Hnaaluene Tusi Itre Joxu

24 Ngöne la ijine mus i Iehoiakima, hnei Nebukaneza joxu ne Babulona hna lepe la baselaia i Iehoiakima. Matre hnei nyidrë hna nyihluene la joxu ne Babulona koi köni macatre. Ngo e thupen, hnei nyidrëti hna icilekeu. 2 Ame hnei Iehova hna upe koi Iehoiakima la itre atrekënö qa Kaledaia, me Suria, me Moaba, me Amona. Iehova a upi angatr kowe la baselaia ne Iudra göi troa lep apatren ej, tune lo aqane qaja i nyidrë jëne la itre perofeta, lo itre hlue i nyidrë. 3 Eje hi, Iehova la ka amekötin lai koi Iudra, matre apatrenyi angatr qëmekei nyidrë, ke tru catre la itre ngazo i Manase, 4 nge hnei Manase hna anenine la madra ne la itre ka pë engazon. Eje hi, hnei Manase hna atiqanyi Ierusalema hnene la madra ne la itre ka pë engazon. Nge xele hë Iehova ma nue la itre ngazo i angatr.

5 Nge ame la mele i Iehoiakima me nöjei huliwa i nyidrë, hna fejan asë hnine la itusi ne la mele ne la itre joxu ne Iudra. 6 Ame hnei Iehoiakima hna meköl me itre qaaqaa i nyidrë ngöne la mec, nge hna acili joxu Iehoiakin nekö i nyidrë, troa nyihna i nyidrë.

7 Nge ame la joxu ne Aigupito, tha hnei angeice hmaca kö hna tro qa ngöne la nöje i angeic, ke hnene la joxu ne Babulona hna thapa la nöjei ewekë i angeic, qaane la Hneopegejë ne Aigupito, uti hë la Hneopegejë Euferate.

8 Traqa koi 18 lao macatre i Iehoiakin lo kola acili joxu nyidrë. Hnei nyidrëti hna musi koi köni treu e Ierusalema. Nehuseta la ëjene la thine i nyidrë. Nge eahlo la nekö i Elenathana qa Ierusalema.

9 Nyidrëti a kuca la ngazo koi Iehova, tune la keme i nyidrë. 10 Ngöne la ijine cili, hnene la itre sooc i Nebukaneza joxu ne Babulona, hna traqa troa cile xötreithe Ierusalema. 11 Angatre pala kö a cile xötreithe Ierusalema, nge traqa pi hi Nebukaneza.

12 Matre hnei Iehoiakin joxu ne Iudra, hna nue nyidrë kowe la joxu ne Babulona, nge ce nyidrë memine la thine i nyidrë, me itre hlue i nyidrë, me itre atre ka tru i nyidrë, me itre ka huliwa hnine la hnalapa i nyidrë. Matre hnene la joxu ne Babulona hna akalabusi Iehoiakin. Hna traqa lai hmekune la kola 8 lao macatre ne mus ne la joxu ne Babulona. 13 Nge hnei Nebukaneza hna eöth asë la itre trengamo hnine la uma ne hmi Iehova, me itre trengamo ne la hnalapa ne la joxu ne Iudra. Nyidrëti a lep anyilanyilane jë la itre ewekë gool hna kuca hnei Solomona joxu ne Isaraela, lo hna kuca kowe la uma ne hmi Iehova. Hna traqa thenge la aqane qaja i Iehova. 14 Nge hnene la joxu ne Babulona hna kötre fë la itre atr ne Ierusalema, me itre atre ka tru ne la nöj, me itre sooc ka catr, me itre ka kuca la nöjei pengöne huliwa, me itre ka huliwa fao.* Hnei nyidrëti hna xome la 10 000 lao atr, me nue pe la itre ka pë ewekë ngöne la nöj. 15 Celë hi matre hna xomi Iehoiakin a tro Babulona, memine la thine ne la joxu, me itre föi joxu, me itre ka huliwa hnine la hnalapa i joxu, me itre atre ka tru ne la nöj. Hnei Nebukaneza hna xomi angatr qa Ierusalema, me kötre fë a tro Babulona. 16 Matre hnene la joxu ne Babulona, hna kötre fë la 7 000 lao sooc, me 1 000 lao atr ka kuca la nöjei pengöne huliwa, me itre ka huliwa fao.* Angatre hi la itre atre ka catr, nge hna inine troa isi. 17 Matre hnene la joxu ne Babulona hna acili joxu Matania, ketre keme i Iehoiakin, matre nyihnai nyidrë. Nge Nebukaneza a ati ëje i nyidrëti jë ka hape, Zedekia.

18 Traqa koi 21 lao macatre i Zedekia lo kola acili joxu nyidrë. Hnei nyidrëti hna musi koi 11 lao macatre e Ierusalema. Hamutala la ëjene la thine i nyidrë. Nge eahlo la nekö i Ieremia qa Libena. 19 Zedekia a kuca la ngazo koi Iehova, tune lo aqane kuca i Iehoiakin. 20 Hna traqa la nöjei ewekë cili e Ierusalema me Iudra, pine la elëhni i Iehova, uti hë la nyidrëti a ase apatrenyi angatr qëmeke i nyidrë. Nge hnei Zedekia hna icilekeu memine la joxu ne Babulona.