Esetera

9 Ame ngöne la hna 13 ne drai ne la hna 12 ne treu, ene la treu Adara, lo drai ne eatrëne la trengewekë me wathebo i joxu, hnene la itre ithupëjia hna mekune troa lepi angetre Iudra la drai cili. Ngo tha eatre ju kö, ke hune kö la angetre Iudra hune la itre ka imethinë. 2 Ame ngöne la nöjei provës i Asueru joxu, hnene la angetre Iudra hna icasikeu ngöne la itre traon i angatr, matre troa isi me itre ka iakötrë. Nge pëkö ka atreine cile koi angatr, ke itre nöj asë a xouene la angetre Iudra. 3 Nge ame la itre he ne nöj ne la itre provës, me itre tane provës, me itre gavena, me itre ka huliwa koi joxu, angatr a ce xöl memine la angetre Iudra, ke angatr a xoue Modikai. 4 Eje hi, Modikai la ketre atr ka tru ngöne la hnalapa i joxu, nge hlemu hë angeic ngöne la nöjei provës, ke angeic pala hi a catre trootro.

5 Hnene la angetre Iudra hna humuth asë la itre ithupëjia hnei taua. Ke eje hi, hnei angatr hna humuth me apatren, me kuca la aja i angatr kowe la itre ka methinë angatr. 6 Nge ame e Susani, lo traon hna eköhagen, hnene la angetre Iudra hna humuth la 500 lao trahmany. 7 Hnei angatre fe hna humuthi Pasanedata, me Dalefona, me Asepatha, 8 me Poratha, me Adalia, me Aridatha, 9 me Pamaseta, me Arisai, me Aridai, me Vaezatha, 10 lo 10 lao neköi Hamana, neköi Hamedatha, lo ithupëjia me angetre Iudra. Ngo thupene la kola humuthi angatr, pëkö ca mo i angatr hnei angetre ludra hna xom.

11 Nge ngöne ju kö la drai cili, hna thuemacanyi joxu la etrune la itre atr hna humuth e Susani, lo traon hna eköhagen.

12 Matre, öni joxu koi isola Esetera ka hape: “Hnene la angetre Iudra hna humuth la 500 lao trahmany e Susani, lo traon hna eköhagen, memie lo 10 lao nekö i Hamana. Nge the qaja kö la hnei angatr hna kuca ngöne la itre xa provës i joxu! Matre hetre aja i nyipoti pala kö? Tro pala hi ni a kapa. Ngo maine hetre xa sipo i nyipo? Tro pala hi ni a hamë nyipo.” 13 Matre öni Esetera jë hi ka hape: “Maine ka meköt koi joxu, ame la hna amekötin enehila, ke tro fe a trongëne elany kowe la angetre Iudra e Susani. Nge loi e tro fe a athip la 10 lao nekö i Hamana trahmany hune la itre poto.” 14 Ame hnei joxu hna amekötine troa fejan la ketre wathebo e Susani, nge troa athipe la 10 lao neköi Hamana trahmany.

15 Celë hi matre, ame ngöne la hna 14 ne drai ne la treu Adara, hnene hmaca la angetre Iudra e Susani hna icasikeu. Nge ngöne la drai cili, hnei angatre hna humuthe la 300 lao trahmany e Susani. Ngo pëkö ca mo hnei angetre ludra hna xom.

16 Hnene la itre xa atre Iudra ka mel ngöne la itre provës i joxu, hna icasikeu troa isi. Hnei angatr hna apatrene la itre ithupëjia me angatr, me humuth la 75000 lao atr ka imethinë. Ngo pëkö ca mo hnei angetre ludra hna xom. 17 Celë hi itre ewekë ka traqa ngöne la hna 13 ne drai ne la treu Adara. Ngöne la hna 14 ne drai, hnei angatr hna lep apatrene la itre ithupëjia, me axeciën troa ce xen me ce madrin ngöne la drai cili.

18 Nge ame lo angetre Iudra ka mel e Susani, hnei angatr hna icasikeu ngöne lo hna 13 ne drai, me ngöne la hna 14 ne drai. Nge ame ngöne la hna 15 ne drai, hnei angatr hna lep apatren la itre ithupëjia me angatr, me axeciën troa ce xen me ce madrin. 19 Ngo ame la angetre Iudra ka mele pe kö ngöne la itre traon ne la itre götrane gaa nanyi, hnei angatr hna axeciëne troa ce xen, me ce madrin ngöne la hna 14 ne drai ne la treu Adara. Ketre ijine madrin me thewe edrö koi angatr.

20 Ame hnei Modikai hna cinyihane la itre ewekë ka traqa, me iupi fë tus kowe la angetre Iudra ne la nöjei provës i Asueru joxu, ngöne la gaa easenyi me gaa nany. 21 Nyidrëti a amekötin kowe la angetre Iudra troa feetëne e nöjei macatre, la hna 14 ne drai, me hna 15 ne drai ne la treu Adara. 22 Ke hnene la angetre Iudra hna lep apatrene la itre ithupëjia me angatr ngöne la lue drai cili. Nge ame ngöne la treu cili, hna nyihnane la itre treije hnei madrin, me hleuhleu hnei feet. Nge ngöne la ijine cili, tro angatr a kuci xen me ce madrin, me ihamënekeune la itre edrö, me hamë ahnahna kowe la itre ka pë ewekë.

23 Qa ngöne lai, hnene la angetre Iudra hna ce mekun troa acile la feete cili nyine qenenöj koi angatr, nge tro angatr a trongëne la itre hna amekötin hna iupi fë hnei Modikai. 24 Ke hnei Hamana, nekö i Hamedatha qa Agaga, lo ithupëjia me angetre Iudra asë, hna thele jëne troa apatrene la angetre Iudra, me kuië Puro, ene la hna uthi trikitr* matre troa axouenyi angatr, me apatrenyi angatr. 25 Ngo ame hë la Esetera a traqa koi joxu, hnei nyidrëti hna cinyanyine la ketre hna amekötine ka hape: “Tro angeic a xeni pun la ngazo hnei angeic hna mekun troa kuca kowe la angetre Iudra!” Ame hna athipi Hamana me itre nekö i angeic hune la ipoto. 26 Celë hi kepin matre hna hëne la itre drai cili ka hape, Purim,* ke hna xome la ëjen qa ngöne lo hna hape, Puro. Matre, thenge la itre hna amekötin ngöne la tusi celë, nge pine la ewekë hnei angetre Iudra hna öhn, me melën, 27 hnei angatr hna sipu axeciën koi angatre kö, me itre matra i angatr, me itre ka ce me angatre laka, tha tro kö a triane la lue drai ne feete cili. Nge tro fe a trongëne la hna cinyihan göne la lue drai cili, e nöjei macatre ngöne la ijine hna sa. 28 Tro pala hi a feetëne me atrune la lue drai cili hnene la itre matra i angatr, me itre fami, me itre provës, me itre traon. Tha tro pi kö la angetre Iudra a trian la lue drai cili hna hape, Purim. Ketre, tro pala hi la itre matra i angatr epin a feetëne la ijine cili.

29 Ame hnei isola Esetera nekö i Abihaila, me Modikai atre Iudra, hna huliwane la musi nyidro troa cinyianyine la hnaaluene tus, nyine acatrene la itre hna amekötin göi aqane troa feetëne la Purim. 30 Ame hna iupi fë la itre itus koi angetre Iudra asë, ka mel ngöne la 127 lao provës ne la baselaia i Asueru joxu. Nge hnine la itre tus, hna fejan la itre trengewekë ne tingeting me nyipici, 31 me nyine anyipicine laka, tro pala hi angatr a atrune la lue drai ne Purim ngöne la ijin hna sa, tune lo hna amekötine hnei Modikai atre Iudra, me isola Esetera, me thenge lo hnei angatre hna axeciën koi angatre kö, me itre matra i angatr göi troa tha xen me itre xëwe. 32 Nge ame la hna amekötin hnei Esetera, kola anyipicine la itre hna amekötine göne la Purim. Nge hna cinyianyine pë hë ngöne la ketre tus.