Isaia
17 Itre trengewekë göi Damaseko:
“Goeë Damaseko jë! Tha tro hmaca kö ej a traon,
Tro pë hë ej a itra etë.
2 Tro ha nuetrije la itre traon ne Aroera;
Tro pë hë itre ej a tune la hnë meköl ne la itre öni
Pëkö atr ka troa axouenyi nyudren.
3 Tro ha apatren la itre traon hna eköhagen ne Eferaima,
Nge tro ha thapa la baselaia ne Damaseko;
Nge tro hë la angetre Suria ka mele pe a öhne laka
Patre hë la lolo i angatr tune la lolo ne la angetre Isaraela,”* öni Iehova joxu ne la itre trongene isi e hnengödrai.
4 “Ame ngöne la drai cili, tro ha patre trootro la lolo i Iakobo,
Nge tro ha wegeju la ngönetrei i angeic ka egöcatr.*
5 Tro ha tune la atre thupe qitr ka menuëne la itre wene qitr
Me xawane la itre uke qitr,
Me tune la kola hleme la itre wene qitr ngöne la hnathup ne la angetre Refaima.
6 Tro pe hi a lapa la itre nyine hlem,
Tune la kola lep amalan la itre wene oliv:
Tro hi a huj la luetre maine köni wen ka hmedr, hune la picin ka draië catr,
Nge 4 maine 5 hune la itre picin ka wa wen,” öni Iehova Akötresi Isaraela.
7 Nge ngöne la drai cili, tro la trahmany a gala draië kowe la Atre xupi angeic, nge tro la luemeke i angeic a haine la Atre Ka Hmitrötr e Isaraela. 8 Tha tro kö angeic a goeëne la itre ita ne huuj, me itre huliwa ne la lue ime i angeic. Nge tha tro kö angeic a goeëne la itre ewekë hnei angeic hna kuca, ene la itre ipoto ka hmitrötr,* me itre ita ne dreu ka pui loi.
9 Ngöne la drai cili, tro la itre traon i angeic hna eköhagen a tune la ketre götran hna nuetrij ngöne la hnaxulu,
Me tune la picine sinöe hna nuetrij qëmekene la angetre Isaraela;
Tro hë itre ej a hnapapa.
10 Ke hnei ö* hna thëthëhmi Akötresie, atre amele eö;
Tha hnei ö kö hna mekune la giti ka catre i eö.
Celë hi matre, eö a kuca la itre hlapa ka mingöming
Me traan e cili la feja ne la trenyiwa.*
11 Ame ngöne la drai, eö a xupi hagene hnyawane la hlapa i ö,
Me aciane la itre feja i ö e hmakany,
Ngo tha tro kö eö a menu ngöne la drai ne wezipo me akötr ka pë nyin.
12 Drenge ju la mejene la itre nöj ka ala nyim,
Ceitui angatr memine la itre hnagejë ka holehol!
Goeëne la aqane ulili ne la itre nöj,
Itre ej a ulil tune la itre tim ka kaca!
13 Kola ulil la itre nöj tune la itre tim ka nyimutre.
Tro kö Akötresieti a wesitrë angatr, nge tro hë angatr a kötr a tro gaa nany,
Tune la kola ufe la kupeine qitr* hune la itre wetr,
Me tune la itre ka ithiny hna ufe kanoth qëmekene la udreli.
14 Ame e hej, angatr a meci hnei xou.
Ame e hmakany sine jidr, patre hë angatr.
Hane hi la edrö ne la itre ka akötrë së
Memine la thupen kowe la itre ka thapa la itre ewekë së.