Hnaaluene Tus i Aqane Lapa Itre Joxu

7 Thupene la Solomona a ase thith, hna uti la eë qa hnengödrai troa dreuth la huuj ne dreuth asë, me itre xa huuj. Ame hna tiqa pi la uma ne hmi hnene la lolo i Iehova. 2 Nge tha ijiji fe tro la itre atre huuj a lö hnine la uma ne hmi Iehova, ke tiqa ha la uma ne hmi Iehova hnene la lolo i Iehova. 3 Matre hnene la nöje Isaraela asë, lo itre ka öhne la kola uti la eë, nge ka öhne la lolo i Iehova hune la uma ne hmi, hna isa thil qe ipië kowe la trepene etë, angatr a thili ju me olene koi Iehova, ke “ka loi hni nyidrë, nge ka cile hut la ihnimi nyipici nyidrë.”

4 Ame hnene la joxu memine la nöj asë, hna tro fë huuj qëmeke i Iehova. 5 Hnei Solomona joxu hna huujëne la 22 000 lao kau, me 120 000 lao mamoe. Celë hi aqane feetën angetre Isaraela memine la joxu, la ijine afenesine la uma ne hmi ne la nyipi Akötresie. 6 Itre atre huuj a isa cilë götrane qa, nge angetre Levi a isa cile fë nyine elo miuzik, ka ce tro me itre nyima koi Iehova. (Hnei Dravita joxu hna kuca la itre nyine elo miuzik cili nyine olene koi Iehova—“ke ka cile hut la ihnimi nyipici nyidrë”—lo Dravita a ce atrunyi nyidrë me angatr.)* Nge itre atre huuj a ufe catrëne la itre trutru qëmekene la angetre Levi, nge angetre Isaraela asë a isa cil.

7 Ame hnei Solomona hna ahmitrötrëne la nyipine la götrane gaa pë ihakun qëmekene la uma ne hmi Iehova, ke e cili hi la nyidrëti a tro fë la itre huuj ne dreuth asë, me itre giris ne la itre huuj ne tingeting.* Ke eje hi, tha ijije kö la ita ne huuj kopa, lo hnei Solomona hna kuca, ke tru hnei huuj ne dreuth asë, me itre huuj ne wene feja, me itre giris. 8 Ngöne la ijine cili, hnei Solomona memine la nöje Isaraela asë hna ce feete koi 7 lao drai, ce me itre atr ka ala nyimu,* nge ka traqa qa gaa nany e Lebohamath,* me qa ngöne la hneopegejë ne Aigupito. 9 Nge ngöne la hna 8 ne drai, angatr a icasikeu jë, ke hnei angatr hna feetëne koi 7 lao drai la kola xötrei huliwane* la ita ne huuj, nge 7 hmaca kö lao drai ne feet. 10 Nge ame hë la hna 23 ne drai ne la hna 7 ne treu, hnei nyidrëti hna upe la nöje troa isa bëeke koi hnalapan. Nge kola madrin, me madrin qa kuhu hni, ke hnei Iehova hna kuca la loi koi Dravita, me Solomona, me kowe la nöje i nyidrë Isaraela.

11 Celë hi matre ase hë Solomona afenesine la uma ne hmi i Iehova, me hnalapa i joxu. Nge ka tro loi pala hi la nöjei mekuna i Solomona göne la uma ne hmi Iehova, me hnalapa i joxu. 12 Ame hnei Iehova hna mama koi Solomona e hej, nge öni nyidrë: “Drenge hë ni la thithi ö, nge ase hë ni iëne la uma celë nyine uma ne huuj. 13 E traqa jë ni thinge la hnengödrai, nge e pë ju mani, nge e traqa jë ni upe la itre sipa troa lep la nöj, nge e tro ni a lepe la nöjeng hnei mec ka ixötrekeu, 14 nge e tro la nöje celë ka xome la ëjeng a ipië, nge e tro angatr a thith me xei koi ni,* me tha kuca la ngazo, haawe, tro hë ni a dreng qa hnengödrai, me nue la itre ngazo i angatr, me aloine la nöje i angatr. 15 Qane enehila, tro hë la luemekeng a goe, nge tro hë la lue hnangenyëng a drenge hnyawa la itre thith hna thithi fë e celë. 16 Enehila, ase hë ni iëne la uma celë, nge ase hë ni ahmitrötrën, matre tro la ëjeng a lapa palua e celë. Nge tro hë la luemekeng me hning a lapa palua e celë.

17 “Nge e tro eö a nyihlueng* tune la aqane kuca i Dravita keme i ö, ene la troa kuca asë la hnenge hna amekötine koi ö, nge e tro eö a trongëne la itre wathebong asë, 18 tro hë ni a acile hutine la musi ö, tune lo aqane sisinyi ni lo eni a isisinyikeu me Dravita keme i ö: ‘Tro pala hi a hetre matra i ö hune la theron ne Isaraela.’ 19 Ngo maine tro epuni a nuetriji ni, me nuetrije la itre wathebong, me itre hnenge hna amekötin, nge e tro epuni a nyihluene la itre xa haze, me thili kow, 20 tro hë ni a fejetrije la angetre Isaraela qa ngöne la nöj hnenge hna hamë angatr, nge tro ni a xometrije qëmekeng la uma celë, lo hnenge hna ahmitrötrën thatraqane la ëjeng. Nge tro hë ni a kuca matre tro la nöjei nöj a methinë Isaraela me hnyima sai angatr. 21 Nge tro ha hnyiqetre la uma celë, nge tro la nöjei atr ka tro ezin a goeëne me sesëkötr. Tro angatr a hnyinge ka hape: ‘Hnauëne laka, Iehova a kuca tun kowe la nöje celë, memine la uma celë?’ 22 Nge tro ha sa koi angatr ka hape: ‘Kolo ke hnei angatr hna nuetriji Iehova Akötresi ne la itre qaaqaa i angatr, lo ka thepe angatr qa Aigupito, nge hnei angatre hna fedre kowe la itre xa haze, me thili kow me nyihluen. Hane hi la kepin matre axulune pi nyidrë la ngazo ka tru celë koi angatr.’”