Hnaaluene Tusi Itre Joxu

25 Ngöne la kola 9 lao macatre ne musi Zedekia, hmekune la hna 10 ne drai ne la hna 10 ne treu, hnei Nebukaneza joxu ne Babulona me trongene isi i nyidrëti asë, hna lepi Ierusalema. Hnei nyidrëti hna acile la lapa ne sooce i nyidrë ezine la traon, me acile la ihag ne isi xötreithi Ierusalema. 2 Matre hna lapa xötreithe la traon uti hë la kola 11 lao macatre ne musi Zedekia. 3 Ngöne la drai 9 ne la hna 4 ne treu, hmekune la kola catrehnine la jiin e hnine la traon, nge pë hë ane la itre atrene la nöj, 4 hna kuje la ihag ne la traon. Matre angetre Kaledaia* pe kö a lapa xötreithe la traon, nge e jidr, hnene la itre sooc ne Iudra hna kötre qa ngöne la qëhnelö nyipine la lue ihag, ezine la hlapa i joxu. Nge hnei Zedekia joxu hna kötr a tro Araba. 5 Ngo hnene la itre sooc i angetre Kaledaia hna weje huzune la joxu, me e nyidrë ngöne la itre gaa qaqacil xötreith e Ieriko. Matre hnene la itre sooc ne la joxu hna ikötreny. 6 Ame hna xolouthe la joxu, me xomi nyidrë a tro Ribela kowe la joxu ne Babulona. Nge e cili, hna ameköti nyidrë. 7 Hna humuthe la itre nekö i nyidrë trahmany, qëmeke i nyidrë. Thupene lai, hnei Nebukaneza hna atimekë Zedekia, me ceinë nyidrë hnei itre ceine kopa, me xomi nyidrë a tro Babulona.

8 Ngöne la hna 7 ne drai ne la hna 5 ne treu, hmekune la kola 19 lao macatre ne musi Nebukaneza joxu ne Babulona, hnei Nebuzaradana, lo tane la itre ka thupëne la joxu ne Babulona, hna traqa e Ierusalema. 9 Angeic a manithe jë la uma ne hmi Iehova, memine la hnalapa i joxu, me nöjei hnalapa ne Ierusalema. Nge angeic a manithe ju fe la nöjei hnalapa ne la itre atre ka tru ne la nöj. 10 Nge hnene la itre sooc i angetre Kaledaia, ka ce tro memine la tane la itre ka thupë joxu, hna thëtrije la itre ihage xötreith e Ierusalema. 11 Matre hnei Nebuzaradana, lo tane la itre ka thupë joxu, hna othe me kötre fë a tro Babulona, la itre atr ka lapa pe ngöne la traon, me itre atre Iudra ka xele ma isi nge ka nyixöle i Babulona, me itre xa atrene la nöj. 12 Ngo hnene la tan ne la itre ka thupë joxu hna nue la itre ka pë ewekë, matre tro angatr a huliwa ngöne la itre hlapa vin,* me eënyine la hna upi angatr. 13 Nge hnene la angetre Kaledaia hna thë la itre ipoto kopa ne la uma ne hmi Iehova, me itre ikatr, memine la Hnagejë kopa hnine la uma ne hmi Iehova, nge angatr a xome jë la kopa a tro Babulona. 14 Angatr a xome ju fe la itre trapë hnatresij, me itre pel, me itre fizi, me itre ver, me nöjei ewekë kopa hna huliwan hnine la uma ne hmi. 15 Nge hnene la tane la itre ka thupë joxu hna xome la itre trengene eë, me itre kap hna kuca hnei nyipi gool me sileva. 16 Nge ame la lue ipoto, memine la Hnagejë, me itre ikatr hnei Solomona hna kuca thatraqane la uma ne hmi Iehova, thatreine kö e la etrune kopa hna huliwan. 17 Ame la lue ipoto, isa 18 kubit* la edraiën. Nge ame la lue hene ipoto, hna kuca hnei kopa, nge isa 3 kubit la edraiën. Nge ame la itre cein hna el, me itre grenad ka kanothe la lue hene poto, hna kuca asë hnei kopa. Matre ceitu hnyawa hi la lue ipoto, me itre nyine amingömingön.

18 Nge hnei Nebuzaradana hna akalabusi Seraia, lo tane la itre atre huuj, me Zefania lo hnaaluene atre huuj, memine la köni ka thupë qëhnelö. 19 Nge hnei angeice fe hna xome qa ngöne la traon la ketre atre ka huliwa hnine la hnalapa i joxu, lo ka thupëne la itre sooc, memine la 5 lao atre ka ce huliwa memine la joxu, memine lo sekreter ne la tane la itre sooc, lo ka ihë troa isi, memine la 60 lao trahmany ka lapa pe ngöne la traon. 20 Nge hnei Nebuzaradana, lo tane la itre ka thupë joxu, hna othi angatr, me xomi angatr kowe la joxu ne Babulona e Ribela. 21 Nge hnene la joxu ne Babulona hna humuthi angatr e Ribela, ngöne la nöje Hamath. Celë hi aqane oth me kötre fë la angetre Iudra tröne la nöje i angatr.

22 Matre hnei Nebukaneza joxu ne Babulona, hna acili Gedalia troa thupëne la munëne la itre atre Iudra hna nue koi angeic. Gedalia la nekö i Ahikama, lo nekö i Safana. 23 Nge ame hë la itre tane sooc me itre sooc a drenge laka, ase hë acili Gedalia hnene la joxu ne Babulona, angatr a ce tro jë troa wai Gedalia e Mizepa. Isamaela nekö i Nethania la ka traqa, me Ioanana nekö i Karea, me Seraia nekö i Tanumeth qa Netofa, me Iazania neköne la atre Maaka. Hnei angatr hna ce traqa me itre sooce i angatr. 24 Ame hnei Gedalia hna isisinyikeu memine la itre tane sooc, me itre sooce i angatr, öni angeic: “The xou kö troa huliwa kowe la angetre Kaledaia. Lapane jë la nöj, nge huliwa jë kowe la joxu ne Babulona, nge tro ha tro loi la mele i epun.”

25 Ngo ngöne la hna 7 ne treu, hnei Isamaela nekö i Nethania, nekö i Elisama, ketre atrene la fami joxu,* hna traqa memine la ala 10. Hnei angatr hna humuthi Gedalia, memine la angetre Iudra me Kaledaia ka ce me angeic e Mizepa. 26 Thupene lai, hnene la nöj asë, qane la ka co uti hë la ka tru, me itre tan, hna mejë a tro Aigupito, ke xou i angatre la angetre Kaledaia.

27 Matre ame hë la kola 37 lao macatre ne othi Iehoiakin joxu ne Iudra, hmekune la hna 27 ne drai ne la hna 12 ne treu, hnei Evil-merodak, joxu ne Babulona, hna nue Iehoiakin joxu ne Iudra qa kalabus. Hna traqa lai ngöne la macatre ne acili joxu Evil-merodak. 28 Hnei nyidrëti hna ithanata hnyawa koi Iehoiakin, me atrunyi Iehoiakin hune* la itre xa joxu e Babulona. 29 Ame hnei Iehoiakin hna una la itre iheetr ne kalabus i nyidrë, me xeni e nöjei drai ne mele nyidrë hune la laulau i joxu. 30 Matre uti hë la meci nyidrë, hna kepe a i nyidrë e nöjei drai qaathei joxu.