Isaia
4 Ngöne la drai cili, tro la 7 lao föe a ea la ketre trahmanyi me hape:
“Tro kö huni a xeni la falawa hun
Me heetrën la itre iheetre hun;
Ngo nue huni pi troa xome la ëje i nyipë
Matre tha tro hmaca kö huni a hmahma.”*
2 Ame ngöne la drai cili, tro ha mingöming me lolo la hnei Iehova hna troa acian, nge tro la itre ka kötre mel qa Isaraela a pi mama fë la hna eënyi hnene la nöj, memine la emingömingön ej. 3 Ame la itre atr ka troa lapa pe e Ziona nge hna troa nu e Ierusalema, ke troa hë angatr ka hape, itre ka hmitrötr, ene la nöjei atr ne Ierusalema hna cinyanyin ngöne la tusi ne mel.
4 Nge ame hë la ijine tro Iehova a wasinetrije la engazon* ne la itre nekö jajinyi ne Ziona, me köletrij la madra* qa Ierusalema, hnene la ua ne iameköti me uqanyine eë, 5 tro fe Iehova a xup hune la wetre Ziona, me hune la hnë icasikeu i nyidrë, la iaw me haj e lai, memine la eë ka palulu e jidr, nge tro ha heetrëne la nöj ka hmitrötr. 6 Nge tro ha hetre ihmelekap nyine ititaxapo e lai, matre nyine hnapo me hnë zae ngöne la kola traqa la itre wene me mani.