Hnaaluene Tusi Itre Joxu

13 Ame ngöne la kola 23 lao macatre ne mus i Ioasa joxu ne Iudra, nekö i Ahazia, hna acili joxu Iehoaza nekö i Iehu troa musi koi Isaraela. Hnei nyidrë hna musi koi 17 lao macatre e Samaria. 2 Nyidrëti pala hi a kuca la ngazo koi Iehova, me kuca catrëne la ngazo hna kuca hnei Isaraela, fene lo mus i Ieroboama nekö i Nebata. Nge tha nuetrije kö nyidrë la ngazo cili. 3 Ame hnei Iehova hna elëhni koi Isaraela, matre qea pi hë la nyidrëti a nue angatr kowe la musi Hazaela joxu ne Suria, me Benadada nekö i Hazaela.

4 Ngöne la ketre ijin, hnei Iehoaza hna treije koi Iehova troa loi hni koi angeic. Matre hnei Iehova hna drei Iehoaza, ke öhne hi nyidrë la aqane qanangazo Isaraela hnene la joxu ne Suria. 5 Haawe, Iehova a axulune jë la ketre atr troa thepe angatr qaathene la mus i angetre Suria. Celë hi matre, hnene hmaca la angetre Isaraela hna isa lapa hnalapan* tun ekö. 6 (Ngo ame pe, tha trotrije kö angatre la ngazo hna kuca hnene lo fami i Ieroboama, memine la itre ngazo i Isaraela fene lo mus i Ieroboama. Hnei angatre pala hi hna kuca* la ngazo cili, nge eje pala hi e Samaria la sine feni ka hmitrötr.)* 7 Nge ame ngöne la trongene isi i Iehoaza, traqa hi koi 50 ka ti hos, me 10 lao ikatr, me 10 000 lao sooc ka trongë ihnadro. Ke hnene lo joxu ne Suria hna humuth asë la itre xa sooc, me waja fica kösë xaxau ngöne la hnë lepe qitr.

8 Ame la mele i Iehoaza, me nöjei huliwa i nyidrë, me ecatre i nyidrë, hna fejan asë hnine la itre itus ne la mele ne la itre joxu ne Isaraela. 9 Nge hnei Iehoaza hna meköl me itre qaaqaa i nyidrë ngöne la mec, nge hna kelemi nyidrë e Samaria. Ame hna acili joxu Ioasa nekö i nyidrë, troa nyihna i nyidrë.

10 Ame ngöne la kola 37 lao macatre ne mus i Ioasa joxu ne Iudra, hna acili joxu Ioasa nekö i Iehoaza, troa mus hui Isaraela. Hnei nyidrëti hna musi koi 16 lao macatre e Samaria. 11 Hnei nyidrëti hna kuca la ngazo koi Iehova, nge tha jea kö nyidrë qa ngöne lo itre ngazo hna kuca hnei Isaraela, fene lo mus i Ieroboama nekö i Nebata. Hnei nyidrëti pala hi hna kuca* catrën la ngazo cili.

12 Ame la mele i Ioasa, me nöjei huliwa i nyidrë, me ecatre i nyidrë, me itre isi i nyidrë me Amazia joxu ne Iudra, hna fejan asë hnine la itre itus ne la mele ne la itre joxu ne Isaraela. 13 Nge hnei Ioasa hna meköl me itre qaaqaa i nyidrë ngöne la mec, nge hna acili joxu Ieroboama* troa nyihna i nyidrë. Hna ce kelemi nyidrë e Samaria memine lo itre joxu ne Isaraela.

14 Ame hë la kola tithi Elisaia hnei mec, nge tro hë angeic a mec, hnei Ioasa joxu ne Isaraela hna traqa troa wai angeic. Nyidrëti a thili ju koi Elisaia me treij me hape: “Ekölöini la kemeng, ekölöini la kemeng! Ikatr i Isaraela, me itre ka ti hos!” 15 Matre öni Elisaia: “Awe jë la ca pehna me itre ane pehna.” Nge Ioasa a traqa fë pi la ca pehna me itre ane pehna. 16 Nge öni Elisaia kowe la joxu ne Isaraela: “Cile fë jë la pehna.” Matre nyidrëti a cile fë ju, nge Elisaia a atë jë la lue ime i angeic hune la lue ime i joxu. 17 Nge öni angeic: “Fe pi la mamala kowe la götrane koië.” Nge nyidrëti a fe pi, matre öni Elisaia: “Huje pi.” Matre nyidrëti a huje pi la pehna. Nge öni Elisaia: “Ane pehna ka hune* i Iehova, ane pehna ka troa ngaane la angetre Suria. Tro nyipëti a ngaane la angetre Suria e Afeka, tro nyipëti a lepi angatr.”

18 Öni Elisaia hmaca: “Xome jë la itre ane pehna.” Matre hnene la joxu ne Isaraela hna xome ju. Nge öni Elisaia: “Lepelepe jë la ihnadro.” Matre hnei Ioasa hna akönia lepelepe la ihnadro, me cil. 19 Ame hnene la atre ne la nyipi Akötresie hna wesitr koi nyidrë me hape: “Tro nyipëti ekula a 5 maine a 6 lao lep! Nge tro hë nyipë a ngaa angetre Suria, me lepi angatre hnyawa. Ngazo pe, tro hi nyipëti a akönia ngaa angatr.”

20 Thupene lai, meci pi hi Elisaia, nge hna kelemi angeic. Nge e nöjei ijine kola xejë la macatre, hnei itre atrekënö qa Moaba hna majemine lepe la nöj. 21 Matre ngöne la ketre drai, hnene la itre atr hna keleme la ketre trahmany, nge öhne ju hi angatr la itre atrekënö e cahmijë. Matre angatr a canga kuiëne pi la ngönetrei ne la ka mec hnine la hua i Elisaia, me ikötreny. Ngo ame hë la ngönetrei ne la atre ka mec a ketr la itrapa jun i Elisaia, mele hmaca jë hi lai atr, nge angeic a mejë jë.

22 Nge hnei Hazaela joxu ne Suria, hna qanangazo Isaraela ngöne la ijine mus i Iehoaza. 23 Ngo hnei Iehova hna hnim me utipine la angetre Isaraela, pine la isisinyikeu i nyidrë me Aberahama, me Isaaka, me Iakobo. Xele nyidrë ma apatrenyi angatr, nge uti pala hi enehila, tha hnei nyidrëti kö hna trij ananyi angatr. 24 Nge ame hë la Hazaela joxu ne Suria a mec, hna acili Benadada nekö i nyidrë troa mus. 25 Ame hnei Ioasa nekö i Iehoaza, hna thapa hmaca qaathei Benadada nekö i Hazaela, la itre traon hnei Hazaela hna thapa qaathei Iehoaza. Hnei Ioasa hna akönia ngaa Benadada, me thapa hmaca la itre traon i nyidrë e Isaraela.