Pane Tus i Aqane Lapa Itre Joxu

11 E thupen, hnene la angetre Isaraela hna traqa itronyi troa wai Dravita e Heberona, me hape: “Atre hi nyipë laka, casi hi la madra së.* 2 Ame lo Saulo a mus, nyipëti la ka elemekene la itre trongene isi i Isaraela, nge hnei Iehova Akötresi nyipë hna qaja koi nyipë ka hape, ‘Eö la ka troa thupëne la nöjeng Isaraela, nge tro hë eö a tane la nöjeng Isaraela.’” 3 Nge hnene la nöjei qatr ne Isaraela hna tro koi Dravita joxu e Heberona. Nge hnene la joxu hna isisinyikeu me angatr qëmeke i Iehova. Thupene lai, angatr a ië* Dravita jë troa joxu ne Isaraela, tune lo hna qaja hnei Iehova jëne Samuela.

4 E thupen, hnei Dravita me itre soce i nyidrë hna tro Ierusalema, ene Iebusi, lo hnë lapa i angetre Iebusi, lo itre atrekë nöjen. 5 Nge hnene la angetre Iebusi hna nyiqane hnyimasai Dravita me hape: “Tha tro kö eö a hane lö hnine la traone celë!” Ngo hnei Dravita pe hna thapa la ihag atraqatr ne Ziona, nge hna hën enehila ka hape, traone i Dravita. 6 Matre öni Dravita: “Ame la atre ka pane isi me angetre Iebusi, tro ha acili angeic troa tane isi. Nge hnei Ioaba nekö i Zeruia hna tro pa troa isi, ene pe, hna acili angeic pë hë troa tan. 7 Nge Dravita a lapa ju nyipine la ihag atraqatr, celë hi matre, hna hën e thupene la ihage cili ka hape, Traone i Dravita. 8 Hnei Dravita hna nyiqaane xupe trongën qa ngöne lo Hna Jë,* me xötreith. Nge Ioaba a xupe hmaca jë la munëne la traon. 9 Celë hi matre, kola hlemu trootro la ecatre i Draviata, ke Iehova joxu ne la itre trongene isi e hnengödrai, a ce me Dravita.

10 Nge hane hi la itre tane la itre soc ka catr i Dravita, itre ka ce xöl me angetre Isaraela troa sajuëne la musi Dravita, me ka xatua nyidrë troa joxu, tune lo hna qaja hnei Iehova koi Isaraela. 11 Hane hi la ëjene la köni soc ka catr i Dravita: Iasobeam la hnapan, nekö ne la atre Takemoni, nge angeic la tan ne la ala kön. Ngöne la ketre drai, hnei angeic hna humuth la ala 300 hnene la jo i angeic. 12 Thupei angeic, Eleazara nekö i Dodo, nekö ne la atre Aohi. Angeice fe la ketre ne la köni soc ka catr i Dravita. 13 Ce angeice lo me Dravita e Efesi-damim, lo angetre Filisiti a cile troa isi me angetre Isaraela. Nge hetrenyi fe e cili la ketre hlapa gaa tru bali. Nge ngöne la drai cili, hnei itre soc hna kötrene la angetre Filisiti. 14 Ngo hnei angeice pe hna cil nyipine la hlapa, me sewe angatr troa thapa. Angeic a isi jë me angetre Filisiti, nge ala nyimu la hnei angeic hna humuth. Hane hi la aqane hune* i Iehova.

15 Hnene la ala kön qa ngöne lo 30 lao tane soc hna traqa koi Dravita, ngöne la ngönemenyi e Adulama. Ngöne la ijine cili, kola cile la lapa ne soc i angetre Filisiti, ngöne la Hnathup e Refaim. 16 Ngo Dravita pë hë ngöne la hnë zae i nyidrë, nge hetre xötre soc i angetre Filisiti e Bethelema. 17 Ngöne la ketre drai, öni Dravita ka hape: “Ekölö, eni a pi ije la tim hna jöe ngöne la sima ezine la qëhnelö ne Bethelema!” 18 Ame hnene la köni soc ka catr i Dravita, hna catre lö hnine la lapa i angetre Filisiti, me jöe tim ngöne la sima ezine la qëhnelö ne Bethelema. Nge angatr a hamë Dravita jë, ngo tha iji ju kö Dravita, nge nyidrëti a nenge pi e kuhu hnadro qëmeke i Iehova, 19 Ke öni nyidrë: “Pi Iehova Akötresing, thatreine kö ni mekune troa iji la timi celë! Ke kösë eni a iji la madra ne la itre ka nue mel, ke hnei angatr hna nue mel troa traqa fë koi ni!” Haawe, tha iji ju kö Dravita. Hane hi la hna kuca hnene la köni soc ka catr.

20 Abisai trejin me Ioaba, la ketre tane la köni xa soc. Ngöne la ketre ijin, hnei angeic hna humuthe la ala 300 hnene la jo i angeic. Hlemu catr angeic tune lo köni soc ka catr i Dravita. 21 Qa ngöne la ala köni celë, angeice hi la ka hlemu nge tane i angatr, ngo tha hna ce e angeice kö memine la köni soc ka catre i Dravita.

22 Benaia nekö i Iehoiada, la ketre atre ka catr.* Nyimu huliwa ka tru hnei angeic hna kuca e Kabezeela. Angeice hi lo ka humuthe la lue nekö i Ariel, atre Moaba. Nge angeice fe la ka uti ngöne la hnë tha tim, troa humuthe la liona ngöne la ijine mala la kiona.* 23 Hnei angeice fe hna humuthe la ketre atre Aigupito ka qeadridri catr, 5 kubit* la eqean. Hnei Benaia hna isi memine la hnepe sinöe, ngo kola cile fë jo hnene la atre Aigupito, jo ka isaisa tune la inehe ne sili maano. Matre Benaia a thapa pi la jo, me humuthe la atre Aigupito. 24 Hane hi la hna kuca hnei Benaia nekö i Iehoiada. Nge ceitu hi la aqane hlemu i angeic memine la köni soc ka catr i Dravita. 25 Ngacama ka hlemu ju hë angeic hune la ala 30, ngo tha hna ce e angeice kö memine la köni soc ka catre i Dravita. Ngo hnei Dravita hna acili angeic troa tane la itre ka thupë joxu.

26 Hane hi la itre soc ka hlemu hnine la trongene isi: Asael, trejin me Ioaba, me Eleanana nekö i Dodo qa Bethelema, 27 me Sama qa Harari, me Helez qa Pelone, 28 me Ira nekö i Ikes qa Tekoa, me Abiezera qa Anathoth, 29 me Sibekai qa Husa, me Itai qa Aohi, 30 me Maharai qa Netofa, me Heled nekö i Baana qa Netofa, 31 me Itai nekö i Ribai qa Gibea e Beniamina, me Benaia qa Pirathon, 32 me Hurai qa ngöne la itre hneopegejë e Gasa, me Abiela qa Araba, 33 me Azemaveth qa Bahurim, me Eliaba qa Salabon, 34 me itre nekö i Hasem qa Gizon, me Ionathana nekö i Sage qa Harari, 35 me Ahiam nekö i Sakari qa Harari, me Elifal nekö i Ure, 36 me Hefera qa Mekerathi, me Ahia qa Pelone, 37 me Hezero qa Karemela, me Naarai nekö i Ezebai, 38 me Ioela trejine me Nathana, me Mibeka nekö i Hagara, 39 me Zelek qa Amona, me Nahari qa Berotha, lo ka ajö jia ne isi i Ioaba nekö i Zeruia, 40 me Ira qa Iethero, me Gareb qa Iethero, 41 me Uria qa Heth, me Zabad nekö i Ahelai, 42 me Adina nekö i Siza qa Reubena, tixe i angetre Reubena, nge ce angeic me ala 30; 43 me Hanan nekö i Maaka, me Iosafata qa Mitheni, 44 me Uzia qa Aseterotha, me Sama me Iehiela lue nekö i Hotham qa Aroera, 45 me Iediaela nekö i Simeri, me loha trejine me angeic qa Tizi, 46 me Eliela qa Mahavi, me Ieribai me Iosavia lue nekö i Elenaama, me Ithema qa Moaba, 47 me Eliela, me Obeda, me Iaasiela qa Mezoba.