Esetera
7 Ame hnei Hamana memine la joxu hna tro troa xen thei isola Esetera. 2 Ngöne la hnaluene drai hmekune la kola iji waina, önine la joxu koi Esetera ka hape: “Hetre aja i nyipoti kö isola Esetera? Hetre sipo i nyipo? Tro ni a kapa. Nge maine tro ju hë nyipoti a sipone la sine la baselaiang, tro ni a hamë nyipo.” 3 Matre öni isola Esetera ka hape: “Joxu, maine nyipëti a hnimi ni, nge maine ka loi koi joxu, hane hi la ajang, eni a pi mel. Nge hane hi la sipong, epi tha tro kö a humuthe la nöjeng. 4 Ke hna ce salemë ni memine la nöjeng matre tro huni a mec, me patr, me patre palua. Ngo maine kolo hi a salemë huni troa nyihlu, nga tro ni a lapa thaup. Ngo epi tha tro kö a traqa tun, wanga troa hetre ethane kowe la joxu.”
5 Ame hnei Asueru joxu hna hnyingë isola Esetera ka hape: “Ke drei la ka ujë tun? Nge ekaa angeic?” 6 Nge öni Esetera jë hi: “Hamana la ithupëjia ka icilekeu, ke ka ngazo angeic!”
Ame hna elë la trenge xou i Hamana pine la joxu memine la isola. 7 Nge hnene la joxu hna elëhni, me mejë qa lai, me tro kowe la hnë tra iengen* ne la uma i joxu. Ame hnei Hamana hna mejë koi isola Esetera, matre tro eahlo a amele angeic, ke trotrohnine hë angeic laka, xecie hë koi joxu troa të koi angeic. 8 Ngo ame hë la joxu a bëek qa ngöne la hnë tra iengen, me lö kowe la hnë xen, öhne ju hi nyidrë la Hamana a sesë ngöne la göhnë hna mekölen hnei Esetera. Matre öni nyidrë: “Tro fe angeic a angazone la isola ngöne la sipu hnalapang?” Nge ame ju hi la joxu a qaja tun, hna canga atuthe la alameke i Hamana. 9 Nge öni Harebona, ketre hluene la joxu ka hape: “Hnei Hamana hna hnëkëne la ketre ipoto ka 50 lae kubit,* matre troa athipi Modikai, lo atre ka amelene la joxu hnene la trengewekë i angeic. Kola cile la poto ezine la hnalapa i Hamana.” Matre önine la joxu: “Angeice hi la hna troa athip!” 10 Ame hna athipi Hamana hune la ipoto hnei angeic hna hnëkën thatraqai Modikai, nge lapa kötre pi hi la elëhni i joxu.