Pane Tus i Aqane Lapa Itre Joxu

28 Ame hnei Dravita hna hën asë e Ierusalema la nöjei he ne nöj ne Isaraela: Itre tane tribu, me itre tixe ne lapa ka huliwa koi joxu, me itre tane la ala 1000 me ala 100, me itre tane ka thupëne la itre ewekë me itre öni joxu, me itre nekö i nyidrë, me itre ka huliwa hnine la hnalapa i joxu, me nöjei trahmanyi ka catr nge ka atrein. 2 Thupene lai, Dravita a cile jë me hape: “Drei ni ju ange trejin, me nöjeng, hnenge hna pi xupi uma ka cile hut* kowe la pua ne isisinyikeu i Iehova. Nge tro la uma cili a nyi tane la lue ca ne la Akötresi së. Nge hnenge hna hnëkë ewekë matre xup ej. 3 Ngo hnene la nyipi Akötresie hna qaja koi ni ka hape, ‘Tha eö kö la ka troa xupe la uma kowe la ëjeng, ke atre ka isi eö, nge hnei eö hna aneni madra.’ 4 Ngo ame pe, hnei Iehova Akötresi Isaraela hna ië ni nyipine la fami kaka, matre tro ni a joxu hui Isaraela uti hë epin. Hnei nyidrë hna ië Iudra troa tan, nge ngöne la tribu i Iudra, hnei nyidrëti hna iëne la fami kaka. Nge nyipine la itre nekö i kaka, eni hi la hnei nyidrëti hna kapa troa joxu hui Isaraela asë. 5 Nge nyipine la itre neköng—ke ala nyimu la itre nekönge trahmany hnei Iehova hna hamë ni—hnei nyidrëti hna ië Solomona troa lapa hune la therone i Iehova, me mus hui Isaraela.

6 “Öni nyidrë, ‘Solomona nekö i ö la ka troa xupe la umang, memine la götrane gaa pë ihakun, ke hnenge hna ië angeic troa neköng, nge tro ni a keme i angeic. 7 Tro ni a acatrene uti hë epine la mus i angeic, e tro angeic a trongën qa kuhu hni la itre hnenge hna amekötin, me itre wathebong, tune la aqane kuca i angeic enehila.’ 8 Celë hi matre eni a qaja qëmeke i Isaraela asë, lo icasikeu i Iehova, me qëmekene la Akötresi së ka hape: Thele jë troa atrepengöne la nöjei hna amekötin hnei Iehova Akötresi epun. Nge trongëne hnyawane jë, matre tro epuni a lapane la nöje ka lolo celë nyine edrö ka cile hut kowe la itre nekö i epun.

9 “Nge ame eö Solomona neköng, thele jë troa atrepengöne la Akötresi ne la keme i ö, nge nyihlue i nyidrëti jë hnene la hni ö ka pexej,* nge madrine jë troa huliwa koi nyidrë, ke Iehova a waipengöne la itre aliene hni, nge öhne kö nyidrë la itre aja, me itre mekun. Matre e tro eö a thele nyidrë, tro hë nyidrëti a mama koi ö. Ngo e traqa jë eö triji nyidrë, tro fe nyidrëti a hane trije palua eö. 10 Hnei Iehova hna ië eö troa xupi uma, nge troa huliwan ej nyine uma ne hmi. Haawe, catre pi, nge huliwa jë hë.”

11 Ame hnei Dravita hna hamë Solomona nekö i nyidrë, la hna siji tulun ne la hnahage hnë lö, memine la itre xa hnahag, me itre hnë ami ewekë, me itre hnahag e koho, me itre hnahag e koië pun, memine la hnahag ne la ithingene* pua. 12 Nyidrëti a hamën asë jë la itre hna siji tulun, lo hna amaman hnei Akötresie.* Itre tulu göi itre götrane gaa pë ihakun ne la uma ne hmi Iehova, me nöjei hnë xen xötreith, me itre hnahagë trengamo ne la uma ne hmi ne la nyipi Akötresie, me itre hna amë la itre ewekë thatraqane la hmi.* 13 Dravita a hamëne ju fe la itre xa hna amekötin göi itre lapa ne la itre atre huuj, me angetre Levi, me nöjei huliwa nyine kuca kowe la uma ne hmi Iehova, me nöjei ewekë hna huliwan hnine la uma ne hmi Iehova. 14 Nge hnei nyidrëti fe hna amekötine la etrune gool, nyine kuca la nöjei pengöne jia ne huliwa thatraqane la itre hnëqa, memine la itre jia ne huliwa sileva, thatraqane la itre hnëqa hna kuca e cili. 15 Nge hnei nyidrëti fe hna amekötine la etrune gool nyine kuca la itre tane laame gool, me itre laame gool, me nöjei tane laam, me itre laam, me itre tane laam sileva, ene la nöjei tane laam me itre laam, thenge la aqane huliwan. 16 Nge hnei nyidrëti fe hna amekötine la etrune gool nyine kuca la itre laulau, ene la nöjei laulau hna atëkeune la itre falawa. Nge hna amekötine fe la etrune sileva, nyine kuca la nöjei laulau sileva, 17 memine la ehacene gool nyine kuci fok, me kap, me itre trengene tim hna kuca hnei nyipi gool, me nöjei neköi kape gool, memine la ehacene la nöjei neköi kape sileva. 18 Nge nyidrëti a amekötine ju fe la etrune gool hna dreuth, nyine kuca la ita ne huuj ne dreu ka pui loi, memine la ikatr, ene la itre kerubi gool ka axö iap, nge ka hakuthe la pua ne isisinyikeu i Iehova hnene la lue iape i angatr. 19 Ame hnei Dravita hna qaja ka hape: “Hnei Iehova hna xatua ni me hamë inamacane koi ni, matre atreine jë ni fejan asë la nöjei ewekë hna siji tulun e celë.”

20 Thupene lai, öni Dravita koi Solomona nekö i nyidrë: “Catre pi, hni ne trahmanyi jë, nge huliwa jë hë. The xou kö nge the hmengöhmengöne kö, ke tro Iehova Akötresing a ce me eö. Tha tro kö nyidrëti a nue eö, me triji ö. Tro pala hi nyidrëti a ce me eö, uti hë la troa afenesine hnyawa la huliwa ne xupe la uma ne hmi Iehova. 21 Nge ka hnëkë hë la itre atre huuj me angetre Levi, troa kuca la itre huliwa ne la uma ne hmi ne la nyipi Akötresie. Nge ce eö fe me itre atre ka pi huliwa, nge ka maca troa kuca la nöjei pengöne huliwa. Nge tro fe la itre he ne nöj memine la nöj asë, a trongën asë la hnei ö hna troa amekötin.”