Salamo
Thatraqane la atre jumi traem. Salamo i Dravita.
140 Iehova fe, amele ni jë qaathene la itre atr ka ngazo;
Thupë ni ju qa ngöne la itre atr ka iakötrë,
2 Lo itre ka eköthe la ngazo ngöne la hni i angatr
Me thele iwesitrë e nöjei drai.
3 Angatr a xöle la itre thineme i angatr tune la thineme ne la un;
Hetre poizin ngöne la që i angatr tune la vaipa. (Sela)
4 Iehova fe, thupë ni ju qa ngöne la lue ime ne la itre atr ka ngazo;
Thupë ni ju qa ngöne la itre atr ka iakötrë,
Lo itre ka thele troa akeinyi ni.
5 Itre ka pi tru a juetrëne la ketre hnö koi ni;
Cememine la itre eno, angatr a nue ifile ezine la hmene gojeny.
Angatr a tra thethi ni. (Sela)
6 Eni a qaja koi Iehova: “Nyipëti la Akötresing.
Iehova fe, drenge ju la itre xëweng.”
7 Iehova fe Joxu Ka Sisitria, Atre Amele ni ka men,
Nyipëti a thupëne la heng ngöne la drai ne isi.
8 Iehova fe, the aejëne kö la itre aja ne la itre atr ka ngazo.
The nue kö la itre nyinyithiina i angatr troa eatr, wanga pi tru jë angatr. (Sela)
9 Loi e troa bëeke hmaca la ngazo hnei angatre hna qaja
Hune la he ne la itre ka lapa xötreithi ni.
10 Loi e troa manië angatr hnene la itre wanalep.
Loi e troa kuië angatr ngöne la eë,
Me ngöne la itre hnaop* gaa jui, matre tha tro hmaca kö angatr a mejë.
11 Loi e tha tro kö a lapa hut la atre silitrengathoi hune la ihnadro.*
Loi e tro la akötr a xötrethenge me lepe la itre atr ka iakötrë.
12 Atre hi ni laka, tro kö Iehova a isigöline la itre ka co
Me sajuëne la meköt kowe la itre ka pë ewekë.
13 Eje hi, tro la itre ka meköt a atrune la ëje i nyipë;
Tro ha lapa qëmekei nyipë hnene la itre atr ka meköt.