Hnaaluene Tus i Aqane Lapa Itre Joxu

29 Traqa koi 25 lao macatre i Hezekia lo kola acili joxu nyidrë. Hnei nyidrëti hna mus koi 29 lao macatre e Ierusalema. Abia la ëjene la thine i nyidrë, nge nekö i Zakaria eahlo. 2 Hnei nyidrëti hna kuca la loi qëmeke i Iehova, tune lo aqane kuca i Dravita qaaqaa i nyidrë. 3 Ngöne la pane treu ne la pane macatre ne mus i nyidrë, hnei nyidrëti hna fe la itre qëhnelö ne la uma ne hmi Iehova, me kuca hnyawane hmaca. 4 Thupene lai, nyidrëti a hëne jë la itre atre huuj me angetre Levi, me acasi angatr ngöne la götrane gaa pë ihakun e koië. 5 Öni nyidrëti jë hi: “Pane drei ni ju angetre Levi. Enehila, ahmitrötrë nyipunieti jë, nge ahmitrötrëne* jë la uma i Iehova Akötresi ne la itre qaaqaa i nyipunie. Nge xometrije pi qa ngöne la götrane gaa hmitrötr, la itre ewekë ka pui ngazo. 6 Ke hnene la itre keme së hna tha mele nyipici, nge hnei angatr hna kuca la ngazo qëmeke i Iehova Akötresi së. Hnei angatr hna tha nyipine la uma maano i Iehova, me hutrö koi nyidrë.* 7 Nge hnei angatre fe hna thinge la itre qëhnelö ne la poretiko, me apine la itre lam, nge tha hnei angatre hmaca kö hna dreuth la itre ka pui loi, me tro fë la itre huuj ne dreuth asë kowe la Akötresi Isaraela, ngöne la götrane gaa hmitrötr. 8 Ame hnei Iehova hna elëhni koi Iudra me Ierusalema, matre ame hë la itre atr a goeën la lue traone cili, angatr a xou me sesëkötr, me qej,* nge öhne fe hi epun. 9 Celë hi matre hna humuth hnei taua la itre qaaqaa së, nge hna xome kowe la nöje trenyiwa la itre nekö së trahmanyi me jajiny, me itre föe së. 10 Enehila, eni a ajane troa isisinyikeu me Iehova Akötresi Isaraela, matre lapa kötre pi la elëhni atraqatre i nyidrëti koi së. 11 Haawe itre nekönge fe, tha ijine tro kö nyipunie a wangacone* la huliwa, ke hnei Iehova hna ië nyipunie troa cil qëmeke i nyidrë, me huliwa, me huhajine la itre huuj koi nyidrë.”

12 Ame hë la kola drenge lai hnene angetre Levi, angatr a canga enije jë. Thene la angetre Kohatha: Mahatha nekö i Amasai, me Ioela nekö i Azaria. Thene la angetre Merari: Kiso nekö i Abedi, me Azaria nekö i Iehaleela. Thene la angetre Geresoma: Ioa nekö i Zima, me Edena nekö i Ioa. 13 Thene la itre nekö i Elizafana: Simeri me Ieiela. Thene la itre nekö i Asafa: Zakaria me Matania. 14 Thene la itre nekö i Heman: Iehiela me Simei. Thene la itre nekö i Ieduthun: Semaia me Uziela. 15 Ame hnei angatr hna icasinekeun la itre trejin me angatr, me ahmitrötrë angatr me traqa, tune lo hna amekötin hnei Iehova jëne la joxu. Nge angatr a ahmitrötrëne jë la uma ne hmi Iehova. 16 Hnene la itre atre huuj hna lö hnine la uma ne hmi Iehova troa ahmitrötrën ej. Thupene lai, angatr a xome pi qa hnine la uma ne hmi Iehova, la nöjei ewekë ka pui ngazo, me amë ngöne la götrane gaa pë ihakun ne la uma ne hmi Iehova. Ame hnene la angetre Levi hna eöth asë, me xom kowe la hnathup ne Kederon. 17 E cili, hnei angatr hna nyiqaane la huliwa ne iahmitrötrë qaane la pane drai ne la pane treu. Nge ngöne la hna 8 ne drai ne la treu, traqa ha angatr kowe la poretiko i Iehova. Matre 8 lao drai ne angatr a pane ahmitrötrën la uma ne hmi Iehova. Nge ame hë la hna 16 ne drai ne la pane treu, fenesi hë la huliwa.

18 Thupene lai, angatr a tro ju koi Hezekia joxu, me hape: “Ase hë huni ahmitrötrën asë la uma i Iehova, memine la ita ne tro fë huuj ne dreuth asë, me nöjei ewekë ka ce tro memin, me laulau nyine amë la itre falawa hna iatëkeun,* me nöjei ewekë ka ce tro memin. 19 Ame la nöjei ewekë hnei Ahaza joxu hna amë acon ngöne lo ijine musi nyidrë, lo nyidrëti a tha mele nyipici, ase hë huni hnëkën me ahmitrötrën. Nge itre ej fe hë qëmekene la ita ne huuje i Iehova.”

20 Ame hnei Hezekia joxu hna canga ilë, me hëne la itre he ne nöj ngöne la traon, nge angatr a ce elë jë kowe la uma ne hmi Iehova. 21 Angatr a traqa fë pi la 7 lao kau, me 7 lao nani trahmany, me 7 lao neköi mamoe, me 7 lao mamoe trahmany, nyine huuj ne ngazo thatraqane la itre atrene la hnanyi joxu, me itre atrene la uma ne hmi, me itre atre Iudra. Thupene lai, hnene la joxu hna sipon kowe la itre atre huuj, itre matra i Arona, troa huujën itre ej hune la ita ne huuje i Iehova. 22 Angatr a humuthe pi la itre kau, me thathane la ita ne huuj hnene la madra. Nge angatr a humuthe pi la itre nani trahmany, me thathane la ita ne huuj hnene la madra. Nge angatr a humuthe pi la itre neköi mamoe, me thathane la ita ne huuj hnene la madra. 23 Thupene lai, hnei angatr hna easenyine la itre mamoe trahmany, lo huuj ne la ngazo, me amë qëmekene la joxu memine la icasikeu asë. Nge angatr a ati ime ju hune la itre mamoe trahmany. 24 Ame hnene la itre atre huuj hna humuth itre ej, me huujën nyine huuj ne ngazo. Angatr a nenge pi la madra hune la ita ne huuj, lo madra ne aloine la nöje Isaraela asë. Ke hnene la joxu hna qaja ka hape, troa kuca la huuj ne dreuth asë me huuj ne la ngazo, thatraqane la nöje Isaraela asë.

25 Ngöne la ijine cili, hnene la joxu hna acil la angetre Levi hnine la uma ne hmi Iehova, me itre sëbal, me itre nyine elo miuzik ka hetre filen, me itre arp, thenge lo hna amekötin hnei Dravita, me Gada atre qeje pu i joxu, me Nathana perofeta. Ke ewekë lai hna amekötin hnei Iehova, jëne la itre perofeta i nyidrë. 26 Matre hnene la angetre Levi hna cil e cili, memine la itre nyine elo miuzik i Dravita. Nge itre atre huuj a cile fë la itre trutru.

27 Ame hnei Hezekia hna amekötin troa tro fë huuj ne dreuth asë hune la ita ne huuj. Matre ame ju hi la kola nyiqaane kuca la huuj ne dreuth asë, kolo fe hi a nyiqaane nyima koi Iehova, me ufi trutru. Itre trutru a xötrethenge la nin ne la itre nyine elo miuzik i Dravita, joxu ne Isaraela. 28 Nge hnene la icasikeu asë hna thil, lo kola nyima me ufi trutru. Hna kuca tun uti hë la kola ase tro fë la huuj ne dreuth asë. 29 Nge ame ju hi la kola ase tro fë huuj ne dreuth asë, hnene la joxu me nöjei sinatronge i nyidrë, hna sa iwatingöneca me thil. 30 Thupene lai, hnei Hezekia joxu me itre he ne nöj, hna sipon koi angetre Levi troa atrunyi Iehova me thinge la nyima i Dravita, me Asafa atre qeje pu. Matre madrine catr angatr troa atrunyi nyidrë, nge angatr a sa iwatingöneca pi me thil.

31 Öni Hezekia jë hi: “Pine laka, ase hë ahmitrötrë* epun koi Iehova, trohemi hë troa tro fë la itre huuj, me itre huuj ne ole kowe la uma i Iehova.” Ame hnene la icasikeu asë hna traqa fë la itre huuj, me itre huuj ne ole. Nge ame la nöjei atr ka ajane troa hamë ewekë, angatr a traqa fë la itre öni thatraqane la itre huuj ne dreuth asë. 32 Hane hi la etrune la itre öni hna traqa fë hnene la icasikeu: 70 lao kau, me 100 lao nani, me 200 lao mamoe. (Itre huuj ne dreuth asë thatraqai Iehova). 33 Nge ame pena la itre huuj ka hmitrötr, kola e la 600 lao kau, me 3 000 lao mamoe. 34 Ngo tha ijije kö la itre atre huuj troa ule la kupeine la itre öni thatraqane la itre huuj ne dreuth asë, matre hnene la angetre Levi, itre trejin me angatr, hna xatua angatr uti hë la kola ase la huliwa, nge uti hë la itre atre huuj a ase ahmitrötrë angatr. Ke eje hi, tru catre kö la aqane akötrehnin* angetre Levi troa ahmitrötrë angatr, hune la itre atre huuj. 35 Ketre, nyimutre catre la itre huuj ne dreuth asë, me itre sine giris ne la itre huuj ne tingeting, me itre waina nyine fii huuj ne dreuth asë. Celë hi aqane acile* hmaca la huliwa hnine la uma ne hmi Iehova. 36 Ame hnei Hezekia memine la nöj asë, hna madrin la nöjei ewekë hna kuca hnene la nyipi Akötresie kowe la nöj, ke hna aca tro traqa hi.