Salamo
ל [Lamed]
10 Iehova fe, nyipëti a cile iananyi fë nemen?
Nyipëti a zae fë nemen ngöne la ijin akötr?
2 Kola axösisine la atr ka akötr hnene la atr ka ngazo,
Ngo tro kö angeic a xeni pune la aqane nyinyithiina i angeic.
3 Ame la atr ka ngazo, angeic a selëne la itre aja ne la hni i angeic
Me qaja aloine la ka meciun;*
נ [Nun]
Ngo pëkö metrötre i angeic koi Iehova.
4 Tha angeice kö a thel troa atrepengöi nyidrë, ke ka pi tru angeic;
Ame koi angeic: “Pëkö Akötresie.”
5 Angeic a eatrën asë la mekuna i angeic,
Ngo tha trotrohnine kö angeic la hnei nyipëti hna amekötin;
Angeic a wangacone* la itre ithupëjia me angeic.
6 Öni angeic e kuhu hni i angeic: “Tha tro kö ni a hane enienij;*
Qaane la ketre xötr uti hë la ketre xötr,
Tha tro kö ni a öhne la akötr.”
פ [Pe]
7 Tiqa ha la që i angeic hnei hnëjin, me trengathoi, me iqanangazo;
Fene la thineme i angeic la iakötrë me iangazo.
8 Angeic a zae ezine la itre hunahmi;
Angeic a humuth qa cili la atr ka pë engazon.
ע [Ayin]
Luemeke i angeic a alamekëne la atr ka hleuhleu.
9 Angeic a thup ngöne la hnë zae i angeic, tune la ketre liona ngöne la hnaope i nyën.
Angeic a treqene troa xolouthe la hna akötrën.
Angeic a isiline la ifile matre jötre pi nyën.
10 Ame hna kuië nyën me hej angazo nyën e kuhu hnadro;
Itre hna akötrën a kei fene la lue ca i angeic.
11 Öni angeic e kuhu hni i angeic: “Thëthëhmine hë Akötresie.
Tha semesinene kö nyidrë.
Pëkö ca hnei nyidrëti hna öhn.”
ק [Qoph]
12 Iehova fe, mejë jë. Akötresieti fe, xejë jë la ime i nyipë.
The thëthëhmine kö la itre hna akötrën.
13 Hnauëne laka, pëkö metrötrene la atr ka ngazo koi Akötresie?
Öni angeic e kuhu hni i angeic: “Tha tro kö nyipëti a upezö ni.”
ר [Resh]
14 Ngo öhne kö nyipëti la akötr me hleuhleu.
Nyipëti kö la ka goeëne me iujine la itre ewekë.
Kola ujë koi nyipë hnene la atr hna akötrën;
Nyipëti la atre xatuane la nekönatr hna mecitrij hnei kem.
ש [Shin]
15 Hutra pi la ime ne la atr ka ngazo, me ka qali thiina,
Matre ame hë la nyipëti a thele la ngazo i angeic,
Tha tro hmaca kö nyipëti a öhn.
16 Joxu hë Iehova uti hë epin, epine palua.
Patre hë la itre nöj qa celë fen.
ת [Taw]
17 Ngo Iehova fe, tro kö nyipëti a dreng la sipo ne la itre ka ipië.
Tro kö nyipëti a aegöcatren la hni i angatr, me hnangenyë angatre hnyawa.
18 Tro kö nyipëti a jelemekötine la nekön hna mecitrij hnei kem me itre ka awe,*
Matre tha tro hmaca kö a axouenyi angatr hnene la itre atr ka troa mec e celë fen.