Pane Tus i Aqane Lapa Itre Joxu

4 Itre nekö i Iudra: Farez, me Hezerona, me Karemi, me Huro, me Sobala. 2 Nge hnei Reaia nekö i Sobala hna hnaho Iahath. Nge hnei Iahath hna hnaho Ahumai me Lahad. Itre fami angetre Zoreakeme lai. 3 Hane hi la itre neköne la keme* i Etama: Iezerela, me Isema, me Idebas (Hazeleponi la ëjene la xa i angatr). 4 Nge Penuela la keme i Gedor, nge Ezera la keme i Husa. Itre nekö i Huro asë hi angatr, lo pane nekö i Eferatha, nge keme i Bethe-leema. 5 Hnei Asura keme i Tekoa, hna xomi lue föe: Hela me Naara. 6 Hnei Naara hna ce hnaho me angeic: Ahuzama, me Hefera, me Temana, me Hahasetari. Itre nekö i Naara asë angatr. 7 Itre nekö i Hela: Zereth me Zoara, me Ethenan. 8 Nge hnei Koz hna hnaho Anuba me Zobela, me itre fami Aharehel, nekö i Harum.

9 Ka nyipi atr la aqane ujë i Iabez hune la itre trejin me angeic. Hnene la thine i angeic hna ati ëjen ka hape, Iabez,* ke öni eahlo: “Hnenge hna hnaho nyën ngöne la akötr.” 10 Hnei Iabez hna thithi kowe la Akötresi Isaraela me hape: “Epi tro nyipëti a amanathithi ni, me atrune la zing. Xatua ni jë nge thupë ni ju, matre triane kö ni la akötr!” Ame hnei Akötresie hna kapa la sipo i angeic.

11 Hnei Kelubo trejine me Sua, hna hnaho Mehir, keme i Eseton. 12 Nge hnei Eseton hna hnaho Betherafa, me Pasea, me Tehina keme i Irenahasa. Celë hi itre atre ne Reka. 13 Lue nekö i Kenaza: Otheniela me Seraia. Nge nekö i Otheniela: Hathath. 14 Nge hnei Meonothai hna hnaho Ofera. Nge hnei Seraia hna hnaho Ioaba, keme ne la itre atrene Gerasim.* Hna hëne tune la hnathupe cili, ke ame la itre ka lapane la hnathup, atreine hi angatr kuca la nöjei pengöne huliwa.

15 Itre nekö i Kaleba nekö i Iefune: Iru, me Ela, me Naam. Nekö i Ela: Kenaza. 16 Itre nekö i Iehaleela: Zif, me Zifa, me Tiria, me Asareel. 17 Itre nekö i Ezera: Iethero, me Mered, me Efera, me Ialon. Nge hnei eahlo* hna hnaho Miriama, me Samai, me Iseba keme i Esetemoa. 18 (Hnene la ifënekö i angeic qa Iudra hna hnaho Iareda keme i Gedor, me Heberu keme i Soko, me Iekuthiel keme i Zanoa). Angatre la itre nekö* i Bithia, lo nekö i Farao jajiny, lo ka faipoipo me Mered.

19 Hane hi la itre matra ne la ifënekö i Hodia, lo ifaxa i Nahama: itre keme i Keila atre Garemi, me Esetemoa atre Maaka. 20 Itre nekö i Simon: Aminona, me Rina, me Beni-hanan, me Tilon. Nge lue nekö i Ishi: Zoheth me Beni-zoheth.

21 Itre nekö i Sela nekö i Iudra: Era keme i Leka, me Laada keme i Maresa, me itre fami ka ca imano, lo itre ka kuci imano ka hmelele e Asebea, 22 me Iokima, me itre atrene Kozeba, me Ioasa me Saraf, lue ka xomi föe ne Moaba, me Iasubi-leem. Ka he ekö* catre la itre xötr atr celë. 23 Angatre lo itre ka xupi dro ka fedr, me lapa e Netaim me Gedera. Hnei angatr hna lapa e cili matre troa huliwa koi joxu.

24 Itre nekö i Simeona: Nemuela, me Iamina, me Iarib, me Zera, me Saulo. 25 Hnei Saulo hna hnaho Saluma, keme i Mibesam, keme i Misema. 26 Itre nekö* i Misema: Hamuel nekö i angeic, Zakuri nekö i angeic, Simei nekö i angeic. 27 Hnei Simei hna hnahone la 16 lao nekö trahmany, me 6 lao jajiny. Ngo tha hnaho nekö trahmany atrunyi kö la itre trejin me angeic, nge pëkö atrene la fami angatr ka hane hnaho tune la itre atre Iudra. 28 Angatr a lapa e Bere-seba, me Molada, me Hazara-sual, 29 me Bila, me Azem, me Tolad, 30 me Bethuela, me Horema, me Zikelag, 31 me Bethe-marekaboth, me Hazarasusa, me Bethe-birei, me Saraim. Celë hi itre traon hnei angatr hna lapan, uti hë la kola nyiqane mus hnei Dravita.

32 Nge hnei angatre fe hna lapa e Etama, me Aina, me Rimona, me Token, me Asan, 5 lao traon, 33 me nöjei hunahmi xötreithe la itre traone cili, uti hë e Baala. Celë hi la itre xötr atre i angatr, me itre traon hnei angatr hna lapan. 34 Nge hane hi la itre xa matra i Simeona: Mesobab, me Iamelek, me Iosa nekö i Amazia, 35 me Ioela, me Iehu nekö i Iosibia, nekö i Seraia, nekö i Asiela, 36 me Elioenai, me Iaakoba, me Iesohaia, me Asaia, me Adiela, me Iesimiela, me Benaia, 37 me Ziza nekö i Sefi, nekö i Alona, nekö i Iedaia, nekö i Simeri, nekö i Semaia. 38 Ame la itre ëjene hna qaja, ke itre tixe ne lapa. Ala nyimu la itre fami ka xulu qaathene la itre qaaqaa i angatr. 39 Qa ngöne lai, hnei angatr hna tro kowe la hnë lö ne Gedor, götrane koië ne la hnathup, matre thele xen kowe la itro öni angatr. 40 Nge e cili, hnei angatr hna öhne la haö ka cia hnyawa nge ka lolo, nge ketre götrane lai gaa tru nge gaa tingeting. Nge ame ekö, itre matra i Hama la ka lapa e cili. 41 Ame la itre ëjene hna qaja, hnei angatr hna traqa e cili hmekune la kola mus hnei Hezekia joxu ne Iudra. Hnei angatr hna thëtrije la itre itat ne la itre matra i Hama, me humuthe la angetre Maon. Hnei angatr hna apatrene la itre atr e cili, matre pëkö matran ka mele pe enehila. Haawe, angatr a lapane ju la götrane cili, ke gaa hetre xen kowe la itro öni angatr.

42 Nge hnene la 500 lao nekö i Simeona hna tro kowe la wetre Seira. Nge Pelatia la ka wejemeke i angatr, me Nearia, me Refaia, me Uziela, itre nekö i Ishi. 43 Angatr a humuthe pi la angetre Amaleka ka kötre zae e cili, me lapane la nöj uti hë enehila.