Hnaaluene Tus i Aqane Lapa Itre Joxu
9 Hnene la joxu föe ne Sheba, hna drei mejene la aqane hlemu i Solomona, matre eahlo a traqa pi e Ierusalema troa tupathi Solomona hnei itre hnyinge ka jol. Ce eahlo me nyimu hlu, me itre kamela ka thue la itre trengene oel ne göti, me nyimu gool, me itre etë ka tru thupen. Eahlo a lö jë koi Solomona, me nyiqaane ithanatane la nöjei ewekë ka tru koi eahlo. 2 Nge hnei Solomona hna sa la nöjei hnyinge i eahlo, pëkö ca hnying ka jol* koi Solomona, atreine hi nyidrë qejepengön asë koi eahlo.
3 Kola öhn hnene la joxu föe ne Sheba la inamacane i Solomona, me hnalapa i joxu hnei nyidrëti hna xup, 4 memine la xen hna hnëkën, memine la aqane alapane la itre atre i joxu ngöne la laulau, me aqane eli xen ne la itre hlue i nyidrë, me iheetrene la itre hlu, me itre ka nei ime i joxu, me itre iheetre i angatr, me itre huuj ne dreuth asë hnei Solomona hna huujën hnine la uma ne hmi Iehova. Matre ame la eahlo a öhne asë lai, hnei eahlo hna pane cile thaup. 5 Öni eahlo jë hi koi joxu ka hape: “Nyipici asë hi la nöjei ewekë hnenge hna dreng ngöne la nöjeng, göi itre huliwa* i nyipë, me inamacan i nyipë. 6 Tha jelenyipicine kö ni la eni a dreng la hna qaja göi nyipë, uti hë la eni a traqa e celë, me sipu öhn. Ngo co hi la hna porotrikëne koi ni göne la etrune la inamacane i nyipë, ke sisitria catre pala kö hune la hnenge hna dreng. 7 Manathithi ka tru kowe la itre atre i nyipë, me itre hlue i nyipë ka ce mel me nyipë, troa drenge la itre trengewekë ka inamacane i nyipë. 8 Epi troa atrunyi Iehova Akötresi nyipë, atre ami nyipë hune la therone i nyidrë, matre troa joxu i Iehova Akötresi nyipë, ke tru la hnei nyidrëti hna hnimi nyipë. Nge Iehova Akötresi nyipë a hnimi Isaraela, celë hi matre nyidrëti a acili nyipë troa joxu ne la nöje ce, matre ameköti ewekë hnyawa, me mus thenge la meköt. Nge matre tro pala hi la nöje ce a mel.”
9 Thupene lai, eahlo a hamëne pi koi joxu la 120 lao talane gool, me itre trenge oel ne göti, me itre etë ka tru thupen. Qaane ju hi lai, pëkö ala cas ka hane traqa fë oel ne göti, tune la aqane kuca ne la joxu föe ne Sheba koi Solomona joxu.
10 Nge hnene la itre hlue i Hirama me itre hlue i Solomona ka traqa fë gool qa Ofira, hna hane traqa fë sinöe alemuga,* me itre etë ka tru thupen. 11 Matre hnene la joxu hna xome la itre sinöe alemuga, troa kuci ija thatraqane la uma ne hmi Iehova, me hnalapa i joxu, me itre arp, me nyine elo miuzik ka hetre filen, thatraqane la itre ka nyima. Kolo petre hi a hane öhne la sinöe ka tun hnine la nöje Iudra.
12 Nge ame Solomona joxu, hnei nyidrëti hna hamëne kowe la joxu föe ne Sheba, la nöjei ewekë hnei eahlo hna ajan, me nöjei ewekë hnei eahlo hna sipon. Nge tru catre hmaca kö la hnei nyidrëti hna hamën, hune la hnei eahlo hna traqa fë.* Thupene lai, eahlo a ce bëeke jë me itre hlue i eahlo, kowe la nöje i eahlo.
13 E nöjei macatre, Solomona a kapa la 666 lao talane gool, 14 nge kolo hi lai a nyixane la hna hamën hnene la itre ka saleme* trootro, me itre xa ka salem, me nöjei joxu ne Arab, me itre gavena ne la nöj, itre ka traqa fë gool me sileva koi Solomona.
15 Hnei Solomona joxu hna kuca la 200 lao petr ka tru hnei gool hna ithuenyikön. (Troa 600 sekele* gool hna ithuenyikön nyine pele goolëne la isa ca petr ka tru.) 16 Hnei joxu hna kuca fe la 300 lao neköi petr* gool ka co hna ithuenyikön. (Troa köni mina* gool nyine pele goolëne la isa ca neköi petr.) Nge hnei joxu hna amë la itre neköi petr, hnine la Hnalapa Ne La Hnaxulu Ne Lebanona.
17 Nge hnene la joxu hna kuca la ketre theron atraqatr, hna kuca hnei jiane elefa, nge nyidrëti a heetrën asë jë hnei nyipi gool. 18 Nge hetre eskalie ka sikisi lao nyine tro waja troa elë kowe la theron, nge hetre hnë ati waca gool hna acatren kowe la theron. Nge ngöne la lue götrane la theron, hetre hnë ati im, nge kola lapa ezin la lue liona. 19 Nge ngöne la lue götrane la sikisi lao nyine tro waja, hna amë la ca liona, matre kola e la 12 lao liona. Nge pëkö xa baselaia ka hetre theron tune la therone celë. 20 Nge ame la nöjei nyine iji Solomona, ke hna kuca asë hi hnei gool. Nge ame la nöjei ewekë ne la Hnalapa Ne La Hnaxulu Ne Lebanona, hna kuca asë hi hnei nyipi gool. Pëkö ewekë sileva, ke ngöne la ijine i Solomona, hna wangacone la sileva. 21 Ke eje hi, ame la itre he ne la joxu ka tro qa Tasesa, nge hna iujin hnene la itre hlue i Hirama, itre ej a bëek thupene la köni macatre, nge ka tiqa hnei gool, me sileva, me jiane elefa, me cako, me tuki.*
22 Matre trenamo catre kö Solomona, nge inamacane kö nyidrë hune la itre joxu asë e cailo fen. 23 Itre joxu qa ngöne la nöjei nöj a sipone troa kepe* angatr hnei Solomona, matre troa drenge la inamacan hna hamë nyidrë hnene la nyipi Akötresie. 24 Angatr a isa traqa fë ahnahna koi Solomona, itre ewekë sileva me gool, me itre iheetr, me itre jia ne isi, me oel ne göti, me itre hos, me itre miul. Hna traqa tune pala hi e nöjei macatre. 25 Nge thei Solomona la 4 000 lao hnahage i hos, me itre ikatr, me 12 000 lao hos.* Nyidrëti a pane amë ju la itre xan ngöne la itre traon ne ami ikatr, nge itre xan e Ierusalema, ezine la hnalapa i nyidrë. 26 Nyidrëti a mus kowe la itre joxu, qane la Hneopegejë* uti hë la nöj i angetre Filisiti, nge uti fe hë la ifego ne Aigupito. 27 Hnei Solomona hna kuca matre tiqa pi Ierusalema hnei sileva, kösë itre etë, nge tiqa pi hnei sinöe arasi, kösë sukamore ne Sefela. 28 Nge kola traqa fë koi Solomona la itre hos qa Aigupito, me qa ngöne la itre xa nöj.
29 Nge ame la mele i Solomona ngöne la qan uti hë la pun, hna fejan asë hnine la itre hna cinyihan hnei Nathana perofeta, me hnine la hna perofetan hnei Ahia qa Silo, me ngöne la hna qejepengön la itre pu i Ido atre qeje pu, göi Ieroboama nekö i Nebatha. 30 Haawe, traqa koi 40 lao macatre ne musi Solomona e Ierusalema hui Isaraela asë. 31 Thupene lai, hnei Solomona hna meköl memine la itre qaaqaa i nyidrë ngöne la mec, nge hna kelemi nyidrë hnine la Traone i Dravita keme i nyidrë. Matre Reoboama nekö i nyidrë, la hna acil troa nyihna i nyidrë.