Isaia
29 “Ekölöhini Ariela,* Ariela lo traon hnei Dravita hna lapan!
Epi traqa pi la ketre macatre thupene la ketre;
Epi tro pala hi a tro xötrë la itre feet.
2 Ngo tro ni a acian la akötr koi Ariela,
Nge tro ha hetre hleuhleu me treij,
Nge ame koi ni, tro ej a tune la hna athi eë ne la ita ne huuj i Akötresie.
3 Tro ni a amë xötreithi ö la lapa soceng,
Nge tro ni a thinge qaluqalu eö hnene la ketre ihag
Nge tro ni a acile la itre jia ne isi matre lepi ö.
4 Tro ha thaipië eö;
Tro pë hë eö a ithanata qa kuhu hnadro,
Nge tro ha xeti la aqane ewekë i ö hnene la xaxau.
Tro ha xulu qa ngöne la ihnadro la nine i ö
Tune la nin ne la atr ka ithanata me itre ka mec,
Nge tro hë la itre trengewekë i ö a iulili qa ngöne la xaxau.
5 Tro la etrune la itre ithupëjia* me eö a tune la paudra,
Ame la etrune la itre ka iaxösisi, ke tro ha tune la kupeine qitr hna ufe enyin.
Nge tro ha aca tro traqa la ewekë cili.
6 Tro hë Iehova joxu ne la itre trongene isi e hnengödrai
A cilëgöli eö hnei hedreng, me sa, me ulil atraqatr,
Me udreli, me wene, me ukahlokine eë ka catrehnin.”
7 Matre ame asë hi la itre nöj ka isi me Ariela
Lo itre ka isi me angeic,
Me acili hag xötreithi angeic,
Me akötrë angeic
Tro pë hë angatr a tune la ketre pu, me tune la hna meköle goeën e jidr.
8 Eje hi, tro ha tune la atr ka mecijiin, ka puje la angeic a xen,
Ngo ame la angeic a hlë, angeic pala hi a meci hnei pi xen,
Me tune la atre pi ij, ka puje la angeic a ij,
Ngo ame la angeic a hlë, angeic a kucakuca, me meci hnei pi ij.
Celë hi la ka troa traqa kowe la itre nöj asë
Ka isi memine la wetre Ziona.
9 Xou ju nge sesëkötre jë;
Atimekë epuni ju, nge timeke pi.
Hnaitö hë angatr, ngo tha hnei waina kö;
Zimozimo hë angatr, ngo tha hnei kahaitre kö.
10 Ke hnei Iehova hna nenge hui epun la ua ne hmulizië;
Hnei nyidrëti hna thinge la luemeke i epun itre perofeta,
Hnei nyidrëti hna atuthe la itre he i epun itre ka meköle goeën.
11 Nge ame la itre hna meköle goeën, tro itre ej a tune la itre trengewekë ne la ketre itus hna pelehatren. Nge e tro sa hamën kowe la ketre atr ka atreine e, me hape: “Eni a sipo eö, pane e catrëne jë,” tro hë angeic a sa ka hape: “Thatreine kö ni, ke hna pele hatren.” 12 Nge e tro sa hamëne la itus kowe la ketre atr ka thatreine e, me hape: “Pane e jë la!” Tro hë angeic a sa ka hape: “Thatreine kö ni e.”
13 Öni Iehova: “Ame la nöje ce, kola easenyi ni hnene la itre trengewekë* i angatr
Me atrunyi ni hnene la itre që i angatr,
Ngo ame la itre hni i angatr, ke ka iananyi catr me eni;
Nge angatr a xoue ni thenge la itre wathebo i atr hna ini angatr.
14 Qa ngöne lai, tro hmaca kö ni a kuca la itre ewekë nyine hain memine la nöje ce,
Itre ewekë hna hain me nyine hain;
Nge tro ha patr la inamacanen la itre ka inamacan,
Nge tro ha juetrën la atrein ne la itre atr ka atrein.”
15 Ekölöhini la itre ka thele troa juetrën koi Iehova la itre mekuna* i angatr.
Angatr a kuca mitine la itre ewekë me hape:
“Drei la ka öhnyi së?
Drei la ka atre la hne së hna kuca?”
16 Ngo tria* kö la mekuna i epun!
Hapeu, tro kö la atre xupi inege a ceitu memine la dro ka fedr?
Ijije kö tro la ewekë hna xup a qaja göne la atre xup ej ka hape:
“Tha hnei nyidrëti kö hna xupi ni”?
Nge hapeu, ijiji kö tro la ewekë hna xup a qaja göne la atre xupi nyën ka hape:
“Pëkö hnei nyidrëti hna trotrohnin”?
17 Easenyi catre hë tro la Lebanona a nyi hlapa sinöe,*
Nge troa xome ceitun la hlapa sinöe, memine la ketre hnaxulu.
18 Ngöne la drai cili, tro la itre simi hnangenyë a dreng la itre trengewekë ne la itus,
Nge tro hë la itre timek a goe, ke hna thepe angatr qa ngöne la jidr me melöhlem.
19 Iehova la qaane la madrin kowe la itre ka ipië,
Nge tro la Atre Ka Hmitrötr e Isaraela a amadrinën la itre ka pë ewekë.
20 Ke tha tro hmaca kö a öhne la atre iaxösisi,
Tro ha patr la atre sipu selë angeic,
Nge tro ha humuth la itre ka canga saqe kuca la ngazo,
21 Ene lo itre ka jele thoine la itre xan,
Me ka tra thethine la atre isigöli angeic ngöne la qëhnelö ne la traon,
Me itre ka cipane la meköt kowe la atr ka meköt pine la itre ithanata ka pë alien.
22 Celë hi matre, hane hi la hna qaja hnei Iehova atre itö Aberahama, kowe la itre matra i Iakobo:
“Pë hmaca kö hmahma thei Iakobo,
Nge tha tro hmaca kö a wië qatresi* la qëmeke i angeic.
23 Ke tro hë angeic a öhne la itre nekö i angeic nyipi angeic,
Ene la huliwa ne la lue imeng,
Tro hë angatr a ahmitrötrën* la ëjeng;
Eje hi, tro hë angatr a ahmitrötrën la Atre Ka Hmitrötre i Iakobo,
Nge tro hë angatr a hetre xou atraqatr kowe la Akötresi Isaraela.
24 Tro pena la itre ka menumenu* a trotrohnine la itre ewekë,
Nge tro la itre ka eetr a kapa la ini.”