Iobu
27 Ame hnei Iobu hmaca hna qaja* ka hape:
2 “Maine nyipici laka, ka mele Akötresie, lo atre cipane la meköti koi ni,
Nge maine nyipici laka, ka mele la Ka Tru Trenge Men, lo atre akötrëne la meleng,
3 Nge maine eni pala kö a mano
Nge eje thenge la hnamano i Akötresie,
4 Haawe, tha tro jë kö la ineqëng a qaja la ketre ewekë ka tha meköti kö;
Nge tha tro jë kö la thinemeng a iaö!
5 Thatreine kö ni troa jele meköti epun!
Nge uti hë la tro ni a mec, tha tro kö ni a nuetrije* la aqane mele nyipicing!*
6 Tro pala kö ni a xölehuje la meköting, nge tha tro kö ni a nue ej;
7 Epi tro la ithupëjia me eni a tune la atre ka ngazo,
Nge tro la itre ka cile koi ni, a tune la itre atre ka tha meköti kö.
8 Ke nemene la mejiun ne la atre ka pë metrötre koi Akötresie,* ngöne la kola apatrenyi angeic,
Me ngöne la Akötresieti a xome la mele i angeic?
9 Ame la kola traqa la xou koi angeic
Hapeu, tro kö Akötresieti a drenge la xëwe i angeic?
10 Tro kö angeic a hetre madrin thene la Ka Tru Trenge Men?
Nge tro kö angeic a hë Akötresie e nöjei ijin?
11 Tro hë ni a ini epun göne la mene* i Akötresie;
Nge pëkö hnenge hna troa juetrëne göne la Ka Tru Trenge Men.
12 Maine nyipici laka, hetre hnei epuni hna meköle goeën,
Nga hnauëne kö laka, ka pë aliene la itre trengewekë i epun?
13 Hane hi la edrö hnei Akötresieti hna hnëkën kowe la atre ka ngazo,
Lo thupen hna hamën hnene la Ka Tru Trenge Men kowe la itre ka iaxösisi.
14 Maine troa tiqa la itre nekö i angeic trahmany, tro ha humuthi angatr hnei taua,
Nge tha tro kö a ijije la xen kowe la itre matra i angeic.
15 Tro ha keleme la itre ka mele pe hnene la meci ka ixötrekeu,
Nge tha tro kö la itre föi angatr a treije pi angatr.
16 Maine tro angeic a xawane la mani tune la xaxau
Me kapa atrune la itre iheetr ka mingöming tune la dro ka fedr,
17 Me xawan itre ej,
Tro kö la atr ka meköt a heetrën itre ej,
Nge tro hë la itre atr ka pë engazon a thawa la mani i angeic.
18 Ame la uma hnei angeic hna xup, ke tune la hnë lapa i fenifen ka tha catre kö,
Me tune la hnë zae hna kuca hnene la ketre atre thup.
19 Tro hë angeic a meköl trenamo, ngo tha tro kö a kepe manathith qa ngön;
Ke ame hë la angeic a hlë, pëkö hnei angeic hna öhn.
20 Nge tune la di atraqatr, tro ha asesëkötrëne la itre atre ka ngazo;
Nge e jidr, tro ha ufetriji angatr hnene la udreli.
21 Tro ha xomi angatr hnene la enyi ne koië, nge tro hë angatr a patr;
Tro ha huli angatr tröne la zi angatr.
22 Tro hë ej a lepi angatr nge pëkö utipin
Ngacama angatr a kötrene la menen ej.
23 Tro hë ej a xexe koi angatr
Me qeji angatr qa ngön la jë i eny.*