Iobu
3 Thupene lai, hnei Iobu hna ewekë me ejine la drai ne hnaho angeic. 2 Öni angeic:
3 “Epi a tha traqa ju lo drai ne hnaho ni,
Memine lo jidr ne angatr a qaja ka hape: ‘Ase hë hnahone la nekö trahmany!’
4 Epi a melöhleme pi la drai cili.
Nge epi tha tro kö Akötresieti e koho hnengödrai a nyipiewekën ej;
Nge epi tha tro kö la lai a hudrum ngöne la drai cili.
5 Epi tro la melöhlem memine la ahnuene la mec a hën ej.
Nge epi tro la iaw ka traqa fë mani, a heetrën ej.
Nge epi troa axouen ej hnene la nöjei ewekë ka ajidrine la lai.
6 Nge loi e troa lapa xome la jidri cili hnene la melöhlem;
Nge tha tro kö ej a ce madrin memine la itre drai ne la macatre,
Nge tha tro kö a ce numeran ej memine la itre treu.
7 Eje hi! Epi tha tro kö la jidri cili a hnaho;
Nge tha tro kö a mexem la mejene madrin.
8 Nge epi tro la itre ka ejine la drai, a ejine la drai cili,
Ene lo itre ka atreine ahlë Leviathana.*
9 Nge loi e miti pi la itre wëtresij ngöne la kaqa ne lai ne la drai cili;
Nge loi e tro ej a treqene gufane la lai,
Nge tha tro kö ej a öhne la kaqa ne lai.
10 Ke tha hnen eje kö hna thinge la qëhnelö ne la hni nenë;
Me juetrëne la akötr kowe la luemekeng.
11 Hnauëne laka, tha meci kö ni lo kola hnaho ni?
Nge hnauëne laka, tha meci kö ni lo kola mala ni?
12 Nge hnauëne laka, hnei nenë hna ami ni hune la lue iwatingöneca i eahlo
Me ami ni hune la imano i eahlo troa iji thi ni?
13 Ke ame e cili, tro hë ni a meköl ngöne la lolo;
Nge tro hë ni a meköl me mano ngöne la tingeting
14 Memine la itre joxu ne la fen me itre atresi angatr,
Lo itre ka xupe la itre götrane ka hnyiqetre hë* enehila,
15 Memine la itre neköi joxu ka trene gool,
Lo itre ka trene uma ka tiqa hnei sileva.
16 Nge hnauëne laka, tha ceitunge kö memine la nekönatr ka uthith nge hna juetrën?
Me tune la itre medreng ka tha hane kö öhne la lai?
17 Ke ame ngöne la mec, tha enienije hë la itre atre ka ngazo;
Nge mano hë la itre ka kucakuca.
18 Nge ame la itre hna oth, angatr a ce mele hnyawa e cili;
Ke tha drenge hë angatr la itre ka ifolosa.
19 Nge e cili, ceitune hi la ka co me ka tru,
Nge pë hmaca kö hlu me maseta.
20 Nge hnauëne laka, Akötresieti a hamëne la lai kowe la atr ka akötr
Memine la mel kowe la itre hni ka hleuhleu?
21 Nge hnauëne laka, angatr a lapa treqene la mec ngo tha traqa kö ej?
Angatr a thele catrën ej hune la itre mo hna juetrën,
22 Nge angatr a madrin atraqatr,
Me sue madrin la angatr a traqa kowe la hua.
23 Nge hnauëne laka, nyidrëti a hamëne la lai kowe la atre ka triane la jë i angeic,
Me kowe la atr hnei Akötresie hna thingi jën?
24 Kola nyihnane la trepang hnei awe,
Nge kola neni la itre trenge timidrang tune la tim.
25 Ke traqa ha koi ni la hnenge hna xouen,
Nge xulu hë koi ni la hnenge hna xelen.
26 Nge tha hane kö ni melëne la tingeting, me lapa xetietë,* me mano,
Ngo kolo pala hi a lepi ni hnei akötr.”