Esetera
3 Thupene lai, hnei Asueru joxu hna atrunyi Hamana nekö i Hamedatha qa Agaga. Hna acili angeic hune la itre xa he ne nöj ka ce me angeic. 2 Nge ame asë hi la itre ka huliwa koi joxu, nge ka cil ngöne la qëhnelö ne la hnalapa i joxu, angatr asë a thil me sa iwatingöneca qëmeke i Hamana, ke hna amekötin hnei joxu. Ngo ame Modikai, xele kö angeic ma thil me sa iwatingöneca koi Hamana. 3 Matre hnene la itre ka huliwa koi joxu, nge ka cil ngöne la qëhnelö ne la hnalapa i joxu, hna hnyingë Modikai ka hape: “Hnauëne laka, tha metrötrëne kö eö la hnei joxu hna amekötin?” 4 Nge e nöjei drai, casi pala hi la hnyinge i angatre koi Modikai, ngo xele kö Modikai ma drei angatr. Nge pine laka, hnei Modikai hna qaja koi angatr ka hape, atre Iudra angeic, hnei angatr hna canga qajaqaja koi Hamana, matre wange ka hape, tro jë kö Hamana a nue la aqane ujë i angeic.
5 Ngo ame hë la Hamana a öhne laka, xele kö Modikai ma thil maine sa iwatingöneca qëmekei angeic, elëhni jë hi angeic. 6 Nge angeic a pi humuthi* Modikai, ngo tha Modikai casi kö, ke ase hë qaja koi angeic la nöje i Modikai. Matre qane ju hi lai, hnei Hamana hna thele la aqane tro angeic a apatren asë la nöje i Modikai, ene la nöjei atre Iudra ka mel ngöne la baselaia i Asueru.
7 Nge ame hë la kola 12 lao macatre ne mus i Asueru, ngöne la pane treu, ene la treu Nisan,* hna kuiëne la Purim (hna uthitrikitr) qëmekei Hamana, matre troa mama la drai memine la treu ka lolo. Ame hna mama la hna 12 ne treu, ene la treu Adara. 8 Nge hnei Hamana hna qaja koi Asueru joxu ka hape: “Hetre nöj ka lapa ngöne la nöjei provës ne la baselaia i nyipë, angatr a lapa nyipine la itre xa nöj. Isapengöne kö la itre wathebo i angatr me itre wathebo ne la itre xa nöj, nge tha trongëne kö angatre la itre wathebo i joxu. Haawe, tha nyine loi kö koi joxu e troa nue angatr troa mele tingeting. 9 Matre e ka loi koi joxu, troa fejane la ketre hna amekötin matre humuthi angatr asë. Nge tro hë ni a hamëne la 10000 lao talane* sileva kowe la itre ka huliwa koi joxu, matre tro angatr* a kuiën kowe la trengamo i joxu.”
10 Ame hnei joxu hna hule la otrene wanakoim i nyidrë nyine pelehatren, nge nyidrëti a line pi koi Hamana nekö i Hamedatha qa Agaga, lo ithupëjia me angetre Iudra. 11 Nge öni joxu koi Hamana: “Ase hë hamë eö la nöj me mani. Kuca jë la aja i ö.” 12 Ame hna hëne la itre sekreter i joxu ngöne la hna 13 ne drai ne la pane treu. Hnei angatr hna fejan ngöne la itre aqane cinyihan ne la itre provës, me ngöne la itre qene hlapa ne la nöjei nöj, la itre hna amekötin hnei Hamana kowe la itre tane provës, me itre gavena hna acil ngöne la itre provës, me nöjei he ne nöj. Hna fejane lai ngöne la ëje i Asueru joxu, me pelehatren hnene la otrene wanakoime i nyidrë.
13 Ame hna iupi fë la itre tus jëne la itre ka tro fë maca. Hna iupi fë ngöne la nöjei provës i joxu. Hna amekötin troa humuth, me apatren, me apëne hnyawa la nöjei atre Iudra, itre xötre ka co me itre qatr, itre föe me itre nekönatr. Troa humuthi angatr asë ngöne la ca drai, ene la hna 13 ne drai ne la hna 12 ne treu, lo treu Adara. Nge tro fe a thapa asë la itre mo i angatr. 14 Nge ame la tusi cili, hna fejan ngöne la nöjei provës, matre tro ej a ketre wathebo nyine trongën. Nge troa e la alien kowe la nöjei nöj, matre tro angatr a hnëkë kowe la drai cili. 15 Nge hnene la itre ka tro fë maca hna canga tro, ke hna amekötin hnei joxu. Matre hna mama la hna amekötine cili e Susani, lo traon hna eköhagen. Nge ame ngöne la ijine cili, kola pane ij hnene la joxu me Hamana, nge itre atrene Susani a sesëkötre ngazo.