethenge me nyihluene la itre xaa haze, lo itre haze trenyiwa,’ 3 tha tro kö epuni a dreng la itre hna qaja hnene la perofeta cili, maine la hna qaja hnene la atr ka pu, ke Iehova Akötresi epun a tupathi epun, matre mama pi ka hape, epuni kö a hnimi Iehova Akötresi epun hnene la hni i epun ka pexej, me mele i epun ka pexej! 4 Iehova Akötresi epun la nyine tro epuni a xötrethengen, nyidrëti hi la nyine tro epuni a xouen, nge itre wathebo i nyidrë la nyine tro epuni a metrötrën, nge nine i nyidrë la nyine tro epuni a dreng, nyidrëti hi la nyine tro epuni a nyihluen me qale kow. 5 Tro pe epuni a humuth la perofeta cili maine la atr ka pu, ke hnei angeic hna uku epun troa icilekeu me Iehova Akötresi epun, lo atre thepe epun qa Aigupito, me itö epun qa ngöne la nöj ka thahluë* epun. Hnene la atre cili hna thel troa ajeanyi epun qa ngöne la gojeny hnei Iehova Akötresi epun hna upi epun troa trongën. Haawe, qa i epun troa xometrij la ngazo qaathei epun.

6 “Maine tro la trejin me eö, ene la neköne la thine i ö, maine nekö i ö trahmany, maine nekö i ö jajiny, maine föe hnimina i ö, maine nyipi sinee i ö, a ewekë koi ö ngöne la gaa co me hape: ‘Jë fe matre tro sa nyihluen la itre xaa haze,’ ene lo itre haze hnei ö me itre qaaqaa i ö hna thatre, 7 itre haze ne la itre nöj xötreithi epun, ka easeny maine gaa nany, qa ngöne la ketre cane la nöj uti hë la ketre can, 8 tha tro kö eö a kei thenge angeic, maine drei angeic, nge tha tro kö eö a hnimi angeic, me utipi angeic, maine juetrë angeic. 9 Qa i ö pe troa humuthi angeic. Tro la iwanakoime i ö a tro pa troa humuthi angeic, nge pine pë hë la nöj. 10 Qa i ö troa tranyi angeic hnei etë, ke hnei angeic hna thel troa ananyi ö qaathei Iehova Akötresi ö, atre thepe eö qa Aigupito, lo nöj ka thahluë epun. 11 Haawe, tro hë la nöje Isaraela asë a drei mejen me xou, nge pë hmaca kö ketre atr ka troa kuca la ketre ngazo ka tun.

12 “Maine tro epuni a dreng laka, ame ngöne la ketre traon hnei Iehova Akötresi epun hna hamë epun, hetre ka qaja ka hape: 13 ‘Hnene la itre ka pë hnënyöngön thei epun hna thel troa akein la itre atr ne la traone i angatr, me hape: “Jë fe matre tro sa nyihluene la itre xaa haze,” itre haze hnei epun hna thatre. 14 E cili, qa i epun troa waipengöne la jol, me ithele hnyawa, me hnyingë pengöne hnyawa. Nge maine nyipici hi laka, hna kuca la ngazo cili nyipi epun, 15 qa i epun troa lep hnei taua la itre atrene la traon asë. Tro epuni a apatrene la traone cili hnei taua, me nöjei ewekë e hnin, memine fe la itre si i angatr asë. 16 Qa i epun troa acasine la itre mo i angatr nyipine la gaa tru atr, nge tro epuni a dreuthetrij la traon, nge tro pë hë la itre mo i angatr a nyi ahnahna ka pexej koi Iehova Akötresi epun. Tro la traone cili a tune la itre itra etë. Nge tha tro hmaca kö a xup ej. 17 Tha tro kö la iwanakoime i epun a xom la itre ewekë hna amë acon* göi troa apatrenetrij. Matre tro Iehova a nuetrij la trengehni i nyidrë, me hnimi epun, me utipi epun, me kuca matre ala nyimu jë epun, tune lo hnei nyidrëti hna sisiny kowe la itre qaaqaa i epun. 18 Ke qa i epun troa drengethenge* Iehova Akötresi epun, ene la troa trongën asë la itre wathebo i nyidrë hnenge hna hamë epun ngöne la drai ce. Qa ngöne lai, tro hë epuni a kuca la loi koi Iehova Akötresi epun.