Hnaaluene Tus i Samuela
22 Hnei Iehova hna amele Dravita qaathene la nöjei ithupëjia me nyidrë, me qaathei Saulo. Ame hnei Dravita hna sile la nyima celë koi Iehova. 2 Öni nyidrë:
“Iehova la giting, me hnë zaeng, me trengecatreng, me Atre amele ni.
3 Akötresie la giting, me hnë zaeng,
Me petreng, me jian* ne iameleng,* hnë zae* gaa xeut
Nyipëti hi la ka thepe ni qaathene la itre ka iangazo.
4 Eni a thithi koi Iehova, lo nyine troa atrun,
Nge tro ha amele ni qaathene la itre ithupëjia me eni.
5 Itre hoke ne gejë hna mecin a kaca xötreithi ni;
Nge itre atr ka iangazo a axouenyi ni kösë tim ka kaca.
6 Nge kola kanothi ni hnene la itre eno ne la Hua;*
Nge kola cile koi ni hnene la itre hnö ne la mec.
7 Hnenge hna thithi koi Iehova ngöne la akötreng,
Nge tha mano kö ni hëne la Akötresing.
Qa ngöne la uma ne hmi i nyidrë, nyidrëti a dreng la aqane ithanatang,
Nge traqa ha kowe la lue hnangenyë i nyidrë la treijeng.
8 Hna enienij me hmengöhmengöne la ihnadro;
Nge hna kötrekötr la itre trepene la hnengödrai
Hna enienij, ke hna aelëhni nyidrë.
9 Kola elë draië la haj qa ngöne la hnafiji nyidrë,
Nge eë ka catr a lö pi qa ngöne la që i nyidrë;
Nge kola trotro la itre wanalep ka mel qaathei nyidrë.
10 Nge ame lo nyidrëti a ut, hna thile la hnengödrai,
Nge kola mit fene la lue ca i nyidrë.
11 Hnei nyidrëti hna të hune la kerubi me sesë kolemi.
Hna öhnyi nyidrë e ut hune la iape ne la ketre u.*
12 Nge hnei nyidrëti hna juetrë nyidrë hnei melöhlem,
Me itre tim ka mit, me itre iaw ka hmekön.
13 Qa ngöne la lai qëmeke i nyidrë, kola xulu la itre wanalep ka mel.
14 Nge qa hnengödrai, hnei Iehova hna ulil tune la hedreng;
Nge hna mexeme la nine ithanata ne la Ka Draië Catr.
15 Hnei nyidrëti hna huje la pehna i nyidrë me isa ijene la itre ithupëjiang;
Itre samek a amenumenu angatr.
16 Mama ha la gaa jui ne la hnagejë;
Nge itre ihaji i Iehova, me enyi ka tro qa ngöne la hnafiji nyidrë,
A amamane la trepene la ihnadro.
17 Qa koho, hnei nyidrëti hna li im;
Me ee ni, me huli ni qa ngöne la gaa jui.
18 Hnei nyidrëti hna amele ni qaathene la ithupëjia me eni ka catr,
Me qaathene la itre ka methinë ni, nge ka catre kö hung.
19 Hnei angatr hna cile koi ni ngöne lo eni a akötr,
Ngo hnei Iehova pala hi hna xatua ni.
20 Hnei nyidrëti hna tro sai ni ngöne la gaa lolo;*
Nge hnei nyidrëti hna amele ni, ke tru la ihnimi nyidrëti koi ni.
21 Iehova a nyithupene koi ni thenge la thiinang ka meköt;
Me të koi ni thenge la lue imeng ka pë ethan.*
22 Ke hnenge pala hi hna drengethenge Iehova,
Nge tha hnenge kö hna kuca la ngazo, ene la troa trotrije la Akötresing.
23 Eni a lapa mekune la itre wathebo i nyidrë;
Tha tro kö ni a jea qa ngöne la itre hnei nyidrëti hna amekötin.
24 Tro pala hi ni a pë ethan qëmeke i nyidrë,
Me thupën matre tha tro kö ni a kuca la ngazo.
25 Epi tro Iehova a nyithupene koi ni thenge la thiinang ka meköt,
Me thenge la lue imeng ka pë ethan qëmeke i nyidrë.
26 Ame la atr ka mele nyipici, tro nyipëti a mele nyipici koi angeic;
Nge ame la atr ka meköt, tro nyipëti a thiina ka meköt koi angeic;
27 Nge ame la atr ka pë ethan, tro nyipëti a thiina ka pë ethan koi angeic,
Ngo ame la atr ka qali thiina,* tro nyipëti a atreine waipengö i angeic.
28 Ke nyipëti a amelene la itre ka ipië,
Ngo luemeke i nyipë a upezöne la itre ka pi tru, nge nyipëti a thaipië angatr.
29 Ke Iehova fe, nyipëti la laameng;
Iehova la atre alaine la itre jidring.
30 Jëne la ixatua i nyipë, ijijinge troa isi me itre atrekënö;
Nge jëne la mene i Akötresie, ijijinge hi troa elëne la hag atraqatr.
31 Pexeje la aqane ujë ne la nyipi Akötresie;
Nge ame la trengewekë i Iehova, ke kola alolone trongën.
Nyidrëti la petr kowe la angetre zae thei nyidrë.
32 Ke drei la Akötresie e tha Iehova kö?
Nge drei la git e tha Akötresi së kö?
33 Hnë zaeng ka catre la nyipi Akötresie,
Nge tro nyidrëti a amekötine la jëng.
34 Nyidrëti a kuca matre maca la lue cang tune la drube föe;
Nge nyidrëti a acilë ni hune la itre gaa draië.
35 Nyidrëti a inine la lue imeng matre isi;
Nge atreine hi la lue imeng troa wenëne la tane pehna kopa.
36 Nyipëti a hamë ni la petre i nyipë matre thupë ni,
Nge tro la aqane ipië i nyipë a adraië ni.
37 Nyipëti a atrune la gojeny kowe la lue cang;
Tha tro kö a ucici la lue cang.
38 Tro ni a wej la itre ithupëjia me eni me apatrenyi angatr;
Nge tha tro kö ni a bëek, e tha hnenge kö hna pane lepi angatr.
39 Tro ni a lepi angatr me waja tranyi angatr, nge tha tro hmaca kö angatr a mejë;
Tro angatr a kei fene la lue cang.
40 Tro nyipëti a thue trengecatreng troa isi;
Tro nyipëti a akeine la itre ithupëjiang fene la lue cang.
42 Angatr a sue troa sipo ixatua, ngo pëkö ka amele angatr;
Angatre fe a hë Iehova, ngo tha sa kö nyidrë.
43 Tro ni a anyilanyilanyi angatr;
Me amudromudronyi angatr, me waja fici angatr tune la trëtr ne gojeny.
44 Tro nyipëti a amele ni qaathene la itre ka qeje ni ngöne la nöjeng.
Tro nyipëti a thupë ni, matre tro ni a tane la itre nöj;
Nge tro la nöj hnenge hna thatre a huliwa koi ni.
45 Tro la itre trenyiwa a traqa troa qaja aloinyi ni;
Tro angatr a drei ni,* pine la hnei angatr hna drenge göi eni.
46 Nge tro la itre trenyiwa a pë trengecatr;*
Nge tro angatr a tro qa ngöne la itre traon hna eköhagen* me hmengöhmengön.
47 Ka mele Iehova! Atrune jë la Giting!
Epi atrune la Akötresie me giti ka amele ni.
48 Tro la Nyipi Akötresie a të la ngazo hna kuca koi ni;
Nyidrëti a amë la itre nöj fene la musing;
49 Nyidrëti a amele ni qaathene la itre ithupëjia.
Nyipëti a adraië ni hune la itre ka isi me eni;
Me amele ni qa ngöne la itre atr ka isi.
50 Celë hi matre tro ni a olene koi nyipë Iehova nyipine la itre nöj,
Nge tro ni a nyimane la itre nyima* nyine atrune la ëje i nyipë:
51 Tro nyidrëti a eatrëne la itre huliwa nyine haine matre amelene la joxu i nyidrë;
Nge nyidrëti a amamane la ihnimi nyipici nyidrë kowe la hnei nyidrëti hna iën,*
Me koi Dravita me itre matra i angeic epine palua.”