Ezekiela

36 “Nge ame eö nekö i atr, perofetane jë göne la itre wetr e Isaraela ka hape: ‘Itre wetr ne Isaraela fe, drenge ju la hna qaja hnei Iehova. 2 Hane hi la hna qaja hnei Iehova Joxu Ka Sisitria: “Önine la itre ithupëjia göi epun: ‘Haha! Zi huni pë hë la itre gaa draië!’”’

3 “Qa ngöne lai, perofetane jë ka hape: ‘Hane hi la hna qaja hnei Iehova Joxu Ka Sisitria: “Hnene la itre ithupëjia me epuni hna lep apatrenyi epun, me traqa troa lepi epun qa ngöne la nöjei götran, matre kolo pë hë a musinë epuni hnene la itre ka mele pe* qa ngöne la itre xaa nöj, nge kolo pala hi a silitrengathoi epun. 4 Celë hi matre, itre wetr ne Isaraela fe, drenge ju la hna qaja hnei Iehova Joxu Ka Sisitria. Hane hi la hna qaja hnei Iehova Joxu Ka Sisitria kowe la itre wetr, me itre sasala, me itre tim ka neni, me itre hnathup, me itre itra etë ka pë atren, me itre traon hna nuetrij, lo hna atrekënö me hnyima fë hnene la itre ka mele pe qa ngöne la itre nöje xötreith. 5 Eje hi, öni Iehova Joxu Ka Sisitria koi angatr asë: ‘Ngöne la trenge ajang ka mel tune la eë, tro ni a amekötin la itre ka mele pe qa ngöne la itre nöj, me angetre Edroma asë, lo itre ka imethinë nge ka madrin troa thapa la nöjeng me itre hna axö öning, matre atrekënön.’”’

6 “Haawe, perofetane jë göne la nöje Isaraela, nge qaja ju kowe la itre wetr, me itre sasala, me itre tim ka neni, me itre hnathup ka hape: ‘Hane hi la hna qaja hnei Iehova Joxu Ka Sisitria: “Dreng! Ase hë thaipië epun hnene la itre nöj. Celë hi matre, hnene la trenge ajang me elëhning, tro ni a ewekë.”’

7 “Haawe, hane hi la hna qaja hnei Iehova Joxu Ka Sisitria: ‘Eni a li ime me sisiny laka, tro la itre nöje xötreith a sipu thue la hmahma i angatr. 8 Ngo ame epun, itre wetr e Isaraela, tro hë epuni a cia wapicin, nge tro epuni a wa wen kowe la nöjeng Isaraela, ke easenyi hë troa bëeke hmaca la nöjeng. 9 Eje hi, ce eni me epun nge tro ni a thupë epun. Tro ha eënyi epun me jumi feja hui epun. 10 Tro ni a kuca matre ala nyimu jë epun nöje Isaraela, eje hi, epuni asë. Tro ha lapane hmaca la itre traon, me xupe hmaca la itre tra etë. 11 Eje hi, tro ni a kuca matre ala nyimu jë epun me itre öni i epun; tro hë itre ej a nyimutre me mana. Tro ni a kuca matre tro hmaca ha a lapane la nöj tun ekö, nge tro ha lolo la mele i epun hun ekö. E cili, tro hë epuni a atre laka, Iehova ni. 12 Tro ni a upe la itre atr troa tro hui epun, eje hi, tro ni a upi Isaraela nöjeng. Tro hë angatr a xomi epun, matre tro pë hë epuni a edrö i angatr. Nge tha tro hmaca kö epuni a sewe angatr troa hetre nekönatr.’”

13 “Hane hi la hna qaja hnei Iehova Joxu Ka Sisitria: ‘Öni itre xan koi ö: “Eö la ketre nöj ka öni atr, nge ka sawa la itre nöj troa hetre kuku.”’ 14 ‘Haawe, tha tro hmaca kö eö a öni la itre atr, me sawa la itre nöj troa hetre kuku,’ öni Iehova Joxu Ka Sisitria. 15 ‘Tha tro hmaca kö ni a nue eö troa dreng la itre iqaqa qaathene la itre nöj, maine nue pena la itre nöj troa thele isi me eö, nge tha tro hmaca kö eö a akein la itre nöje i ö,’ öni Iehova Joxu Ka Sisitria.”

16 Ame hnei Iehova hmaca hna ithanata koi ni, me hape: 17 “Nekö i atr, ame lo nöje Isaraela a lapa ngöne la nöje i angatr, hnei angatr hna adron ej hnene la itre thiina i angatr me itre aqane ujë i angatr. Ame koi ni, ceitu la aqane ujë i angatr memine la föe ka pui ngazo ngöne lo kola meci föe. 18 Celë hi matre, hnenge hna nenge la elëhning hui angatr pine la madra hnei angatr hna anenin ngöne la nöj, nge pine angatr adron la nöj hnene la itre idrola i angatr ka sis.* 19 Matre hnenge pë hë hna upi angatr nyipine la itre nöj, me aisaije angatr e cailo fen. Hnenge hna ameköti angatr thenge la thiina i angatr, me aqane ujë i angatr. 20 Ngo ame ju hi la angatr a traqa kowe la itre nöje cili, hnene la itre atren hna adrone la ëjeng ka hmitrötr, me qeje angatr ka hape: ‘Angatre hi lo nöje i Iehova, ngo hna upi angatr troa tro qa ngöne la nöje i nyidrë!’ 21 Matre tro hë ni a isigöline la ëjeng ka hmitrötr, lo hna adron hnene la nöje Isaraela nyipine la itre nöj hnei angatr hna tro kow.”

22 “Qa ngöne lai, qaja jë kowe la nöje Isaraela ka hape: ‘Hane hi la hna qaja hnei Iehova Joxu Ka Sisitria: “Nöje Isaraela, tha eni kö la a isigöli epun, ngo ëjeng ka hmitrötre pe, lo hnei epuni hna adron nyipine la itre nöj hnei epuni hna tro kow.”’ 23 ‘Eje hi, tro kö ni a ahmitrötrëne la ëjeng ka draië, lo hna adron nyipine la itre nöj, lo hnei epuni hna adron nyipi angatr. Nge tro hë la itre nöj a atre e cili laka, Iehova ni, ngöne la kola troa ahmitrötrë ni qëmekei angatr nge nyipi epun,’ öni Iehova Joxu Ka Sisitria. 24 ‘Tro ni a xomi epun qaathene la itre nöj, me acasi epun qa ngöne la nöjei götran asë, me bëeke sai epun kowe la nöje i epun. 25 Tro ni a fii epuni hnei tim ka porop, nge tro hë epuni a wië; tro ni a apuiloinyi epun qa ngöne la nöjei ngazo i epun, me itre idrola i epun ka sis. 26 Tro ni a hamë epuni la hni ka hnyipixe, me amë thei epun la mekun ka hnyipixe. Tro ni a xometrij qa ngöne la ngönetrei i epun la hni ka catr tune la etë, me hamë epuni pena la hni ka menyik tune la ijön.* 27 Tro ni a hamë epuni la uang, me uku epun troa metrötrëne la itre wathebong, nge tro hë epuni a xötrethenge me trongëne la itre hnenge hna amekötin. 28 Nge tro hë epuni a lapane la nöj hnenge hna hamën kowe la itre qaaqaa i epun. Tro hë epuni a nöjeng, nge tro ni a Akötresi epun.’

29 “‘Tro ni a amele epuni qa ngöne la nöjei ngazo i epun. Tro ni a upe la itre wene feja troa hamën atrun, nge tha tro kö ni a upe la jiin koi epun. 30 Tro ni a atiqane la itre wene sinöe me itre xeni ne hlapa, matre tha tro hmaca kö epuni a hmahma hnei jiin qëmekene la itre nöj. 31 E cili, tro hë epuni a mekune hmaca lo aqane ujë i epun ka ngazo, me aqane huliwa menu i epun. Tro epuni a sisi epuni kö pine la itre ngazo i epun, me itre huliwa i epuni ka sis. 32 Ngo lapa atre ju laka: Tha koi epuni kö la eni a kuca lai,’ öni Iehova Joxu Ka Sisitria. ‘Loi e tro pe epun nöje Isaraela a hmahma me ietra, pine lo itre thiina i epun ka ngazo!’

33 “Hane hi la hna qaja hnei Iehova Joxu Ka Sisitria: ‘Ame la ijine tro ni a ahmitrötrë epun qa ngöne la nöjei ngazo i epun, ke tro hë ni a kuca matre troa lapane la itre traon, me xupe hmaca la itre tra etë. 34 Tro hmaca a eënyine la nöje ka cia hnitr, lo hna goeën hnene la itre atr ka cili thenge. 35 Nge tro hë la itre atr a hape: “Ceitune hë lo nöj ka cia hnitr, memine la hlapa Edrena. Nge ase hë eköhagen me lapane lo itre tra etë ne lo itre traon hna trotrij, me thëtrij!” 36 Nge e cili, tro la itre nöj ka lapa pe xötreithi epuni a atre laka, eni Iehova la ka xupe hmaca la itre götrane hna thë cili, me eënyine hmaca lo itre hlapa ka cia hnitr. Eni Iehova la ka qaja me kuca lai.’

37 “Hane hi la hna qaja hnei Iehova Joxu Ka Sisitria: ‘Tro ni a aijijëne la nöje Isaraela troa sipo ni la ewekë celë: Tro ni a aelën la etrune la itre atrene la nöj tune la etrune la hnënge öni, 38 me tune la etrune la itre atr ka hmitrötr ka traqa itronyi e Ierusalema* ngöne la itre ijine feet. Eje hi, tro la itre traon hna lep apatren ekö, a tiqa hnei hnënge trahmanyi me föe. Nge tro ha atre e cili laka, Iehova ni.’”