Hnaaluene Tus i Aqane Lapa Itre Joxu
10 Ame hnei Reoboama hna tro Sekema, ke Isaraela asë hë e Sekema troa acili joxu nyidrë. 2 Nge drenge hë Ieroboama nekö i Nebata, (ngöne la ijine cili, angeice pala kö e Aigupito, ke hnei angeice hna kötre Solomona joxu.) matre angeic a canga bëeke hmaca ju qa Aigupito. 3 Nge hnene la itre atr hna traqa troa thei Ieroboama, nge hnei angeic memine la angetre Isaraela asë hna tro koi Reoboama, me hape: 4 “Hnene la keme i nyipë hna ahacene la ehnefe hun, ngo maine tro nyipëti a ahmaloeëne la huliwa hna athip hnene la keme i nyipë, nge maine tro nyipëti a ahmaloeëne la hnei nyidrëti hna ahacenyi hun, tro hë huni a nyihlue i nyipë.”
5 Matre öni Reoboama ka hape: “Bëeke hmaca jë koi ni thupene la köni drai.” Matre angatr a tro hmaca pi. 6 Ame hnei Reoboama hna thele eamo thei itre qatr, itre ka huliwa koi Solomona keme i nyidrë, lo mele pala kö nyidrë. Öni Reoboama: “Nemene la nyine tro ni a sa koi angatr?” 7 Nge öni angatre jë hi ka hape: “E tro nyipëti a loi hni kowe la nöj, me amadrinë angatr, nge e tro nyipë a sa amenyikene koi angatr, tro hë angatr a nyihlue i nyipë epine palua.”
8 Ngo tha kapa kö nyidrë la eamo ne la itre qatr, matre hnei nyidrëti hna hnying kowe la itre sine xötre i nyidrë, lo itre ka huliwa koi nyidrë. 9 Öni nyidrë: “Hnene la nöje celë hna sipo ni, troa ahmaloeëne la ehnef hnei kaka hna atë hui angatr, matre nemene la nyine tro ni a sa koi angatr?” 10 Önine jë hi la itre sine xötre i Reoboama ka hape: “Ame kowe la nöj ka qaja koi nyipë ka hape, ‘Hnene la keme i nyipë hna ahacene la ehnefe hun, ngo loi e tro nyipëti a ahmaloeën,’ qaja jë, ‘Tro kö la hene wanakoimeng ka co, a isaisa hune la gö i kaka.’* 11 Hnei kaka hna sili ehnefe ka hace koi epun, ngo tro hmaca kö ni a ahacene catrën. Hnei kaka hna lepi epun hnei none kau, ngo tro ni a lepi epun hnei none kau ka hetre faon.’”
12 Ngöne la hnaakönine drai, hnei Ieroboama me itre sinatronge i angeic, hna bëeke hmaca koi Reoboama joxu. Ke öni nyidrëti lo: “Bëeke hmaca jë koi ni thupene la köni drai.” 13 Nge ka catre la aqane sa i Reoboama koi angatr. Tha kapa kö nyidrëti lo eamo ne la itre qatr. 14 Ngo hnei nyidrëti hna trongëne la eamo ne la itre thupëtresij. Matre öni nyidrë: “Tro hmaca kö ni a ahacene catrëne la ehnefe i epun. Hnei kaka hna lepi epun hnei none kau, ngo tro ni a lepi epun hnei none kau ka hetre faon.” 15 Haawe, tha kapa kö joxu la sipo ne la nöj, ke qaathene la nyipi Akötresie la ewekë cili. Eje hi, hna traqa tun matre eatre jë la hnei Iehova hna qaja koi Ieroboama nekö i Nebata, jëne Ahia qa Silo.
16 Nge pine laka, xele kö joxu ma drei angatr, öni angatre jë hi: “Drei pena lae Dravita! Pëkö edrö së qaathene la nekö i Iese. Haawe angetre Isaraela,* isa bëeke jë koi isa hazen! Ngo Dravita, qaan enehila, ketre wange ju kö nyipë la fami nyipë!” Thupene lai, angetre Isaraela a isa bëeke jë kowe la itre hnalapa i angatr.*
17 Ngo Reoboama pala hi la ka mus, hune la angetre Isaraela ka mel ngöne la itre traon ne Iudra.
18 E thupen, hnei Reoboama joxu hna upi Hadorama, tane la itre hna up troa huliwa koi joxu, troa wai angetre Isaraela. Ngo hnei angatr hna tranyi angeice hnei etë. Nge ame Reoboama joxu, hnei nyidrë hna canga sesë kowe la ikatr i nyidrë, me kötr a tro Ierusalema. 19 Nge qaane ju hi lai, hnene la angetre Isaraela hna icilekeu memine la fami i Dravita.