Esetera
4 Ame hë la Modikai a atre la ewekë ka traqa, angeic a tha zezene pi la iheetre i angeic, me heetrë ibëeke ka tru thenyin, nge angeic a sië hnatresijine jë la he i angeic. Thupene lai, hnei angeic hna tro nyipine la traon, me hokötr hnei hleuhleu. 2 Angeic a cile ju qëmekene la qëhnelö ne la uma i joxu, ke hna wathebon kowe la atre ka heetrë ibëeke ka tru thenyin troa lö e cili. 3 Nge ame ngöne la nöjei provës ka kapa la hna qaja me amekötin hnei joxu, angetre Iudra a hnëmec, me tha xen, me itreijeny, me treije latresi. Nge ala nyimu fe la itre ka meköl hune la itre ibëeke ka tru thenyin me hnatresij. 4 Matre ame hë la itre hlue jajiny, me itre eunuka i isola Esetera a thuemacanyi eahlo, ngazo pi hi la hni eahlo, nge hnei eahlo hna iupi fë iheetr koi Modikai, me upi angeic troa una la ibëek ka tru thenyin. Ngo xele kö Modikai. 5 Ame hnei Esetera hna hë Hatak, ketre eunuka i joxu, lo hnei joxu hna hamëne koi Esetera. Nge hnei Esetera hna upi angeic koi Modikai, troa hnyingëne la kepin matre angeic a ujë tun.
6 Ame hnei Hatak hna tro koi Modikai ngöne la göhnë ne la traon, lo ka qëmeke kowe la qëhnelö ne la uma i joxu. 7 Nge hnei Modikai hna qaja asë la ka traqa koi angeic, memine la etrune mani hnei Hamana hna sisinyi troa kuiën kowe la trengamo i joxu, matre apatrene la angetre Iudra. 8 Nge angeic a hamëne ju koi Hatak la ketre kopi ne la hna amekötin, lo hna fejan e Susani matre troa apatrenyi angatr. Nge hnei angeic hna upi Hatak troa amamane la tus koi Esetera, me qejepengöne la jole koi eahlo, me upi eahlo troa lö koi joxu, me treije fë la nöje i eahlo koi joxu, matre tro nyidrëti a utipi angatr.
9 Ame hnei Hatak hna bëeke hmaca koi Esetera me qaja la maca i Modikai. 10 Matre hnei Esetera hna upi angeice hmaca koi Modikai memine la maca celë: 11 “Ame la nöjei atre ka huliwa koi joxu, me nöjei atrene la itre provës i joxu, atre asë hi angatre laka, e tro la ketre trahmanyi maine föe, a lö hnine la hnahag nyipine la uma i joxu, nge tha hna hë angeice kö, casi hi la pune koi angeic, troa humuthi angeic. Ngo tro hi angeic a mel, e tro la joxu a line koi angeice la sine tö gool. Nge traqa ha koi 30 lao drai hna tha hë ni koi joxu.”
12 Ngo ame hë la Modikai a drenge la maca i Esetera, 13 hnei angeic hna iupi fë la maca celë koi eahlo: “The mekune kö laka, eö ngöne la fami joxu, matre tha tro kö a hane humuthi ö tune la itre xa atre Iudra. 14 Ke e traqa eö lapa thaup, tro pë hë a xulu la ixatua me iamele koi angetre Iudra qa ngöne la ketre götran. Ngo ame eö memine la fami ne la keme i eö, tro epuni a mec. Nge atre drei laka, ame hi la eö a isola, ke matre troa cile kowe la jole celë?”
15 Ame hnei Esetera hna sa koi Modikai ka hape: 16 “Tro jë, nge hëne jë la nöjei atre Iudra e Susani, nge tro epuni a tha xeni koi ni. The xeni kö, nge the iji kö koi köni drai, me köni jidr. Nge tro fe ni me itre hluenge jajiny a tha xen. Nge tro hë ni a lö koi joxu, ngacama kola eni wathebo. Nge maine troa humuthi ni, nga eje hë lai.” 17 Thupene lai, hnei Modikai hna mejë me tro troa kuca asë la hnei Esetera hna upi angeic.