Salamo

107 Olene jë koi Iehova, ke ka lolo nyidrë;

Ka epine palua la ihnimi nyipici i nyidrë.

 2 Loi e troa qaja lai hnene la itre hna itön hnei Iehova,

Lo itre hna itön qa ngöne la ime* ne la itre ithupëjia,

 3 Lo hnei nyidrëti hna acasin qa ngöne la itre nöj

Qa koië me kuë,*

Me qa kolopi me kolojë.

 4 Hnei angatr hna tro menu ngöne la hnapapa, ngöne la gaa pë atr;

Tha öhne kö angatre la ketre gojeny ne tro kowe la traon nyine lapan.

 5 Angatre lo a mecijiin me pi ij;

Angatr hë a troa kei, ke genyi catre hë angatr.

 6 Ngöne la akötr, hnei angatr hna treije koi Iehova;

Ame hnei nyidrëti hna amele angatr qa ngöne la akötre i angatr.

 7 Hnei nyidrëti hna eatrongë angatr ngöne la nyipi gojeny

Matre tro angatr a traqa ngöne la traon nyine lapan.

 8 Haawe, loi e troa olene koi Iehova pine la ihnimi nyipici i nyidrë

Me kowe la itre huliwa i nyidrë nyine hain thatraqane la itre nekö i atr.

 9 Ke hnei nyidrëti hna thue imen la atre pi ij

Me amejine la ka mecijiin hnei xeni ka loi.

10 Hnei itre xan hna lapa ngöne la itre gaa mit,

Hna othi angatr hnene la akötr me fao.

11 Ke hnei angatr hna icilekeu memine la trengewekë i Akötresie;

Hnei angatr hna tha metrötrëne la eamo ne la Ka Draië Catr.

12 Hnei nyidrëti hna thaipiëne la hni i angatr hnene la itre akötr;

Hnei angatr hna kei, nge pëkö ka xatua angatr.

13 Ngöne la akötr, hnei angatr hna sipo ixatua koi Iehova;

Hnei nyidrëti hna amele angatr qa ngöne la akötre i angatr.

14 Hnei nyidrëti hna lö sai angatr qa ngöne la itre gaa mit,

Me axecien la itre ceine i angatr.

15 Haawe, loi e troa olene koi Iehova pine la ihnimi nyipici i nyidrë

Me kowe la itre huliwa i nyidrë nyine hain thatraqane la itre nekö i atr.

16 Ke hnei nyidrëti hna thöne la itre qëhnelö kopa

Me hutra la itre agö fao.

17 Itre ka hmo angatr nge tru la hleuhleu

Pine la itre ngazo i angatr me itre tria i angatr.

18 Patre hë la aja i angatr troa xen la nöjei pengöne xen;

Hnei angatr hna easenyine la itre qëhnelö ne la mec.

19 Ngöne la angatr a treij, hnei angatr hna sipo ixatua koi Iehova;

Hnei nyidrëti hna amele angatr qa ngöne la akötre i angatr.

20 Hnei nyidrëti hna upe la trengewekë i nyidrë me ameunyi angatr

Me amele angatr qa ngöne la itre hnaop, lo hnei angatr hna kei ngön.

21 Haawe, loi e troa olene koi Iehova pine la ihnimi nyipici i nyidrë

Me kowe la itre huliwa i nyidrë nyine hain thatraqane la itre nekö i atr.

22 Loi e troa tro fë la itre huuj ne ole*

Me sue madrine fë la itre huliwa i nyidrë.

23 Ame la itre ka nyinyapëne la hnagejë hune la itre he,

Nge ka huliwa hune la itre tim atraqatr,

24 Ke hnei angatr hna öhne la itre huliwa i Iehova

Me itre huliwa i nyidrë nyine hain ngöne la hnagejë;

25 Hnei angatr hna öhn la kola mejë la wene, hnene hi la hnei nyidrëti hna amekötin,

Memine la aqane amejëne la itre hoke ne gejë.

26 Itre ka ti he a elë draië;

Angatr a uti kowe la itre gaa jui.

27 Kola enuenu la he i angatr me keikei, tune la atr ka hnaitö,

Nge ame la hnei angatr hna atre, ke gufa ha.

28 Ngöne la akötr, hnei angatr hna treije koi Iehova,

Hnei nyidrëti hna amele angatr qa ngöne la akötre i angatr.

29 Hnei nyidrëti hna aupune la wene;

Pë ju hi mejene la itre hoke ne gejë.

30 Angatr a madrin la kola hao drai,

Nge nyidrëti a bëeke sai angatr kowe la hna xepe hnei he.

31 Haawe, loi e troa olene koi Iehova pine la ihnimi nyipici i nyidrë

Me kowe la itre huliwa i nyidrë nyine hain thatraqane la itre nekö i atr.

32 Loi e troa atrunyi nyidrë nyipine la icasikeu ne la nöj,

Loi e troa atrunyi nyidrë nyipine la lapa* ne la itre qatre thup.

33 Nyidrëti a saze la itre hneopegejë matre hnapapa

Me aqaqacilëne la itre qeqe ne tim,

34 Me saze la ihnadro ka wa matre troa lapan hnei sotr,

Pine la ngazo ne la itre ka lapan ej.

35 Nyidrëti a saze la hnapapa matre nyi tim hna lapan hnei rozo,

Memine la ihnadro ka qaqacil hnei qeqe ne tim.

36 Nyidrëti a alapan e cili la itre ka mecijiin,

Matre tro angatr a xupe la traon nyine lapan.

37 Angatr a jumi feja ngöne la hlapa me traane la itre vin

Itre ka wa wen atrun.

38 Nyidrëti a amanathithi angatr, nge kola elë la etru i angatr;

Tha nyidrëti kö a nu troa co trootro la etrune la itre öni i angatr.

39 Ngo ala xalaithe hmaca ha angatr, nge kola thaipië angatr

Pine la iaxösisi, me hleuhleu, me akötr.

40 Nyidrëti a axulune la imethinë thene la itre he ne nöj

Me upi angatr troa tro menu ngöne la hnapapa ka pë gojeny.

41 Ngo nyidrëti a thupëne* la itre ka pë mo qa ngöne la iakötrë

Me amanane la itre fami i angatr, tune la hnëng öni.

42 Ame la kola öhne lai hnene la itre atr ka meköt, angatr a madrin;

Ngo kola lapa thaup hnene la itre atr ka tha meköti kö.

43 Tro la itre atr ka inamacan a öhne la itre ewekë cili

Me mekun hnyawa la itre huliwa ne ihnimi nyipici i Iehova.