Mika
7 Ekölöhini! Ceitunge hi memine la ketre atr,
Thupene la hna menuën la itre wene sinöe*
Me hleme la itre wene rezë hna nue pe,
Ka tha öhnyi wene rezë kö nyine ij,
Me wene wacua ka hmedr* hnei angeic hna piin.
2 Patre hë la atr ka mele nyipici qa la fen;
Pëkö ala cas ka kuca la meköt.
Angatr asë hi a zae matre troa aneni madra.
Angatr a isa wej la itre trejin me angatr memine la ifile.
3 Ka maca la itre ime i angatr troa kuca la ngazo;
Kola ifolosa hnene la nekö i joxu,
Kola imusinë troa hamë mani hnene atre amekötin,
Kola qaja la itre aja i angeic hnene la atr ka mama,
Casi hi la mekun* hnei angatr hna isigölin.
4 Ceitu me itre ka ithiny la atr ka loi thei angatr,
Nge loi ju kö la xötre ka ithiny hune la atr ka meköt thei angatr.
Tro kö a traqa la drai ne la itre atre thup i ö, lo drai ne ameköti ö.
E cili, tro angatr a meci hnei xou.
5 The drenge kö la sinatronge i epun
Nge the mejiune kö kowe la nyipi sinee i epun.
Wange pala kö la hnei ö hna qaja kowe la föe hnei ö hna meköle xom.
6 Ke kola xele ma wai kem hnene la nekö trahmany,
Kola cile koi thine hnene la nekö jajiny,
Kola icilekeu la tresi hmunë me ifëtresi* angeic;
Ithupëjia me easë la itre atrene la fami së.
7 Ngo ame ni, tro kö ni a lapa treqe Iehova.
Tro ni a treqene hnyawa* la Akötresie ka amele ni.
Tro kö la Akötresing a drei ni.
8 Ithupëjia fe, the madrine kö la eni a cil kowe la itre jol.
Ngacama kei hë ni, ngo tro hmaca kö ni a mejë;
Ngacama eni a lapa ngöne la gaa mit, ngo Iehova kö la lai koi ni.
9 Tro ni a xomihnine la elëhni i Iehova
Ke ase hë ni ngazo koi nyidrë
Uti hë la tro nyidrëti a isigöli ni me jelemeköti ni.
Tro nyidrëti a tro sai ni kowe la lai;
Tro hë ni a öhne la meköt i nyidrë.
10 Tro fe la ithupëjia me eni a hane öhne lai,
Nge tro ha ahmahmanyi angeic, lo atre qaja koi ni ka hape:
“Ekaa Iehova Akötresi ö?”
Tro hë la luemekeng a goeë angeic.
Tro ha tro weji angeic tune la trëtr e cahu gojeny.
11 Tro ha traqa lai ngöne la drai ne xupe la itre ihag etë i ö;
Ngöne la drai cili, tro ha kötrën la ifego.*
12 Ngöne la drai cili, tro hë la itre atr a traqa koi ö
Qa Asuria me itre traon e Aigupito,
Qa Aigupito uti hë la Hneopegejë;*
Me qa ngöne la ketre hnagejë uti hë la ketre, me ketre wetr uti hë la ketre.
13 Tro ha lep apatrene la nöj pine la itre atren,
Pine la itre huliwa* i angatr.
14 Jëne la sine tö ne atre thupë mamoe, engëne jë la nöje i ö, lo hnei ö hna kapa nyine edrö,
Lo itre ka mele cas nyipine la hnaxulu, nyipine la hnënge sinöe hna traan.
Loi e tro angatr a xeni trootro e Basana me Gileada tune ekö.
15 “Tune lo ijin eö a tro qa Aigupito,
Tro ni a amamai ö* la itre ewekë nyine hain.
16 Tro hë la itre nöj a öhne lai me hmahma, ngacama ka catre ju hë angatr.
Tro angatr a thinge la që i angatr hnei wanakoim;
Nge tro ha sime la itre hnangenyë i angatr.
17 Tro angatr a hadrum la so ne dro tune la itre un;
Tune la itre öni ka wewë, tro angatr a hmengöhmengöne me tro qa ngöne la hnë zae i angatr.
Tro angatr a meci hnei xou me thele Iehova Akötresie,*
Nge tro hë angatr a xoue nyipë.”
18 Drei la Akötresie ka tui nyipë,
Akötresie ka nue la ngazo me thëthëhmin la itre tria ne la nöje* i nyidrë ka mele pe?
Tha tro kö nyidrëti a lapa fë trengehni epine palua,
Ke aja i nyidrë la ihnimi nyipici.
19 Tro hmaca kö nyidrëti a utipi së; tro nyidrëti a ngaan* la itre tria së.
Tro nyipëti a trij asë la itre ngazo i angatr ngöne la itre gaa jui ne la hnagejë.
20 Tro nyipëti a mele nyipici koi Iakobo,
Me amamane la ihnimi nyipici i nyipë koi Aberahama,
Tune lo hnei nyipëti ekö hna sisiny kowe la itre xötrapane hun.