Isaia
23 Trengewekë koi Turo:
Itre he ne Turo fe, sue jë!
Ke ase hë apatrene la hnë xepe hnei he; thatreine hmaca kö troa lö kow.
Qa ngöne la nöje Kitim, hna thuemacanyi angatre lai.
2 Lapa thaupu ju itre atr ka lapa ngönegejë.
Hna atrenamo* eö hnene la itre ka salem qa Sidona, lo itre ka thupa la hnagejë.
3 Ame la itre qitr ne Sihora,* memine la hna menu ngöne la hneopegejë Nil,
Ene lo thupe i ö, ke hna nyiape fë hune la itre tim ka nyimutre,
Nge celë hi ka atrenamone la itre nöj.
4 Zidona fe, hmahma jë, eö lo ecatren ne la hnagejë,
Ke önine la hnagejë:
“Tha hnenge kö hna akötr me hnaho,
Tha hnenge kö hna hiane la itre nekö trahmany, me inine la itre nekö jajiny.”
5 Tro hë sa seseu la easa dreng la maca göi Turo,
Tune lo easa dreng la maca göi Aigupito.
6 Tro jë uti hë Tasesa!
Hokötre jë itre ka lapa ngöne gejë!
7 Hapeu, celë kö lo traone i epun ka elitrauj hnei madrin qaan ekö, qaane lo itre pane drai angeic?
Hnene la itre thupaca i angeic hna tro matre lapan la itre nöje gaa nany.
8 Drei la ka axeciëne lai koi Turo,
Lo traon ka thawa la itre korona,
Lo traon laka, ame la itre ka salem, ke itre nekö i joxu,
Nge ame la itre ka kuci biznes, ke hna wangatrun ngöne la fen?
9 Hnei Iehova joxu ne la itre trongene isi e hnengödrai hna sipu axeciëne lai,
Matre troa adrone la emingömingön ej me apatren la pi tru i angeic,
Matre thaipiën asë la itre atr hna wangatrun e celë fen.
10 Nekö jajinyi ne Tasesa fe, trongëne jë la nöje i ö tune la aqane kuca ne la hneopegejë Nil.
Pëhë hnë xepe hnei he.
11 Hnei nyidrëti hna xejë la ime i nyidrë hune la hnagejë;
Hnei nyidrëti hna jumejume la itre baselaia.
Hnei Iehova hna amekötine troa apatrene la itre ihag atraqatr ne Foinike.
12 Nge öni nyidrë: “Jajinyi fe hna akötrën,
Nekö jajinyi ne Zidona fe, tha tro hmaca kö eö a madrin.
Haawe cile jë, nge tro jë a tro Kitim.
Ngo pë fe kö hnë mano i ö e cili.”
13 Goeëne jë la nöje i angetre Kaledaia.
Angatre hi, ngo tha angetre Asuria kö
La ka lepe la nöj matre hnë lapa ne la itre öni ne hnapapa.
Hnei angatr hna acil la itre ita ne thup me cile xötreith;
Hnei angatr hna thëtrij la itre ita ne thup ka catr,
Nge hnei angatr hna kuca matre itra etë pë hë.
14 Itre he ne Tasesa fe, hokötre jë,
Ke ase hë apatrene la itre ihage i epun.
15 Ame ngöne la drai cili, tro ha thëthëhmi Turo uti hë la 70 lao macatre, tune la itre drai ne la ketre joxu. Nge thupene la 70 lao macatre, tro ha traqa koi Turo tune la föe ne gojeny ngöne la nyima celë:
16 “Föe ne gojenyi fe hna thëthëhmin, xome jë la arp, nge tro kanothe jë la traon.
Elone hnyawa ju la arp;
Nyimane jë la itre nyima,
Matre tro huni a meku eö.”
17 Nge thupene la 70 lao macatre, tro Iehova a meku Turo. Tro angeic a kapa hmaca la thupe i angeic, me nyi föe ne gojeny memine la itre baselaia asë ne la fen, ngöne la nöjei götran. 18 Ngo tro ha hmitrötr koi Iehova la itre ewekë i angeic, memine la thupe i angeic. Nge tha tro kö a xawan, me amë acon la itre ewekë i angeic, ke ame la thupe i angeic, ke thatraqane pë hë la angetre lapa qëmekei Iehova, matre tro angatr a xeni mej, me heetrëne la itre iheetr ka mingöming.